Unda nos ta bay for di aki?

E por ta cu e ta un tradicion Rubiano unda un politico semper ta cuminsa su carera politico na Arubaanse Volkspartij (AVP). Aki e ta forma su base, pa despues finalmente habri su propio alas y bula leu. Ehempelnan den historia por wordo haya den personanan manera Betico Croes, Juancho Irausquin, Otmar Oduber, Marisol Lopez-Tromp y Rycond Santos do Nascimento.

Na maart di anja 2016, mi a bay cu un cantidad grandi di estudiante di 4de klas pa un expo di Betico Croes. Esaki a tuma luga varios biaha den edificio principal di MEP na Santa Cruz. E estudiantenan tabata hopi contento y entusiasma tocante e informacionnan cu nan a haya e anochi ey. Un anochi, mas o menos 30 anja pasa despues di morto di Betico, tabatin un interes enorma tocante e bida di Betico y su lucha pa Status Aparte. Afortunadamente, esaki no a cambia. Dia 24 di augustus 2022, a tene un reunion den edificio principal di MEP tocante e historia di e "Augustus scur" na Aruba na 1977. Lamentablemente, mi no por tabata presente, pa motibo di algun otro situacion.



Riba diabierna 12 di januari 2024, a tuma luga e ultimo reunion di e curso basico "Formacion Politico Basico". Esaki a wordo duna for di 21 di september 2023 dor di Formacion Politico Digna Lacle Herrera. Mi tabata invita pa esaki, pero mi no tawata sa cu e reunionnan aki tabata tuma luga na edificio principal di AVP. En realidad, esaki no mester ta un problema. Pero mi sa, ora bo ta envolvi den politica aki, bo ta wordo etiketa rapidamente como un persona cu ta conecta cu un partido politico. Aki bo ta wordo etiketa pronto bou di e partido geel (MEP) of e partido berde (AVP). Den e periodo prome cu mi a divorcia, comunidad Rubiano lo a etiketa mi seguramente como un simpatisante di MEP. Durante mi divorcia, mi a ricibi un friendrequest inespera di e prome minister riba Facebook. Mi realmente no sa pakiko. No tabatin hopi contacto cu dje, asina cu no tabata tin famia of amistadnan politico involucra. Por ta e prome minister no por recorda esaki mas. Mescos cu e minister-president dimisionario di Hulanda, Mark Rutte. Cu algun topico, e no tin mas recuerdo activo. Ta cuminsando esaki bira un tendencia awor pa un prome minister?

Durante e ultimo reunion di e curso aki, un presentacion a wordo haci dor di e lider di AVP, Mike Eman. Seguramente despues di e reunion aki, por bisa cu awor mi ta na e banda di e partido berde. Pa clarifica un tiki. Mi a studia historia y organisacion gobernamental, y ta esaki mi ta interesa den. Politica ta un parti di esaki. Den mi studio mi a hanja e conosemento di politica caba y mi a cuminsa e curso aki pa curiosidad, interes y desaroyo personal. Pa asina por hanja un bista ainda mas amplio di e politica cu ta tuma luga aki na Aruba. Pa asina por mira e posibilidadnan pa Aruba bay dilanti. En bes di cumpli cu e deseo nan di un solo partido politico.

Mi a biba un gran parti di mi bida na Hulanda, mi a wak e situacion politico na Aruba di un manera diferente. Hopi hende na Aruba semper ta vota tradicionalmente pa un partido. Danki Dios no tur hende ta haci esey. Mi prefera wak e puntonan di programa di un partido y nan vision pa largo pa e pais. Mi ta cuminsa pensa na un manera unda, pa medio di politica, e interes di e pais ta primordial y ta haci tur esfuerso pa logra nan. Ademas, mi ta convenci cu den politica no mester ta riba kiko un partido por hasi pa bo personalmente. Aki ta trata hopi mas di kiko bo por hasi pa hende, ya sea cu ta den politica of no. Ta tarea di gobierno/politica pa duna e miho sosten posibel na tur hende cu kier aporta un parti positivo na sociedad. Y sigur no pa traha contra e ciudadano, sea intencional of no intencionalmente.

Ora mi ta vota, mi ta wak pa un partido politico y e personanan cu nan forsa y conosemento kier usa pa yuda avansa e pais. Un persona den politica cu ta pone su mes na servicio di pueblo y no di su mes. Un politico cu ta para pa integridad, pero tambe mester mustra esaki. Pasobra ta normal si un minister ta subi den un auto cu un boter di cerbes na man? Por ta cu e no tabata bebi, pero sociedad ta wak. Pasobra si un minister por hasi esaki, pakico e hende normal no por hasi esey? E hende normal cu kisas lo a keda pensa cu ta normal pa bebe y core auto. Of despues di un desgracia di auto, miho tuma un hit en run, pasobra un politico a haci esaki tambe. No, no ta semper facil pa un politico, pero e mester semper duna e bon ehempel. Pasobra bo palabra ta perde balor si bo accion nan no ta coresponde.

Naturalmente, esaki tambe ta conta otro funcionarionan publico. Algun ambtenaar of figura politico ta kere cu nan ta para riba di ley y por permiti nan mes tur cos pasobra nan a yega na un posicion determina. Asina tambe na Aruba. Nan ta bisa cu nan ta stima Aruba, pero en realidad nan ta stima nan mes un cartera. Politica Rubiano no mester ta un prolongacion pa gana propio beneficio of privilegionan pa e funcionario y su amigonan y famia. Segun mi opinion, esaki a sosode di 1986 te awe hopi biaha, y esaki por haci bo sinti desilusiona den politica. Ta un di e motibonan tambe pakico te awe mi no por dedica mi completo na un partido politico na Aruba. Nunca bisa nunca, pero awor mi prefera keda tras di cortina unda por sigui forma un bista obhetivo y mas amplio di henter e situacion y expresa esaki lo mas bon cu ta posibel. Por ta esaki ta mi forsa! Naturalmente, partidonan politico na Aruba for di 1986 a realisa tambe asuntonan positivo. Desaroyonan den turismo y infrastructura entre otro. Pasobra si esakinan no a mehora, nos ainda lo ta manehando riba un solo caminda cu nos ta core tranquilo tras di otro.

Despues di un periodo di gobierno di na maximo cuatro aña, semper ta keda interesante. Den mayoria di caso, diferente proyectonan cu ta bai bon ta stop of hende ta wordo manda cas. Cu despues nan ta wordo remplasa dor di e gobierno nobo. Ta prefera poni un grupo determina en bes di tur hende. Asina nos no ta avansa. Nos mester sigui sinti nos mes manera un unidad den e sociedad aki, of no? Of esaki ta conta solamente durante Carnaval? Of esaki ta conta solamente pa un grupo specifico? No por ta asina cu tin diferencia entre e poblacion y cu algun hende no ta ricibi nan derechonan. Sea pa gobierno ta mira cu ta costa hopi placa of cu nan ya a duna suficiente ayudo na otro. Cu por haci cu otro hende tambe ta cay den desgracia. Tur hende ta igual na Aruba toch?

Den politica y den sociedad Rubiano mester tin un cambio serio! Politica mester bolbe ta bou di control di e pueblo Rubiano, unda politica ta duna ayudo na deseo di e pueblo. Pero Aruba ta prepara berdad pa esaki? Politica y sociedad ta hopi individualista y materialismo ta hunga un rol grandi. Den un tempo bon, tin biaha no ta mira un sentido di comunidad y hende mester defende nan mes. Nos mester bolbe na e compromiso pa tur hende.

Unda nos ta bay for di aki? Aña pasa, Mike Eman a biaha pa Hulanda pa establece contacto cu algun politico Hulandes. Esaki pa por haya mas apoyo relativo na e pago di nos debe Rubiano, cu nos a tuma durante e periodo di Corona. E idea ta pa cambia e debe na yudansa cu supervicion cu por beneficia e sociedad Rubiano. Bo por bisa hopi cos, pero e contact cu Hulanda ta keda importante pa Aruba. Nos mester keda den dialogo y busca e solucion y ideanan corecto pa Aruba den future pa hopi ana mas.

E partidonan politico na Aruba mester uni nan forsa, manera nos tabata hasi den e aña prome di 1986. Pa asina por logra hopi mas cu loke ta e situacion actual. Pa e pueblo por mira cu politica den su totalidad ta gusta traha hunto cu e pueblo y busca solucion nan. Por ta cu un zakenkabinet den futuro por tin un impacto positivo aki? Of e partidonan politico lo eligi awor pa un politica nobo, pa beneficio di henter Aruba?