Vota na bureau 62

Mi a bai na e luga di vota cu a wordo asigna na mi riba mi carchi di cita. Ora cu mi a yega, mi a mira un fila chikito na banda drechi di e patio di scol. Tambe mi a mira un fila chikito enfrente di mi, unda hendenan tambe tabata para den fila. Compara cu e hendenan den e fila riba e patio di scol, e hendenan den e otro fila tabata den sombra. Mi no tabata sa ki fila mi mester a para aden. Afortunadamente, net na e momento ey un pedchi di papel a wordo poni riba un kalbas di sushi, unda por a lesa cu hendenan mayor di 60 aña y hendenan cu limitacionnan fisico mester a sigui recto pa para den fila ey. Afortunadamente, awor mi sa cu mi mester a para den fila na banda drechi di mi.

Na banda di mi, mi a mira e otro fila di hendenan mayor di 60 aña. Basta extraño tabata e echo cu aki tambe tabata tin hendenan cu sigur no tabata 60 aña of mas bieuw. Pues, tal vez nan ta haya prioridad, ya cu nan no tabata sa cu nan tabata para den un fila robes. Pasobra esaki a wordo indica awor. No tabata tin suficiente pensamento riba esaki, ya cu justamente den e fila aki, e hendenan mayor mester a subi un obstaculo bastante grandi. Hopi leuw na banda diferente di e patio di scol tabata tin un elevacion di asfalt pa sillonan di rueda, pero nan mester a camin'e un poco. Afortunadamente, e hendenan mayor aki no a para den solo mucho tempo. Tambe nan mester a indica den oranan di mainta, prome cu e luga di vota habri, den ki fila e hendenan mayor mester a para pa duna nan voto.

Asina tabata tin dos fila. Y un luga caminda un muhe tabata para na porta di e luga y tur biaha dos persona tabata haya permiso pa drenta. Naturalmente, mi tabata para den e di dos fila calmamente wardando mi turno den e sol maraviyoso. Bruscamente, tabatin reaccion furioso na porta di e luga. E personanan den e fila a haya un diferencia di opinion. Tabata subi basta halto cual a causa cu un cantidad di nan a cuminsa pelea cu otro. Aparentemente, e personanan cu tabata para den solo tabata considera cu e personanan cu tabata para den e fila robes y no tabata 60 aña of mas bieuw mester a keda para patras. Pero den e otro fila. Naturalmente, nan no tabata di acuerdo, ya cu nan tambe a para caba pa mas cu un ora. Ni sikiera cinco minuut despues, dos polis a yega pa duna sosten. Nan a wordo yama pa e personanan di e luga di vota. Un persona, cu tabata para hunto cu su mama den e "fila robes", tabata den conversacion cu polis. E polis a bisa cu e personanan cu no tabata mas bieuw cu 60 aña mester a para den e otro fila. Pero precisamente e personanan aki a para caba den fila pa mas cu un ora y no tabata sa cu nan tabata para den e "fila robes". Finalmente, un pareha a dicidi di keda para atras atrobe. Pa nan, un ora mas. E persona cu tabata den conversacion cu e polis no. E no tabata haya esaki husto, y cu rason. Algun hende cu tabata mira y hendenan den e otro fila a reacciona y a grita cu e mester a bolbe para den fila, tur cos tabata sumamente humiyante. Finalmente, nan a laga'e drenta, pero pa duna su voto no tabata un momento feliz mas pa ne. E polisnan a bai for di eynan.

Despues mi a papia cu e persona aki y e la contami cu el a drenta den fila hunto cu su mama. El a drenta den e fila aki pasobra e no kier a para den solo, pero tambe pasobra e mes no tabata sa cu despues di 45 minuut nan a pone un papel riba un kalbas di sushi cu e noticia cu e fila aki tabata pa hendenan mayor di 60 aña. E ta corecto, pasobra mi mes a mira cu nan a pone e papel aki riba e kalbas di sushi. Tambe e tabata considera cu e manera di maneha e situacion pa parti di polis tabata injusto. Nan no tabata tin ningun comprension pa e situacion y no kier a ni scucha su banda di e storia. Nan a bisa cu e personanan den e luga di vota a dicidi asina y asina mester a sosode. Ningun empatia. Segun polis, e mester a bolbe para atras den fila. Afortunadamente, como un persona cu ta pensa, e no a scohe pa esaki. E tabata considera cu e polisnan of e personanan di e luga di vota por a busca un solucion y no simplemente manda hende wega sin rason. Nan por a regla algo door di bisa cu for di awor lo tin dos fila, un pa hendenan mayor di 60 aña y un otro fila pa hendenan hoben. Asina bo ta mantene tur hende su dignidad.

Algun dia pasa mi a papia cu mi prima tocante mi columnan skirbi. E la haya e columnan aki "Na punto". Pero e tabata falta un "Call for action". Esaki tabata sigur un observacion cu mi por a uza bon y cu ta na e momento aki mi kier duna satisfaccion na mi prima. Si mi mester duna un solucion pa esaki, mi lo bisa cu tin cu tin un reorganisacion den e cuerpo policial di Aruba. Of mester ofrece curso adicional den e cuerpo, cu ta enseña polisnan pa maneha e pueblo di forma social. Mi ta sinti cu hopi polis ta pensa cu nan ta sirbi nan mes, enbes di e pueblo. Nan ta pa e pueblo y no otro caminda! Tambe den enseñansa bo ta mira esaki pasa y bo ta mira hopi problema aki tambe. Of un cantidad di polis mester busca un trabou diferente. Un trabou cu ta na nan lugá. Of un screening mas bon pa bira polis. Awor cualkier hende por bira polis. Unda e tempo a bay cu polis tabata bo amigo di mas? Unda nan tabata papia y yuda busca un solucion? Unda e lado humano y e oido pa scucha di polis a keda? Tal vez un idea pa haci nos proximo minister di Husticia consciente di esaki via un carta. 

Loke ta trata organisacion di e luga di vota. Aki tambe mester pensa bon kico ta e fila pa hendenan mayor di 60 aña y si nan ta wordo facilitá bon cu un elevacion pa un sillon di rueda, andadera y eventualmente suficiente sillon. Asina nan por duna nan voto cu tur satisfaccion. Den mayoria caso ta bay bon, pero ora ora tambe hendenan mayor mester para den solo pa un rato largo. Tal vez gobierno proximo vez por inverti suficiente pa organisa e luganan di vota mihor. Mas luganan di vota y tent pa scapa di solo lo ta mas agradabel pa hopi hende. Sperando cu nan lo haya tempo pa esaki atrobe durante e siguiente cuatro aña.