"One way wind" (Papiamento)

Ora bo a bishita e isla di Aruba, bo a mir'e sigur. E palo di Watapana. E Watapana ta un palo hopi conoci na e isla. Algun hende no ta consciente cu Watapana y Dividivi ta e mesun palo. E fruta di Watapana ta yama Dividivi. P'esei pa algun Watapana ta conoci tambe como Dividivi.
 
Aruba ta rico den planta y palo bunita cu ta unico. E palo di Watapana sigur ta un di nan. E ta un di e palonan mas bieu y ta hunga un rol hopi importante den medio ambiente. E ta brinda sombra y cuminda pa e bestianan local. E palo aki no solamente ta importante pa e ecosistema y e cultura di e isla, pero tambe ta un parti masha sobresaliente den nos naturalesa. Asina e palo aki ta crece cu direccion di e biento, cu ta brinda cu ta brinda aire fresco y asina e ta haya su beyesa. Na Eagle Beach (Aruba) e palo aki ta wordo fotografia door di hopi turista y algun tin un bunita pintura di canvas di e palo aki na cas, cu hende a cumpra for di Ikea. Algun aña pasa e palo aki a wordo daña door di vandalismo, pero felizmente nan a logra salb'e.
 
Durante e prome dia di e bishita di Rey Willem-Alexander, reina Maxima y princesa Amalia na Aruba, prome Ministro Evelyn Wever-Croes a ofrece un regalo. E tabata un Watapana di oro diseña door di artista Ciro Abath. Un simbolo pa Caribe y un compas natural. Cu e diseño aki un texto adecua a wordo agrega:
 
“Door de wind verbogen en gevormd doch diepgeworteld en standvastig zoals de strijdbaarheid van de Arubaanse bevolking.” - De Regering van Aruba namens de Arubaanse gemeenschap (Aruba, 30 januari 2023)
 
Watapana ta un tesoro ireemplasabel pa Aruba y ta nos responsabilidad pa proteha esaki na e miho manera posibel.
 
Den añanan '70, e grupo musical The Cats tabata un di e gruponan Hulandes mas exitoso. Pa 7,50 florin Antiano, bo por a mira e presentacion di The Cats na Centro Pro Arte na Corsou dia 29 y 30 di April 1970. Na Aruba e banda a keda inspira ora nan a mira e Watapana y Arnold Mühren a skirbi "One way wind". Esaki a bira un di nan exitonan mas grandi. Un cancion clasico cu ainda ta popular cerca esnan cu conoce y a wordo canta na hasta 150 diferente manera.
 
Den 1974 "One way wind" a wordo uza como himno di e seleccion Hulandes durante e campeonato mundial di futbol na Alemania. Coach Rinus Michels probablemente tabata draai e cancion den e bus di e hungadonan prome cu cada wega, pero dia di final e cassette a disparce. Talbes esaki tabata un señal cu nan no por a logra e titulo mundial.
 
Aunke e no tin un interpretacion exacto di "One way wind", e canalisacion pa interpretacion a sigui exsisti. Algun hende lo bisa cu e cantica ta bay tocante un storia amoroso. Pa mi tambe e tin un mensahe fuerte. Pa mi, "One way wind" ta toca e cambionan y inseguridad den mundo y pa busca speransa y direccion. E ta describi e dificultad pa tuma e decisionnan corecto y responsabilidad pa accion y haci (trece cambio ta zona mas miho) cambio. E letra ta relevante y actual, sin importa e tempo y luga.
 
E ta apela pa, manera e palu di Watapana, mustra direccion den mundo. Pa mediante di historia profundo determina futuro. Pa asina tuma responsabilidad pa nos accionnan y haci mundo miho. Ainda esaki ta un topico importante y urgente, tanto den politica como den nos bida personal.

"One way wind" ta un cantica cu no ta muri y por tin un influencia riba hende y transmiti un mensahe fuerte. E ta un yamada pa ta consciente di nos accionnan y responsabilidad y pa traha hunto pa crea un futuro miho. Laga nos sigui inspira pa e cantica aki y su mensahe.