Un coma awe, no un punto!

Despues di hopi discusion tocante e fecha di 19 di december 2022, e ta un dia historico pa ser menciona. Un dia na unda e Prome Minister Mark Rutte, na nomber di gobierno Hulandes, a ofrece disculpa pa pasado di sclavitud. El a haci esaki den Archivo Nacional na Den Haag, unda Hulanda, segun Rutte, por wak su participacion den e pasado aki.

Den su discurso a sali na cla hopi hecho historico di e dolor grandi cu a ser haci na esclavonan y nan descendientenan. Ademas, el a demostra tambe un cambio personal den su pensamento. El a pensa durante hopi tempo cu historia di e pasado di sclavitud ta tras di nos. Pero el a faya. Awor e ta mira cu di siglo di opresion y di explota ainda ta traha aki y awor. 

Riba 18 di november 2013 Mark Rutte a bisa: "Bo mester tene cuenta semper cu sentimentonan, pero 'Zwarte Piet' ta preto. Pues nos no por cambia esaki." (Je moet altijd rekening houden met gevoelens, maar ‘zwarte piet’ zegt het al, die is zwart. Dus daar kunnen we weinig aan veranderen.) Durante e Summit di Seguridad Nuclear na 2014 na Den Haag Mark Rutte a bisa cu su amigonan na Antias Hulandes semper ta hopi contento, pasobra nan no mester pinta nan cara preto. Mientras cu ora el ta hunga pa Zwarte Piet, e mester kita e pintura preto pa dianan largo. Na e momento ey pa mi un constatacion doloroso. Mi mes no sa si aki a ser papia cu indignacion tocante esaki. 

Riba 4 di juli 2014 el a bisa cu tradicionnan no ta statico, pero ta cambia cu tempo. Suerte ta cu awor el a cambia di opinion. Riba 4 di juni 2020 el a bisa, ora cu el a topa cu hendenan cu un color di cuero preto y muchanan chikito a bisa: "Mi ta sinti mi increibelmente discrimina pasobra e Piet ta preto", cu el a pensa: "Esei ta ultimo loke bo kier na fiesta di Sinterklaas. Den un cantidad di aña casi no lo tin Pietnan preto, ta mi expectativa. Den un cantidad di aña casi no lo tin Pietnan preto, ta mi expectativa. Ta un cultura popular cu ta cambia pa medio di tempo bou presion di e debate social.”  (Ik voel me ongelooflijk gediscrimineerd omdat die piet zwart is”, dat hij toen dacht: “Dat is het laatste wat je wilt bij het sinterklaasfeest. Over een aantal jaren zullen er bijna geen pieten meer zwart zijn, is mijn verwachting. Het is een volkscultuur die verandert door de tijd onder druk van het maatschappelijk debat)

E gobierno di Hulanda ta ofrece disculpa awe. E gobierno di Hulanda a mira y reconoce lihe cu e pasado di sclavitud tabata tin un efecto negativo y ainda tin efecto. Mi a pensa riba loke Prome Minister Jan Peter Balkenende a bisa na 2006: "Sigui contento hunto! Sigui optimista! Bisa: Hulanda por logra esaki! E mentalidad di VOC, pasa frontera, dinamismo! Si of no?" (Laten we blij zijn met elkaar! Laten we optimistisch zijn! Laten we zeggen: Nederland kan het weer! Die VOC-mentaliteit, over grenzen heen kijken, dynamiek! Toch?)

Durante algun aña nos ta mira un cambio cu a conduci na e oferta di disculpa awe. Rutte ta reconoce cu e caminda pa e dia aki por ta mihor. Pero esey no mester ta un motibo pa no haci nada. "Nos mester tuma pasonan hunto. Nos no ta comparti solamente e pasado, pero tambe e futuro. Pesey nos ta pone un coma awe, no un punto" (We moeten met elkaar stappen vooruitzetten. We delen niet alleen het verleden, maar ook de toekomst. Dus zetten we vandaag een komma, geen punt)

Prome di juli 2023 lo bira un aña importante pa recorda. E gobierno kier cuminsa bay den dialogo cu tur grupo, caminda nan kier comparti e pasado, traha mas intensivamente riba mas conocemento di e pasado di sclavitud. Riba mas conscientisacion, reconocemento y comprension. 

Mi a pensa awe atrobe riba dos storia cu mi tata a conta mi un biaha y cu a haci un impresion grandi riba mi. E storianan ta di añanan 60, ora mi tata a bay Hulanda como migrante di trabou riba 7 di september 1964. Cu ne tambe a bay 14 Arubiano y 15 Curasoleño. Asina mi tata a traha na ‘Werkspoor’ na Utrecht. E tabata conta mi cu un dia el a tuma bus cu algun amigo di Curaçao. Nan mester a para pasobra no tabatin luga pa sinta. Ora el a tende un dama Hulandes papia cu su bisiña, cu tabata sinta banda di dje, cu e tabata curioso si e color preto por a bay for di e curpa. “Mi ta bay probecha si mi por haya e color for di e curpa.” Y el a tuma e brasa di un di e hendenan di Curaçao y a cuminsa frega. Ora el a bisa mesora: "No, mi no por kit’e! For di unda nan ta bin?" (Nee, deze krijg ik niet af! Waar zouden ze vandaan komen?) Den e bus nan no tabata sa cu mi tata y amigonan por a tende tur cos. Finalmente un di e amigonan a bisa cu nan a tende tur cos. Tur hende den e bus, cu a tende esaki, tabata para mira cu asombro. Algun hasta cu cara cora di berguensa. Nan no por kere cu mi tata y su amigonan por a comprende Hulandes. Finalmente nan a bisa e dama cu nan ta bin di Aruba y Curaçao. Na e tempo eynan tabata aparentemente ainda desconoci cu e contacto cu hende for di Corsou y Aruba.

Pero e historia cu semper a keda graba den mi memoria ta e storia cu mi tata a conta mi di su trabou na ‘Werkspoor’ den añanan 60. Un storia cu el a tende di otro colega y amigonan. Aki tabata trata di un persona for di Corsou kende tur dia durante su shift tabata wordo insulta y molestia pa un trahado Hulandes. Palabranan manera:  "Bay bek pa bo tera di macaco! Bay bek pa bo selva. Kico bo ta haci aki na Hulanda? E pais aki ta pa Hulandes. Zwarte Piet!" (Ga naar je apenland! Ga naar je oerwoud. Wat doe je hier in Nederland? Dit land is voor Nederlanders. Zwarte piet!)

Tur dia e homber aki for di Corsou tabata ser molestia y insulta durante ora di trabou na diferente manera. Mi tata no sa con hopi biaha e homber aki a papia cu personal pa bisa cu asina no por sigui. Asina e no por traha. Segun personal e mester laga tur esaki pasa. Como cu no tabata tuma ningun medida y e homber aki for di Corsou a entrega keho na polis varios biaha, polis a tuma nota di esaki y lo a informa personal. Pero tambe aki a bisa cu e mester laga tur esaki pasa. Aki tambe no a tuma ningun medida. E molestianan a sigui.

Te ora cu awa a pasa hariña y e homber aki for di Corsou a haya un tuberia di stèl y a dal e homber aki fuerte riba su cabes. E golpi tabata asina fuerte cu e homber Hulandes a bira invalido. Despues di e incidente aki, e homber for di Corsou a bay na personal y a conta kico el a haci. Tur biaha el a adverti nan. Na e momento ey polis a ser yama, pero nan no por a haci nada. Segun polis e situacion tabata conoci y nan mester a pensa riba un solucion. E homber for di Corsou a pidi su paspoort atrobe y a bay bek Corsou. Mi mes no sa con hopi di e storia aki ta berdad. Pero e storia a keda graba den mi memoria. Un storia impresionante.

Manera Rutte ta indica, nos no por cambia pasado, sino nos mester enfrent’e. Awe un paso a ser tuma pa haci dialogo, reconocemento y sanacion hunto y traha riba nos parti di historia.