Privacidad durante carnaval na Aruba

Despues di un periodo di carnaval, e siman aki cu diaranson di shinishi e temporada di cuaresma a cuminsa. Carnaval ta un di e festivonan mas grandi na Aruba, unda hende ta goza di e parade colorido, e musica y e cuminda. E aña aki cameranan a ser instala na e ruta di e parade. Asina por a detecta conducta malo y tur otro tipo di interupcion y por a tuma accion necesario. Lo ta un speranza cu e imagennan aki ta ser usa solamente pa obhetivonan specifico. En general, un gran parti di e comunidad no tin nada pa sconde durante un parade. Ta un bon iniciativa si ta trata di seguridad durante carnaval. Aunque e privacidad di un parti di e comunidad ta ser sacrifica pa seguridad.

Mi mester a pensaun momento riba e programa di television"Big Brother" cu a cuminsa na Hulanda desde 1999, unda un grupo di hende a keda hasi prisionero pa algun luna den un cas y a wordo sigui door di camera’s henter dia y anochi. Na e tempo ey, algun experto tabata mira e programa aki masha negativo. Pasobra esaki por tin un impacto psycologico of emocional. Awendia nos ta wak esaki manera algo normal. Awendia nos ta cambia nos privacidad mas lihe pa mas seguridad. E nomber "Big Brother" a wordo inventa door e frase "Big Brother is watching you" den e buki 1984 di George Orwell, unda un comunidad ta wordo controla door di un "Big Brother".

Aunke tabata suficiente camera na e rutananan di Carnaval, ainda tabata tin hopi polis na trabou. Polisnan cu mester a arresta diferente hende. Bo a nota cu den un situacion di arresta un hende, tin mas of menos sinco pa ocho polis na trabou na Aruba? Esaki ta funcional suficiente? Of ta un manera pa hasi mas ora di trabou? Sea cua manera, e polis di Aruba ta mustra cu nan ta serio cu nan trabou di trata diferente problema den e comunidad. Nos mester duna nos sosten na e polis pa garantisa seguridad riba caya.

Hopi preocupante ta cu den temporada di carnaval hopi hende ta bebe mas cu nan mester y despues nan ta bay tras di stuur. Esaki ta forma un gran peliger pa nan mes y otro hende. Mi no sa si esaki ta debi cu e influencia di e comisario nobo di polis of no. Pero e aña aki mi tabatin e sentimento cu polis a duna mas atencion pa trata cu maneha bou influencia di alcohol. Segun e medionan di informacion di Aruba, den e gran parada di San Nicolaas a detene 15 hende pa maneha bou influecsia di alcohol. Esaki ta un resultado impresionante y ta mustra atrobe cu polis di Aruba ta tuma nan trabou serio si trata di seguridad di e hendenan riba caminda.

Tur biaha nos mester tuma responsabilidad como ciudadano y asegura cu nos no ta subi dilanti stuur si nos a bebe mucho. Dor di traha hunto nos por asegura cu e caminda ta keda segura pa tur hende, tanto durante carnaval como durante henter e aña.

Tambe e media tin un rol crucial den nos comunidad. Nan tarea ta pa informa nos tocante suceso y desaroyo den nos sociedad. Pero si cu nos por conforma riba esaki. Desgraciadamente mi a nota cu ta mas frecuente cu hende cu ta involve den noticia, manera crimen, accident of scandal, ta hanja hopi atencion di prensa. Por ehempel, manera e control di alcohol di e siman pasa, unda prensa tabata filma of hasi foto di tur hende, sea cu bo a kibra lei of no.

Riba caminda publico, bo tin privacidad. Pesey ta importante pa reconose cu tur hende tin derechi na privacidad, incluyendo e hendenan cu ta involve den noticianan. Ta forma parti di nos derecho fundamental. Sinembargo, e imagen nan cu ta ser publica por ta un forma di libertad di expresion. Mientras cu bo por filma riba caminda publico, e imagennan no ta automaticamente adecua pa publicacion si hende ta ser reconoce. Publicacion por ta un violacion di privacidad. Asina cu tin dos parti cu ta contra otro. Cada parti tin un derechi importante. Den cada situacion, mester evalua cu argumentonan pa y contra, si ta hustifica pa filma of pa proteha e derecho na privacidad.

Por ehempel, ta posibel cu e media ta bin cu informacion falso of informacion cu ta cai for di contexto, cu ta resulta den hende inocente ta wordo acuza of condena sin motibo. Den algun caso, publicacion di e tipo di informacion aki mes por alcansa na herida personal, menasa di seguridad of hasta perdida di trabou of entrada.

Pa es motibo ta di importancia critico cu e media y prensa tuma nan responsabilidad y ta conose e consecuencianan di nan accionnan. Mi no sa si tin reglamentonan pa proteha privacidad di hende na Aruba y pa asegura cu e media y prensa ta realisa nan responsabilidad. Pero en algun caso, por ta necesario pa implementa leynan pa proteha privacidad di hende. Un lei di media claro por ta util. E ta hopi bon cu nos no ta mira e imagennan mas, caminda victima den un accident ta wordo indentifica na Aruba. Por ta door di criticonan for di comunidad contra e media e media a siña.

Pa resumi, proteha privacidad di hende mester ta un prioridad pa e media y prensa. Door di ta conose e impacto di nan accionan y sigui reglamentonan den lei, nan tin un rol hopi importante den proteha privacidad y seguridad di hende cu ta den un evento di noticia. Tambe, e polis y personal di cuido mester por realisa nan trabou sin obstaculo di e media y prensa.