Unda e revolushon di enseñansa na Aruba ta keda?

Dialuna 9 di november 2021, Simar (sindikato di enseñansa na Aruba) a duna noticia riba medionan social cu gobierno di Aruba kier corta 11 mion florin den enseñansa. Mi i hopi otro den enseñansa a keda sorpresa pa esaki. Ya tin asina tanto agitashon den enseñansa cu awor tin algu mas caminda desagrado i incertesa lo sigui aumenta i motivashon di docente lo bira cada bia mas chiki. Si mi por papia pa mi mes, mi kier bisa cu mi motivashon como docente a baha hopi durante e ultimo lunanan. Lamentable, pasobra mi ta haña cu ta un trabou fabuloso i desafiante. Por duna forma na yunan den bo propio manera, pa medio di bo conosementu riba un materia specifico, nan por desaroya autonomia. Cu bo por yuda muchanan asina, pa nan por contribui na nan futuro.

Antiguamente, e trabou di maestro tabata considera como un llamado, unda hopi hende tabatin respet pa nan maestro. Awor ultimamente mi ta duna les na klas di anochi tambe i di un klas di mas o ménos dies tres estudiante, aki ta sigui dos òf tres estudiante online òf fisicamente les. Resto aparentemente tin hopi otro asunto na cabes i no ta presente. Tambe mi ta nota esaki den estudiantenan, cu nan motivashon a baha hopi. Enseñansa no ta desafiante pa nan mas. I sin embargo, bo ta keda positivo i ta buska manera pa no perde motivashon.

Poco motivashon i reconosemento. Menospresio di gobierno a contribui na esaki. Nos no mester duna enseñansa di e ultimo cuater añanan so e culpa di esaki, pasobra personalmente mi ta kere cu ta pa 35 aña caba e enseñansa den gobierno no a risibi e reconosemento completo cu ainda e merese. Tabata asina semper? No, afortunadamente no. Pasobra sigur prome cu esei, bo tabata respeta i reconose como maestro. Hopi a scohe pa e trabou di maestro. Incluso nos orguyo national Betico Croes, cu na 1959 a caba su estudio na Academia Pedagogico na Hilversum como maestro i despues di esaki, promé cu e bai politica, a duna les na scol San Jozef i Antonius College na Santa Cruz.

Tambe durante su carera politico, Betico por a pone su talentonan di maestro na prome luga. Asina ta menciona den Amigoe di Curaçao dia 26 di september 1972 cu durante un reunion di eilandsraad na un momento Fichi Croes, di partido PPA, a papia tocante di e di dos motibo MEP, cu pa dje no tabatin base ni contenido. Esei naturalmente no a cai bon i lider di MEP Betico Croes a responde cu e kier a splica Fichi Croes ampliamente kiko tabata den e motibo, si e no a compronde. Finalmente Betico Croes ta maestro di profeshon i e ta dispuesto pa usa su talentonan. Asina tanto amor Betico tabatin pa enseñansa cu durante su lucha pa Status Aparte, el a menciona e importansia di enseñansa dor di bisa cu si no, lo el a bira director di Mavo na Oranjestad i no lo a bai politica. E kier a mustra asina cu Aruba ta wordo trata manera un madrasta pa Curaçao. E mester a lucha pa esaki i lamentablemente e mester a stop cu su trabou di maestro pa esaki.

Tambe na 1973 Betico a bisa durante tratamento di di dos presupuesto riba e hecho cu Havo ainda ta hopi cla i inaseptabel pa yu di Aruba. Porta di Havo no ta será, pero e ta keda habri solamente un tiki, segun Croes. E tabata kere cu specialmente bi-lingualismo tabata un gran desventaha pa yu di skol. E tabata lamenta cu gedeputado di Enseñansa Max Croes a bisa cu studiantenan ku a caba ETAO no por a haña trabou den gobierno. ETAO tabata representa enseñansa basico profeshonal bou di enseñansa economico, turistico i administrativo na e tempo ei. "Por fabor, pakico studiantenan di ETAO ta hasi stage na diferente servisionan di e isla?", raadslid Betico tabata kier sa na e momento ei.

Betico tabatin enseñansa na pecho i tambe tabata envolví den enseñansa den politica. I mi ta puntra mi mes... kiko Betico Croes lo a pensa di e situashon den cua nos ta awor na Aruba? No tin ningun hende den gobierno cu a siña na scol cu kita presupuesto for di enseñansa por ta e peor cortamento cu bo por duna e siguiente generashonnan?

Diaweps 11 di november a tuma luga un reunion strañamente di sindicato di enseñansa na Aruba, Simar. Nan a yama veld pa asisti na e reunion aki. Pa asina proveé veld di informashon i pone nan preocupashonnan na haltura. Tambe nan a pidi veld kiko mester ta e siguiente pasunan pa salbaguardá enseñansa. Mi ta kere cu tabata tin casi sincuenta hende presente na e reunion aki. Segun mi ta poco. Nos ta pasivo, pero hopi biaha e ta un comienso di algo grandi.

Desde 13 di maart 2020, ora Covid a haci su entrada na Aruba, e maestronan a keda solidario na banda di un parti di pueblo cu durante Covid a bira hopi dificil. Sector publico a mester entrega 12,6 porshento di nan salario for di mei 2020 te december 2020 pa yuda e pober. Aki den prome instansia no tabatin ningun maestro contra. Nos kier sigur yuda nos compañeronan cu tabata tin dificil durante Covid. Tambe Hulanda a ofrese nos algun yudansa cu FASE-pago cu lo stop den november 2021. Tambe subsidio di salario lo stop den november 2021 i no lo paga mas. Den total enseñansa te november 2021 a entrega 25 mion, cual ta igual na 58 porshento. Pakiko tanto den enseñansa? Esei ta mas cu mita. Resto di 42 porshento a keda entregá pa otro departamentonan. Tin tantu problema den enseñansa i awor gobierno kier corta 11 mion riba esaki.

Den dianan aki, falta maestro, desde loke ta bira 38 aña bo salario lo ceda igual, oranan extra no ta wordo paga mas, trabou ta bira mas duru, oranan di trabou ta wordo reduci, maestro no ta haya placa pa gastonan di auto ni telefon pa e yamadanan hopi cu mester haci na mayornan y pa bishita na luganan di stage. Pa un comparacion, hendenan den gobierno tur fin di luna ta haya placa pa gastonan di auto y telefon. Tin diferensia mester tin, pero tambe durante tempo di Covid? Asina tin hopi preocupacion cu a wordo papia durante e reunion di Simar. Di un maestro ta wordo pidi y hasta exigi cada vez mas. Un maestro ta pone su propio salario pa yuda su studiantenan. Un maestro ta duna mas cu 100%, pero ta ricibi 87,4%.

Loke mi tambe ta sorprende, tabata e noticia cu nos a haya di Simar. Cu gobierno no ta duna transparencia. Unda e placa ta bay? Ta bayendo pa e destinacion corecto? Y pakico exactamente 12.6%, en vez di 12.5% manera na Curacao? Aparentemente tabata un eror di tipo di Hulanda, causando cu nos mester paga 0.1% mas. Pues, no ta duna transparencia y gobierno, na mi opinion, ta fácilmente pusha e problema pa Hulanda. Seguramente lo ta e gran malo di tur esaki. Pero pense bon, ken ta wordo castiga pa tur e desorden den gobierno na Aruba? Ken ta haya e culpa? Un biaha mas e docente cu ta traha duro pa brinda bon educacion. For di ora di scol bo ta tende di hopi hende cu un trabou den enseñansa ta un bida facil y cu bo tin hopi vacacion. Pero nan no ta pensa riba e mas cu binti studiante den un klas cu bo mester duna bon enseñansa tur dia. Cu tur e problema social cu bo tambe tin. Ta manera cu gobierno ta kere den un tecnica di dividi y goberna na Aruba. Causando cu e campo den enseñansa ta wordo dividi y asina nan por sigui goberna. Mi kier, mediante e occasion aki, invita un ministro, di cualkier ministerio, pa bin haci un dia di invitado den mi klas. Cual ministro lo kier aseptá e reto aki? Cu mi bo ta bon bini. Mi ta kere cu e aprecio lo sigur bolbe na bo.

Simar lo sinta atrobe hunto cu e ministro di enseñansa riba 18 di november y nan lo presenta nan preocupacionnan di e campo. Awor ta e momento pa nos haya e mesun trato den enseñansa. Nos mester sostene otro den enseñansa y forma un bloque contra gobierno ora ta trata di mas austeridad innecesario. Y no malinterpreta mi. Nos kier sigur ta solidario cu nos semehante, pero den un forma adecuado. Unda cada ciudadano trahador na Aruba ta yuda nan semehante. Gobierno tambe por yuda cu esaki. Pero un austeridad adicional di 11 miyon riba enseñansa ta bay te leu!

Laga nos bira orguyoso atrobe di enseñansa, manera Betico Croes a haci. Laga nos para manera el a haci pa e futuro di nos yiunan. Cu cada un di nos tin e oportunidad pa por progresa na Aruba y via e calidad di cada un, haci Aruba sobresali manera nunca prome. Mi ta convenci cu sigur Betico lo a pelea pa esaki tambe. Mi no a logra presencia e fin di e reunion di Simar. Mi deber a yama mi atrobe y mi mester a duna les na scol di anochi. Unda mi ta busca mi motivacion tur biaha y cu hopi entusiasmo y positivismo cuminsa un les. Aunque e biaha aki tabata pa un klas cu tres studiante.