Un carta pa e ministro di Husticia (Parti 3)

Dia 13 di juni 2022 mi a manda mi prome carta via B.I.D. pa minister di Husticia. Despues di hopi yamada mi a keda pusha for di porta pa porta. Dia 5 di juli y 28 di augustus mi a publica un column tocante un incidente cu a tuma luga desafortunadamente i cu tabata tin algun pregunta tocante dje. Hopi sa di e historia aki completo of parcialmente i ta papia tocante dje cu asombro. Con esaki por a pasa? Ta asina semper aki na Aruba?

Na mi di dos column a sosode cu nan a duna mi e conseho pa tuma e ruta legal. Mi por a bai pa Landsverordening Administratieve Rechtspraak (LAR). Ora contrario mi lo keda keha den media i nada lo sali for di dje. Durante e procedura aki na hues mi por a exigi un dwangsom si no tabatin un contesta. Mi tambe por a entrega keho na landsrecherche, na Bureau Interne Zaken i Onderzoek (BIZO) di Korps Politie Aruba (KPA). Mi nunca a pensa cu lo mi mester a tuma e pasonan aki. Ta necesario mes pa hasi esaki? Kiko ta e sentido si un investigador ya a tuma nota di e asunto aki? Talbes mes tabata envolvi i a keda cu un banda. Kiko ta e nivel di imparcialidad di e persona aki? Dia 29 di augustus 2022 mi a manda mi di dos carta pa B.I.D., pero desafortunadamente te ainda sin resultado.

Pa tur e consehonan cu mi a risibi mi ta sumamente agradecido. Sinembargo, mi ta sorpresa kada biaha cu desde cu mi a yega na Aruba, mi ta mira cu ora hende no ta di acuerdo, nan ta bai na instansianan hudicial masha lihe. Pakico nos mester bai na hues cada biaha ora cu hende no ta cumpli cu reglanan i leynan? Inclusive ora nos gobernacion mes no ta cumpli cu nan. Nos no ta confia otro mas? No ta mescos ora bo ta den auto i kier bay rechts i bo ta bisa esaki cu bo indicador, e otro automobilistanan ta confia bo te ora bo efetivamente bay rechts? I por exigi un dwangsom, pero no ta nos opinion cu e fondonan di Aruba lo por a ser usá pa motibo mas miho? Aruba ya ta pasando den momentonan dificil.

Ta parce cu ta dificil pa duna un contesta riba pregunta i busca un soluccion. I cu bo por señala ora un hende a faya. Pero pa faya no ta den nos cultura. I ora hende ta buskando coneccion, nan no sa con pa comporta. E model di polder, cu ta supuestamente ta un model di consenshi, ta parse cu aki na Aruba a ser reemplasa pa un model di egoísmo, odio, interes propio i un bataya contra otro pa finalmente sali na ventaha na gasto di otro. Ta normal pa hasi esaki asina? Nos kier pa asina nos ta trata otro riba e isla chikito aki ? Unda nos “Cristian” identidad ta keda? Of nos a perde esaki tambe?

I naturalmente mi por tuma medida huntu cu persona B. Pero ta duna sentido esaki? Talbes e motibo pa e incidente aki tabata inapropia di persona B. Talbes no tabata bon educa, pero e motibo di persona B mi por compronde masha bon. Manera persona B mi tambe por compronde persona A. Bo ta tratando pa defende bo famia na un manera of otro. Pero esaki no ta un motibo pa haña bo “rason”, door di informa un polis òf un investigador di esaki. Persona A a keda duna e conseho pa no hasi esaki. Ademas di esaki, e asunto no a keda eynan. Pasobra e polis aki ta tuma loke den su man pa duna persona B na trabou un tono intenso pa expresa su asombro. Sin cu persona B por a duna un contesta, el a ser intimida asina. Na final e bureau di San Nicolaas di e encuentro aki no tabata sa nada di dje. Mi no sa kiko ta e motibo di e polis aki. Mi ta tuma esaki hopi malo cu e polis aki, pero tambe cu minister di Husticia i e empleadonan den e instansia aki, cu no por a ni tuma e tempo i e curashi pa reacciona riba mi carta.

Naturalmenteya ta un tempo caba, pero falta e humanidad y un disculpa serio na persona B. Aparentemente, e frase "Arubamesterdinostur" no ta realmente duna na tur hende. "Tur animal ta igual, pero algun ta mas igual cu otro" (George Orwell - Animal Farm).

Den e column aki, sigur mi por menciona e nombernan di e personanan concerni. Mi ta kere pa mi mes cu esaki no lo pone mi den problema, pero te awor tambe mi no ta hace. Mi ta kere ainda cu tur hende tin derecho di haci eror. Pero cu mester tuma nota di dje, pa asina por siña di dje y asina no lo por pasa nunca mas. Laga e ta un ehempel pa e polis nobo! Cu ainda kier haci nan trabou cu honor y conciencia. Cu no mester kere, ainda cu ta un minister, polis of rechercheur, cu pueblo mester sirbi nan. Nos mester ta alerto pa esaki tur ora y sigui lucha contra di dje. Door di menciona e incidentenan aki, ciertamente ya a tuma un gran paso. Pero tambe door di soluciona e problema hunto na un manera humano y husto, ta crea un sociedad mucho mas fuerte caminda ningun hende por ni mester wordo exclui.

Nos no mester meti tur polis of rechercheur bou di un solo kam. Asina manera cu cada maestro, ademas di e appelnan podrido, tin bon entre nan. Talvez dificil pa kere, pero sigur tin tambe esnan cu ta traha bon y cu tambe, na momentonan, ta papia cu asco di e manera di traha di nan colega. Cu ta traha cu dedicacion completo pa realmente na nan manera sirbi pueblo, na e manera mas bon posibel.

Mi ta kere cu e meta a wordo logra caba. Hendenan ta tuma nota, ta papia di dje y ta papia cu asco. Algo asi lo spera nunca mas pasa. Y si pasa, ta nos deber pa bisa algo di dje mesora. Pa stroba e situacionnan aki na un manera husto mesora.

Un disculpa of busca un solucion ta wordo mira como debilidad. Lastima, pasobra juist esaki por a trece hopi respet y comprension. Aparentemente, interesnan di otro ta hunga un papel mas importante. Otro ta mira cu no bay corte como un debilidad enorme, pero sigur den e dianan aki mi ta mas convenci cu e debilidad aki ta trece un fuerza enorme cu solamente e hustonan y creyentenan lo compronde y cu sigur lo yuda nos yega mas cerca di Dios, como Creador! Mi ta perdona, pero mi no lo lubida nunca!