Spula krijt

E ultimo dia di scol. Aki na Aruba tambe conoci como Spula Krijt, un tradicion caminda coleganan den enseñansa ta bebe un trago hunto pa cera e aña scol hopi duro. Un tradicion na Aruba cu a cuminsa chikito, pero a bira un evento grandi cu ta haci bon pa horeca. Spula Krijt a bira asina grandi cu awor no ta solamente docenten ta celebra esaki.

Mi mes no ta realmente sigur si un Spula Krijt, den tempo di hopi discusion rond FASE, 5% y 12.6%, ta algo pa celebra? Of esaki ta duna docenten un momento pa laga e preocupacionnan na banda y disfruta despues di un aña scol duru? Pa mi esaki a bira un Spula Krijt special. Esaki tabata mi ultimo dia di scol na Colegio San Augustin. Mi a traha aki cu hopi gusto y dedicacion durante nuebe aña. Awor ta tempo pa busca un reto nobo na un scol nobo. Esaki ta e principio di algo nobo. Un posibilidad pa desaroya mi mes ainda mas y avansa na e manera aki. Despues di hopi aña mi a eligi pa mi mes. Pa mi esaki ta algo desconoci pa tuma despedida y lo falta e equipo sikiera. E bon conversacionnan den sala di docenten y e hopi yudansa, sosten y consehonan cu mi a ricibi di e docentenan aki. Orabaya ora ta traha hunto cu bo coleganan nan ta bira mas cu famia.

Colegio San Augustin ta un scol cu mi ta stima hopi y ta spera cu pronto lo tin un reemplazante pa mi. Manera boso sa, mi a pasa door di un tempo dificil. Sigur ora cu mi ta kere cu durante tur e anjanan aki mi tabata bibando den un bubbel. Mi ta kere cu awor mi ta den un linea ascendente, pero den algun momento e ta bai atras y mi ta kere cu mi mes ainda no a yega. Bo ta tratando di haya bo mes bek y aki ora bo ta comete eror. Simplemente e ta tuma tempo. Parece cu tempo ta cura tur cos. Emocionnan awor den momentonan tranquilo tin un luga diferente. Mi ta contento cu a puede despedi di e scol y colega nan bon. Tambe algun di e studiantenan no tabata gusta e noticia. Asina mi a haya un regalo y un carta di un studiante cu mi ta aprecia hopi. P'esei bo ta haya bek e consenshi cu bo realmente por haci un diferencia den bida di un studiante.

“Hey meneer Nicolaas. Mi kier a bisa cumi ta appreciate meneer hopi. Danki pa yudami. Danki pa ponemi hari. Meneer ta un di e miho meneer nan di e scol ki. Mi tey haya meneer su falta hopi hopi mes. Mi semper lo corda meneer cu meneer su les di wiskunde cu carot y tomati haha. Spera meneer corda riba mi. Spera mi keda meneer su faborito.”

Mi sa di ta conose cu otro personanan a desea di mira mi bai Hulanda. E ora nan a pensa cu nan lo a logra pa no topa mi. Lamentablemente, mi tin cu desapunta nan. Mi ta aki ainda i lo keda aki semper. Mi ta keda tras di mi principionan, normanan i balornan. Ki ta un hende sin nan? “A man who stands for nothing, will fall for anything” - Malcolm X. (“Un homber cu no ta para pa nada, lo cai pa tur cos.”)

Un colega cu mi ta aprecia a bisa mi cu e a lesa mi articulo cu a yama "Un carta scirbi na man", i despues a desidi pa skirbi un pa mi tambe. Wow! Super simpatico i esaki lo sigur bira un carta cu lo mi conserva i lo mi lesa atrobe di bes en cuando.

“Michel bon tardi,

Esaki ta un carta skirbi na man. Colegio San Augustin ta bay perde un bon colega y un bon hende. Un hende cu ta percura pa detaye. Detaye pa cada persona. Esey ta di aprecia. No solamente pa loke ta trata e parti humano, pero tambe contenido. Bo lesnan ta riba nivel. Un ehempel ta cu bo a duna un tour den San Nicolas na un universidad di Hulanda. Klas 4 a participa. Hopi exito na bo scol nobo y keda semper un bon hende y colega.”

Saludo nan i tur colaboradonan cu a hasi e añanan cu a pasa na Colegio San Augustin un tiki mas facil i agradabel. Danki hopi pa e poster di despedida cu tur un di boso a scirbi algu dushi pa mi. Lo mi bai enmara esaki i no lo lubida boso nunca. A tuma un desicion dificil, pero ta e desicion corecto pa sigui mi caminda riba e manera corecto. Nos lo mantene contact. Tur cos bon pa boso tur! Saludos!!