Nos Himno y Bandera
Nos Himno y Bandera
Nos Himno y Bandera, simbolo di union di un pueblo cu a lucha pa haya su libertad. Un pueblo cu apesar di su diversidad den pensamento, den luga di origen, den color politico sa di uni pa logra un deseo, un anhelo, un meta comun pa ta liber riba su suelo.
Aunke cu e lucha a tuma tempo y mester a pasa den diferente adversidad, nos hendenan a keda persevera y no a rindi. Nos soño a wordo cumpli na aña 1986 ora cu nos a drenta nos Status Aparte. Un comienso nobo pa nos pais pa demostra cu nos ta capacita pa para riba nos mesun pia. Nos Status Aparte a yega den un periodo dificil cu yen di reto, pero nos tabata sigur cu hunto nos lo a surpasa e retonan aki.
Awendia mi ta puntra mi mes:
- Unda e union aki a keda?
- Unda e deseo di lucha pa nos pais a keda?
- Unda e bandera ta cu ta simbolisa un pueblo, un nacion bou di Dios?
Ta tur sorto di color ta waya unda cu bo bira. Nan a cambia nos color di bandera y pueblo a keda keto. Nan a trapa nos simbolo nacional y nos a acepta esaki manera carne cu nan ta hiba pa mata.
Kisas esaki ta un refleho di nos pais? E refleho di con desuni nos ta na Aruba?
Of kisas esaki ta exactamente loke esnan den poder kier logra; division y destruccion di nos pais?
Ta cuanto tempo mas nos lo laga nan trapa nos?
Ta cuanto tempo mas nos lo laga nan demoralisa nos?
Ta cuanto tempo mas nos lo biba den e sclabitud mental di tempo di colonisacion?
Cordando riba e palabranan di Betico Croes,
"Si mi cay na caminda, gara e bandera y sigui cu e lucha", mi ta puntra mi mes:
Ta cua bandera lo mi tin cu gara?
Ta pa ki meta nos ta luchando p'e den actualidad?
Ta unda nos pueblo luchado a keda?
Tratando di haya un contesta riba mi preguntanan mi tin di admiti cu Betico tabatin rason ora cu el a bisa: " Materialismo a vence idealismo."
Y mi ta spera di curason cu nos pueblo por reflecciona y cambia e rumbo di direccion di nos pais. Pa nos corda cu no ta pa nos mes nos ta lucha y traha awe, sino tambe pa e futuro di nos yiunan y e siguiente generacionnan.
Mi deseo ta cu aki shen of mil aña, nos pueblo lo hisa E Bandera di Aruba y cu orguyo lo canta nos Himno 'Aruba, dushi tera'.
Skirbi pa: Maribel Lampe
Fecha: 16 di maart 2025
Reactie van R. Clark op 17/03/2025
E artíkulo ta trata di un tema importante: e union di nos pueblo y e significado di nos bandera y himno como simbolonan di independencia y lucha.
Mi ta aprecia e manera cu e autor ta recorda nos historia, e esfuerso di nos antepasadonan, y e mensaje di perseverancia. Mencionando e luchanan pa logra Status Aparte y e desafio cu a bin despues, e artíkulo ta trece pa dilanti un realidad cu nos no por lubida.
Ta cierto cu tin problema den nos sociedad, y cu hopi hende por sinti cu e union di antes no ta berdaderamente existí mas. Pero e afirmacion cu “nos pueblo ta desuni” of cu “nan a trapa nos simbolo nacional” ta fuerte y por crea un sintimiento di desesperanza, envez di inspirá cambio positivo.
Mas importante ainda, si nos kier un Aruba mas uni, nos mester busca manera pa uni. Mi ta comprendé e preocupacion cu materialismo ta vence idealismo, pero e solucion no ta solamente den mira atras, sino den traha riba un futuro den union. Mi no tin un respuesta fácil pasobra e reto aki ta grandi, pero mi ta kere cu esaki lo ta posibel. Un cos si mi sa cu tin hopi hende ta traha duro pa mehora e situacion. Esaki ta un accion di valor cu lo duna fruto, y kizas e artíkulo aki por inspira mas hende pa tuma accion!
Commentaar van M. Lampe op R. Clark reactie
Apreciabel sr. Clark,
Masha danki pa bo reaccion.
Nos pasado ta mes importante cu nos presente y nos futuro.
Di nos pasado nos:
- ta siña. Pa nos no ripiti e erornan di nos antepasadonan.
- ta tuma loke ta bon. Purba di conserva y pasa esaki pa e siguiente generacionnan.
- futuro generacionnan ta haya un idea di unda nan ta bin.
Nan lo por sinti nan mes orguyoso cu un isla asina chikito riba mapa tabata consisti di hende cu curashi, cu balentia, cu fortalesa y un amor grandi pa nan patria. A lucha cu e conviccion cu nan lo bira un dia 'Baas' den nan propio cas.
