Post Aruba y Setar

Desafortunadamente, den e ultimo lunanan mi a tende di varios persona tocante e desempeño pober di e servicionan di Post Aruba y e atencion na cliente di Setar, e compania di telecomunicacion na nos isla. E kehonan tocante e servicionan di post ta inclui retraso, post perdi y falta di profesionalismo. Den e caso di e compania di telecomunicacion, e kehonan ta enfoca mas riba e atencion na cliente. Esaki no solamente ta frustrante pa e consumidornan cu ta depende di e servicio aki, pero tambe pa e empresanan cu ta depende di e servicio aki pa nan actividadnan diario.

Lo mi kier uza mi propio experiencia como ehempel. Algun tempo pasa, mi a manda un pakete chikito via post. Na e oficina di post, awendia bo mester duna bo pakete habri na e balie. Tur articulo mester wordo mira y pisa uno pa uno. No tin ningun privacidad. Ta parce manera nan a bira oficial di investigacion en bes di trahador di post. Ta posibel pa haci esaki? Ta autorisa pa haci esaki? No ta contra ley? Despues di control, nan ta pidi pa bo mes, cu bo mes medionan, sera e pakete. Despues di paga e costonan, Post Aruba lo percura pa manda e pakete. Awo mi a siña for di e experiencia aki di no manda paketenan chikito via post mas. Laga afo pa manda post pa exterior.

Desde dialuna 7 di februari, mi mayornan a ricibi un carchi di Pasco for di Hulanda. Ora cu mi a puntra e remitente ki dia el a manda e carchi aki, el a bisa cu esaki tabata un siman prome cu Pasco. Bastante laat bo por bisa. E splicacion di Post Aruba tabata cu nan tin poco personal y no por entrega post riba dianan estableci. P`esey mi a perde e afschrift di Setar. Resultando cu mi mester a paga un multa debi na e servicio di entrega di post.

Mi a haya keho den e periodo aki tocante e multa halto cu ta wordo impone pa e compania di telecomunicacion Setar na Aruba. Hopi hende ta sinti nan mes trata inhustamente, pasobra nan ta haya multa. Na nan punto di bista sin cu nan tin culpa di esaki. Algun hende ta paga nan recibo na tempo tur luna. Si bo ta laga paga e recibo laat, e siguiente luna lo cobra bo un multa di 16 florin (aproximadamente 8,29 euro) adicional. Esaki tambe ta aplica si bo a paga un parti di e suma total. Tambe lo cobra bo 16 florin. E splicacion di Setar ta cu e sistema ta wordo programa pa cobra e suma automaticamente despues di e fecha final. Lamentablemente esaki no por wordo cambia. Mi no ta un programador, pero logica ta bisa mi cu cualkier programa di software, cu tur su tecniconan moderno, por wordo adapta. Y unda e suma di 16 florin ta basa riba dje? Sea cu ta trata di consumidor cu of sin "MiSetar", specialmente pa esnan cu a paga nan recibo conscientemente of sin duna cuenta, ta sinti nan trata inhustamente.

Debi na e suceso aki y tambe pasobra ainda mi no a haya un post di Setar, mi a cuminsa cuestiona si mi a paga mi ultimo recibo di Setar caba. P`esey mi a bay un di e filialnan di Setar pa controla si mi a paga e ultimo recibo y si no, cuanto mi lo mester paga. Afortunadamente mi tabata na tempo ainda pa paga e ultimo recibo. Ora mi a puntra pakico mi no a haya e recibo via post, e trahadornan di Setar a bisa cu nan ta manda nan post na tempo tur biaha. E problema lo mester ta na e oficina di post.

Pa mi sorpresa, un dia despues, via post, mi a haya mi ultimo recibo di Setar finalmente. Net un dia prome cu e fecha final pa paga e recibo aki. Interesante tabata e hecho cu riba e recibo cu mi a haya via post, e suma no tabata corecto. E suma a subi cu 1 florin. Asina mi a paga 1 florin menos e dia anterior. Algo no ta bon. No lo ta asina cu paga online ta bira mas costoso asina?

Door un yamada telefonico na 114, mi a haya informacion di Setar helpdesk cu tur cos a wordo paga completamente. Aparentemente mi a paga un biaha un florin di mas y p`esey mi mester paga un florin menos awo. Mi a haya esaki straño. Lo por tin un eror di mi parti? Ademas, mi a paga e ultimo recibo tambe na un establecimento di Setar y nan no a informami tocante esaki. Awo mi ta spera cu lo no ricibi un recibo unda lo mester paga un boet, pasobra no a paga tur cos. Mi ta curioso...

Dor cu mi mayornan ainda no tin un "MiSetar", mi a crea un account pa nan y mi a ricibi un email riba 11 di februari cu e detayenan di inicio di sesion. Ora mi a log in y mi a mira e dos ultimo recibonan, Setar a cobra 16 florin. Asina ta cu mi mester bai bek na Setar. Mi ta curioso cu esaki ta e multa di luna pasa. Despues a sali na cla cu esaki ta e multa di dos luna pasa, caminda nos no a ricibi un post di Setar. Asina ta cu mi mester warda ainda si mester paga un multa pa luna di januari.

Pues ta importante pa semper controla bo recibonan bon. Miho via "MiSetar", pasobra post no ta yega tur ora na ora. Talbes algun consumidor ta laat. Pero den algun caso e consumidor no sa pakico mester paga un boet. Mi ta kere cu e compania di telecomunicacion mester informa e consumidor miho y mas prome. Asina mes bo ta wordo señala como un persona cu no ta paga, mientras cu bo a paga parti di bo recibo. E consumidor mester wordo informa miho pa e por paga ainda. Control`e tur luna bon, pa no bin haya sorpresa despues.

Tocante e servicio di entrega di post, ta tempo pa seriamente mira e problemanan y traha riba solucionnan. E oficina di post mester tuma responsabilidad pa e problema cu nan ta causa y traha riba un plan pa solucion'e. Esey ta nifica cu mester pone mas recurso pa sigura cu e post ta wordo entrega na ora y pa e consumidor tin e siguridad cu nan post ta wordo manda sigur y confiabel. Gobierno mester tuma su responsabilidad y sigura cu tin suficiente recurso pa postkantoor pa trata e problema aki. Por ehempel, inversion extra den tecnologia moderno y diferente training pa personal. Servicio pa cliente mester wordo mehora grandemente.

Finalmente, importante pa menciona cu un entrega di post eficiente ta crucial pa nos sociedad y economia. Tambe companianan di telecom ta hunga un rol den esaki. Mester sigura cu e cliente ta wordo informa bon tocante reglanan y derecho, pa cliente por ricibi un trato husto. Si ni empresa ni cliente por conta riba un entrega di post confiabel, esaki lo resulta den interupcion den economia y un reduccion den confiansa den servicio. Ta tempo pa tuma accion y sigura cu entrega di post ta bek riba caminda corecto.