Pa husticia

Mi mester a pensa bek riba e conseho cu mi a duna na e tempo ey. Specialmente na momento cu Peter R. de Vries a wordo tira abou y despues di su fayecimento a tene un recuerdo pa dje. Na prome lugar mi no a tene tanto cuenta ken e persona Peter tabata, pero despues di tur loke mi a tende, mira y lesa, si ta un persona cu mi a haya hopi aprecio pa dje. Specialmente ora el a duna un discurso na 2016, ora el a bira numero uno den e top 100 colorido. Felizmente ainda por mira esaki riba Youtube. Mi no tabata sa cu el a tatua e citacion di Edmund Burke riba su hombro drechi. Mi a profundisa mas y mas den e persona Peter y tur biaha mi tabata sorpresa cu e manera cu el tabata biba. Desde hopi tempo mi ta puntra mi mes si mi mester a duna atencion na esaki den un di mi columnanan. Pero mi mester a haci esey. Mi mester a duna e un luga y no por a laga mi opinion/pensamento pasa desapercibi.

Idónan manera Peter R. de Vries, Charlie Chaplin y Boy Ecury ta personanan cu mi ta admira so. Charlie Chaplin tabata un persona cu tabata dilanti di su tempu. Un hende cu den su tempu caba a mira cosnan pasa unda e tabatin un opinion riba dje y unda nos ta confronta cu ne ainda awe. Un figura sin tempo. Sigur durante su discurso final den e pelicula "The Great Dictator". Boy Ecury a inspira mi desde chikito. Un hende cu tabata den resistencia pa lucha contra injusticia y libertad di tur Hulandes den Reino di Hulanda. Pues no solamente pa Hulanda, pero tambe sigur pa Antia Hulandes unda Aruba tabata un parti di dje. Un hende cu na 22 aña di edad caba tabatin e curashi pa no cedi contra injusticia. Cu no a haci diferencia entre grupo di poblacion. Cu mesun anochi final el a bisa su compañero di cell cu e lo muri cu un sonrisa riba su boca. Sigur un persona cu nos no mester lubida nunca. Nan ta personanan cu a camina un ruta diferente den historia y pa e motibo aki a scirbi historia. Personanan cu ta determina pa ta diferente cu e otro. Cu tin un conviccion y ta para pa algo. No solamente mester pensa riba e tres personanan aki, pero tambe tin otro cu sigur ta para pa algo y ta recorda nos cu nunca, nunca nos mester ta esclavo di ningun hende.

Mi tin un cantidad di respet pa personanan cu ta diferente. Cu no ta sigui e gran cantidad, pero mas bien ta scoge nan caminda pa hasi e cosnan corecto. Personanan cu hopi biaha, sin hopi sosten, mester camina un caminda solitario. Cu no ta kere pa wordo mira como no popular pa otro. Personanan manera entre otro Eddie Edwards, Walraven van Hall, Dr. Bennet Omalu y e siete manifestante cu despues di nan manifestacion anti-guerra di Augustus 1968 na Chicago (The trial of the Chicago 7) a wordo acusa, cu pesey a keda kere den nan mes y no a laga nan mes desanima. Personanan cu a logra nan rason pa medio di nan determinacion. Asina mi por menciona hopi mas, pero ainda no ta suficiente. E mundo lo ta mas bunita si tabatin mas di e personanan aki.

Mi no kier comparami cu e personanan aki. Mi mes ta hopi humilde pa esey. Mi no kier bisa cu mi semper sa mehor y cu mi semper ta na e banda corecto. Tambe mi tin momentonan cu mi kier ta calla y no tin curashi pa tuma accion. Pero pa medio di mi conviccion religioso y e manera cu mi ta biba awendia, mi ta trata di biba di e mihor manera posibel na e manera cu mi idonan a biba y awor mi kier tuma accion contra injusticia. Talbes tur di nos mester ta asina den bida. No mester bai grandi pa e cos aki, pero tambe e cosnan chikito por contribui na esey. Cu nos por ta mas confiado y no tin miedo di loke otro ta pensa di nos. Cu hende por bisa simple y cla loke nan ta kere di algo. Awendia mi tin mas respet pa hende cu tin curashi di bisa e berdad enbes di kier mentira y papia tras di lomba di otro. Algun sa cu nan ta fout, pero no kier tuma responsabilidad pa esey. Nan ta sconde enbes di bini dilanti. Y e personanan aki ta irrita nan mes hopi si bo papia cu nan riba esey. Mi no tin gana pa un obra di teatro, simplemente para pa algo! Asina mi ta recorda e momento cu mi tabata den un reunion y un hende durante e conocemento a bisa na tur di nos: "E confiansa cu mi ta duna bo ta inversamente proporcional na e manipulacion cu bo ta aplica riba mi". Esaki a haci mi pensa? Ki e ta kiermen cu esey? El a bisa cu e kier a simplemente haci algo interesante, pero no ta bisa esey asina mes.

Mi ta spera cu e hobennan di awendia tambe por wordo inspira pa diferente personanan den historia. Cu nan desaroya un forma di independencia y un opinion propio pa nunca mester ta esclavo di otro hende. Finalmente mi kier termina cu un declaracion door di Peter R. de Vries durante su entrevista cu Theo van Gogh na 1997, ora el a bay como invitado pa e programa di AT5 - Niets nieuws:

“Je hebt een soort overtuiging. Je staat ergens voor. En dat irriteert heel veel mensen dat je dit doet. Je staat niet voor recht en orde. Je staat voor rechtvaardigheid. Het niet tegen kunnen als het gezag waar iedereen op zou moeten vertrouwen zelf niet deugd, manipuleert en liegt en bedriegt. Op het moment dat ik dat merk dan ben ik niet te stoppen.”

("Bo tin un sorto di conviccion. Bo ta para pa algo. Y esey ta irrieta hopi hende cu bo ta haci esey. Bo no ta para pa ley y orden. Bo ta para pa husticia. No por soporta ora autoridad cu tur hende mester por confia den dje mes no ta digno, ta manipula y ta mentira y ta engaña. Ora mi mira esey, mi no por para.")