Politica bieu talbes ta keda tras di lomba?

Despues di dos aña di goberna realmente, hende ta ser arresta den e caso "Avestruz". Ta e gobierno of nos husticia ta despierta awor? Of ta e momento adecuado pa haci tur esaki awor? Ta algo cu mester wordo resolve mesora? Nos ta lubidando awor e problema grandi di abuso di mucha? Un problema cu nos ta prefer di no mira. 

No tabata cu na cuminsamento di e campaña anterior un ley por a wordo haci den seis minuto pa protehá mucha mas? Si a tuma algun accion door di e gabinete, pero tabata esaki suficiente? I con ta cu e sitio di bira santo? E tambe ta un problema cu te ainda no ta wordo resolvé. Mi no kier bisa cu e gabinete di demisionario den e añanan aki no a logra nada i a keda sintá bon riba nan sillonan.

Riba papel ta cuater aña di goberna, pero e gobierno aki a haya e oportunidad pa goberna realmente? Nan a cuminsa net ora cu Aruba a keda den un crisis financiero i social. E tabata tur prome cu e periodo di corona. E prome aña di goberna ta keda atrapa den e presupuesto di e gobierno anterior i ta ocupa cu sanear, pues ta haci poco invershon. Ademas e ministerionan, cu ta presenta nan presupuesto desea na minister di finanzas, ta determina e presupuesto final na cada ministerio. Aki tur ministerio mester pensa bon kico ta nan prioridadnan i kico nan lo uza e placa pa. Bo no por gasta e placa dos biaha. Si e gobierno a logra hinca un plan di crisis caminda 36 miyon a ser usa pa esaki. E gastonan di gas, awa i luz a ser baha. Asina hogar a haya un bahada di dies porciento i pa sector di agricultura un bahada di cuarenta porciento. Hopi biaha a negosha cu Hulanda pa mehora e situashon di Aruba.

Prome cu bo por goberna realmente, un virus ta destrui tur cos. Atrobe no tin suficiente tempo pa cumpli tur e promesanan cu bo a haci. I precisamente e promesanan aki ta importante, caminda algunnan a base nan eleccion pa un partido riba esaki. Nan ta desapunta awor i ta pensando pa duna otro voto pasobra nan deseonan no a ser cumpli. Durante e crisis di coronavirus a duna subsidio na empresanan manera hotel pa por sigui paga salario. 

Bintiun mil hende a haci uso di esaki i asina a logra keda cu nan trabou. Durante tempo di coronavirus nos a ser informa bon. Si nos mira otronan paisnan rond mundo, Aruba a haci esaki bon. Di e poblacion total, cincu-cinco porciento a ser vacuná i gobierno kier mira esaki subi na ocho-cinco porciento. I tambe e luna aki gobierno ta ocupa cu determina kico ta haci cu e refineria di petroleo.

Awor cada partido ta necesitando nos atrobe i nan tur ta haci nan mes oír. Ken ora nos lo tin un eleccion sin bandera i sticker? Ta importante ainda pa durante conduci mustra kico ta bo preferencia politico. Mi ta nota cu e sticker den mayoria di caso awor ta hopi chikito compara cu e añanan anterior. Of esaki lo cambia? Tambe e banderanan ta menos importante awor. Ta mirando un trend completamente nobo? Cu mayoría di hende awor kier mira un manera completamente diferente di campaña? Cu sticker i banderanan no ta di e tempo aki mes i mester mira con e candidatonan ta presentá nan mes i kico nan ta representá realmente?

Of por ta tin algo tras di esaki cu hopi hende no kier pone bandera na nan cas? Bo por ta ainda hopi fanatico pa un partido si un parlamentario ta haya sosten completo di su partido, mientras cu e ta sospechoso den un investigacion? Con por ta posible esaki? Of hendenan ta prefera di no mira esaki? Talbes esaki ta duna nos e oportunidad pa goberna completamente nobo cu hendenan jong i motivá cu por papia e lenga di pueblo i tambe realmente integro. Por papia di dje, pero haciendo algo ta un historia completamente diferente. Cu nos por keda convencí door di nan discursonan di loke e candidatonan kier haci cu Aruba i cambio cu nan kier trece aden. Cu awor nos no por bishita casnan mas door di corona pa asina haci nos idea conoci, loke algun partido ta gusta haci ainda. Nos ta mira cu politiconan awor masalmente ta tuma contacto cu mundo digital i ta gusta di wordo entrevista door di tur hende, pa asina nos por mira esakinan bek tranquilamente via internet na nos propio tempo. I despues di un discurso e candidato por hasta laga cay un microfon imaginario of cometé un eror di felis aña envez di happy birthday.