Misa di Aurora

Misa di Aurora ta un tradicion for di nos paisnan mericano bisiña. Na e ora di alba nan ta tene e misanan di mainta aki y nan ta destina pa prepara pa e yegada di Hesus. E ta un forma bunita pa cuminsa e dia. E ta haci bo para keto pa piensa riba nos bendicionnan y gradici pa bida y e oportunidadnan cu e ta ofrece. Por ta un fuente di paz interno y tranquilidad. Pa yena nos curason cu amor y pa asina prepara pa e ambiente di Pasco.

Diadomingo, 18 di december 2022, riba e di tres dia di Misa di Aurora, mi mayornan, ruman y ami a dicidi di bishita e iglesia di Brazil e biaha aki. Ta un rato caba cu mi no a haya e oportunidad di ta presente na un servicio den e iglesia aki. Un di e ultimo biahanan tabata ora cu pastoor a bisa cu mester disolve nos matrimonio. Mi no por a kere, cu e por a gaña riba esaki?

Pa un rato caba mi tabata pensa riba kico mi siguiente column lo mester trata. Talbes riba e Copa Mundial di Futbol na Qatar? Tin cierto eventonan historico aki cu por wordo describi. Manera e final espectacular entre Argentina y Francia. Of e logro di e team Marrocano. Of e prome arbitro femenino, Française Stéphanie Frappart, kende a sopla e wega excelentemente durante e wega di grupo Costa Rica - Alemania. Of mi siguiente column mester ta riba un topico hopi discuti awendia? Riba e apertura di matrimonio civil na Aruba pa parehanan di mesun sexo? E predicacion di pastoor di e iglesia di Brazil a duna e contesta. Aparentemente mester a sosode asina.

Durante e servicio di iglesia, e pastoor a cuminsa su predicacion sincero caminda hopi “macho” homber na Aruba a haya un espiel dilanti y el a pone e hombernan den un luz falso. Asina el a bisa cu e “macho” homber aki na Aruba no ta tuma su responsabilidad. Si, el a casa, pero ademas el a haya relacionnan extramatrimonial. Mi mester a pensa riba un conversacion cu mi a haya cu algo. Asina e persona a conta mi cu e no por a kere cu tin homber na Aruba, cu durante e temporada di Cuaresma, nan ta abstene nan mes di alcohol y ta abstene nan mes di otro cosnan. Pero na mes momento nan ta haya relacionnan extramatrimonial. E a haya esaki hunto cu mi bastante hipocrita. Y no malinterpreta mi. Claro cu ningun hende ta perfecto y nos tur ta pecador.

Segun e pastoor, e hombernan di awendia mester tuma e ehempel di Jose, kende a compromete cu Maria. Ora Jose a tende cu Maria tabata embarasa, el a kier a divorcia di dje discretamente, pero e angel a aparece y a bisa cu no el, pero e spirito santo a crea un yiu. Jose mester a keda cu Maria y duna e yiu e nomber Jesu. Jose a tuma su responsabilidad, pa algo cu no tabata di dje. Den e mundo aki, siguramente lo a mira e situacion diferente. Kico homber lo haci esaki awendia? Segun e pastoor, e hombernan mester tuma responsabilidad den nan accion y defende nan normanan y balornan cu den fe den Dios ta importante. Mi por sigur haya mi mes den esaki.

Pero mi mester bisa cu no semper ta trata aki di tur homber. Tin sigur homber cu ta sincero den nan fe cu Dios y nan pareha. Cu ta tuma nan responsabilidad y ta mustra nan amor na nan pareha na e forma corecto. Tambe tin algun muhe cu no ta haci caso di esaki. Cu malhela ta eligi di laga nan responsabilidad y normanan y balornan cu nan a ricibi di Dios bandona. Buscando nan propio felicidad y libertad, na tur costo.

Aunque mas muher ta lesa mi columnanan, e ora aki esaki ta un columna cu un mensahe pa e homber Arubiano. Ta parce cu loke no ta normal, awor ta parce normal. Cu hende ta casa pa iglesia pa motibo di costumber y/of tradicion y un gran parti di e hombernan ta haya relacionnan extramatrimonial. E ta laga su muher  y yiunan atras y no kier tuma responsabilidad mas pa nan. Asina e ta haya e libertad di un soltero atrobe. Kico tipo di homber bo ta? Of ta e “macho” cultura cu awor ta mira como normal na Aruba?

Ta conta e fe “Catolico” realmente? Of ta solamente un tradicion pa ta Catolico? Unda bo no mester sigui e reglanan den iglesia tur ora? Si e fe “Catolico” no ta importante mas. Pakico nos ta hasi asina dificil pa habri matrimonio civil pa parehanan di mesun sexo? Por ta cu ta permiti relacionnan extramatrimonial, pero no un amor entre dos persona di mesun sexo?

Mi ta kere ainda cu no ta asina facil pa casa. Y sigur no pa iglesia. E ta un convenio cu bo haci cu Dios y bo casa. Pa amor cu bo tin pa bo pareha y respet pa Dios. Cu den bon y sigur den mal momento bo ta sostene otro y kier yuda otro pa saca e mihor di otro den un relacion y pa e motibo aki sinti uno. E ta trece cierto responsabilidad cu ne. Manera ora di haya yiunan. E balor di un matrimonio no ta importante mas pa hopi hende. Tambe pa e hombernan of muhernan cu sa cu un persona ta casa, e respet pa e matrimonio a cay y ta purba di seduci e homber of muher casa pa kibra su/su responsabilidad. Nos no tin mas respet pa otro? Of mas importante, nos no tin mas respet pa e Creador? Of mi ta naïf atrobe?

Mi no por a kere cu e mesun pastoor, unda e a bisa cu indirect mi no mester tuma mi responsabilidad, awor ta papia diferente. Pesey awo mi tambe no ta kere cu el a bisa esey. Den un temporada hopi largo mi a pensa riba un pregunta di con e no por a conta mi honesto y sincero riba su accionnan. Y cu e mester a gaña tur ora riba esaki. Cu otronan a sostene y a duna su conseho robes. Awe e pastoor a duna mi un contesta riba esaki tambe. No ta trata di mi, pero justamente pa esunnan cu ta sinti e vacuidad aki. Un vacuidad cu ningun hende por yena na forma corecto. Solamente Dios por brinda e solucion pa esaki.