Wild Wild West na Aruba!

Na 1964, e regisor Sergio Leone a lansa e pelicula "A Fistful of Dollars", cu Clint Eastwood. E pelicula ta considera hopi biaha como e prome spaghettiwestern y a lansa e carera di Eastwood. E pelicula tambe a bira famoso pa su soundtrack compone door di Ennio Morricone.

E pelicula ta conta e storia di un homber misterioso, cu Eastwood ta hung, cu ta yega na un pueblo chikito cual ta domina door di dos grupo rival. E a dicidi pa intermedio entre e dos parti y pone fin na e violencia. Cu su abilidad pa tira mandera un cowboy y su sanger frieuw e ta logra cambia e situacion na su fabor.

E pelicula tabata un di e prome filmnan di accion moderno y a renoba e genre di western. E a kibra cu e western tradicional, unda e grupo bon y malo ta separa y a introduci un anti-heroe den persona di Eastwood. Su karakter no ta un heroe tradicional, sino mas un oportunista cu ta busca su mehor den e situacion.

Mi a yega di conose e pelicula aki pa prome biaha na un edad jong ora cu mi tata tabata mirando e pelicula. Na cuminsamento e pelicula no a impresiona mi hopi, pero awo mi admire e pelicula mas y mas y cu e intro-musica cu ta contagioso. E pelicula ta keda un clasico, specialmente pa mi, te ainda e pelicula ta impresiona hopi hende y ta stima e genre.

E pelicula "A Fistful of Dollars" a sali na 1964, pero awendia durante un tempo di inestabilidad politico den partido AVP, mi a pensa hopi biaha riba e pelicula aki. Por ta mi tin un fantasia hopi grandi, pero mi kier bisa cu e pelicula aki tin hopi relacion cu e situacion politico actual na Aruba. Bo por mira un sentido mas profundo na e pelicula pa medio di e politico y e reto cu partidonan politico ta enfrentando ora cu ta mantene ley y seguridad di e ciudad.

Den e pelicula ta trata di un ciudad goberna di dos grupo rival. Laga nos compara nan cu e dos partido politico importante na Aruba di awe, AVP y MEP. Aparece cu no tin un instancia gubernamental cu ta supervisa e situacion. Con Clint Eastwood ta hunga e mester pone ordo pa para e grupo rival. E pelicula ta pone implicitamente e pregunta: kiko e rol di e partido politico bieuw ta den e situacion manera aki?

Den tempo moderno, e rol di e gobierno ainda ta crucial pa mantene lei y ordo. Tin e Trias Politica unda e podernan di ehecutivo (uitvoerende macht), legislativo (wetgevende macht) y hudicial (rechtelijke macht) ta separa. Pero e siman aki nos a mira cu e partido politico no ta respecta e dicision di husticia, den e caso di Avestruz, cu parlamentario Benny Sevinger di AVP solamente ta culpabel pa passieve omkoping y verduistering. Pa esaki, mester haña un aña di prizon cu 6 luna condicional. Ademas, e no por tene un funcion politico pa 5 aña. Riba e decision di e hues, AVP a celebra e victoria, pero no tur hende a keda contento. E dialuna cu a pasa, durante e reunion di partido di AVP, nan a dicidi si Benny Sevinger lo por keda parlamentario. Realidad ta cu e reunion no mester a tuma luga, pasobra e decision a wordo tuma caba. Segun e partido berde, e por keda parlementario. Riba e decision aki, parlamentario Rycond Santos do Nascimento a laga e partido di AVP, pero e ta keda cu su asinto como parlamentario independiente.

Awendia e partidonan politico ta encarga pa garantisa seguridad di ciudadanonan y na mes momento respeta e libertad y privacidad di ciudadanonan. Pero tambe pa trata tur hende den un comunidad igual. Esaki ta un caso caminda cu e poder hudicial mester ta atento y mester respeta e poder legislativo y ehecutivo. Esaki no ta un tarea facil y specialmente mester tuma medida drastico. Pero stel cu e no ta wordo sostene dor di politica? Cu bo por hasi falta pero e no tin consecuencia. Aparentemente tin privilegio cu ta bay cu bo falta. Y si bo como ex-minister, manera Besaril di MEP, a hasi falta, bo por hiba e gobierno na corte. Por ta cu un sentencia mas leve ta sali for di esaki. E resultadonan di esaki ta di ta celebra dor di e partidonan politico, MEP of dor di Besaril su mes.

Un otro aspecto importante cu e pelicula ta subraya ta e responsabilidad di e ciudadanonan pa contribui na seguridad di nan comunidad. Den e pelicula e homber misterioso ta busca un manera pa stop e dos bandidonan. Esaki tambe ta relevante pa e politica di awe, den cua comunidad mester hunga un rol activo pa evita criminalidad y mantene e seguridad. Ta parce manera cu e parlamentario Rycond Santos do Nascimento ta bira e cowboy y hunga e rol di Clint Eastwood pa asina restaura ordo y confiansa den e ambiente politico atrobe. Aparentemente e partidonan politico bieu no por recupera e confiansa di e pueblo y nan ta hopi leu for di dje. Solamente e apoyador nan duro ta keda tras di nan y ta bisa cu nan partido no ta hasi nada malo. Nan ta papia tocante integridad den nan partido, pero nan mes no ta cumpli cu esaki.

E media di Aruba a indica cu hopi parlamentario di MEP di antes a sali for di e partido y nan a keda un tempo independiente. Pa ehempel e personanan tawata Daphne Lejeuz, Arondino Croes, Booshi Wever, Mervin Wyatt-Ras y Marisol Lopez-Tromp. Nan a keda indica cu aki 5 persona a sali for di MEP y 1 solamente for di AVP. Mi ta haña esaki facil, y ta papia solemente di un banda. Den AVP tambe tin hende cu no a mira futuro mas den e partido berde. Banda di Marisol Lopez-Tromp, awor ta Rycond Santos do Nascimento. Pero naturalmente nos mester no lubida hendenan manera Otmar Oduber, Juan David Yrausquin, Juancho Irausquin y Betico Croes, kende tambe a sali for di AVP. Nos ta mira cu e forsa no ta na e partidonan politicio bieu di Aruba, pero na e individuo kende por yega mas lihe na un politica renoba.

Aunke "A Fistful of Dollars" ta un pelicula di un otro tempo y otro genre, e ta keda relevante pa e politica di awe. E pelicula ta ilustra cu gobierno y e ciudad mester mantene ley y ordo. E ta e responsabilidad di e ciudad pa contribui na un comunidad seguro. E desafio nan di goberna ainda ta actual y mester aborda nan cu un enfoke balansa di seguridad, libertad y privacidad di e ciudad.