Mexican muhernan ta kibra baricanan den un cultura machista

Dia di Bierna Santo y ora di scirbi e column aki riba Sabado, mi tabata scucha musica Ranchera. Mi a keda impresiona extra door di cantantenan Angela Aquilar y Lupita Infante di Mexico, cu a wordo recomenda pa mi. Dos muhernan cu den nan hopi clipnan ta presenta nan Ranchera cu pasion cu nan stem. Cu e hopi detayenan kostumber Mariachi y e sombreronan corecto.

Desde temprano edad mi a haya contacto cu musica di Mexico. Algo raro, pasobra na Hulanda, caminda mi a crece, no ta scucha esaki facil. Pero specialmente door di mi tata y conocirnan di mi mayornan mi a haya contacto cu Ranchera, musica tradicional di Mexico. Mi por a recorda cu nos tabata bay algun biaha na e equipo di beisbol Quick na Amersfoort. Caminda hopi hungador Antillano y Arubano tabata den e equipo y nan a logra pa Quick experimenta su dianan glorioso. Mi por a recorda exactamente e momentonan cu despues di un wega den e cantina despues di un BBQ ameno tur hende a reuni. E tabata e momentonan cu mi tata a trece su guitar pa toca y algun Ranchera a wordo canta. Specialmente na cas di conocirnan Ranchera musica tabata wordo toca.

Durante decada di 1940 te 1950 hopi hende na Aruba a crece cu Danza, Joropo, Bolero y Mariachi. Nan conoce hopi artista Ranchera di Mexico y nan tabata e superstar nan di awendia den nan juventud. Artistanan masculino Mexicano manera Pedro Infante, Javier Solis, Vicente Fernandez, Jose Alfredo Jimenez, Jorge Negrete y Miguel Aceves Mejia tabata frecuentemente esnan cu tabata domina e musica Ranchera. Despues artistanan manera Pepe Aguilar, Juan Gabriel y Alejandro Fernandez a bin tambe.

Tambe tabatin artista femenino manera Maria de Lourdes, Ana Gabriel, Lucha Reyes, Aida Cuevas, Chavela Vargas y Lolo Beltran, pero na e principio tabata e artistanan masculino cu tabata domina. Aunke awendia tin desaroyo nobo relaciona cu cantantenan femenino den Mariachi, muhernan no a keda parado. Den 1903 Rosa Quirino ta registra como e prome muher cu a toca den un banda di Mariachi. Den 1948 a sali e prome banda di Mariachi femenino, Las Adelitas y den 1967 e prome na Merica, Las Rancheritas. Ta yega na e punto cu hasta den Mariachi tempo no a keda parado, pero desde 2015 awendia tin tambe un grupo LGBTQ Mariachi na Los Angeles. Esaki ta causa mehoracion of ta e fin di un cultura halaba? No mester pensa mucho riba esaki.

Mi kier papia di un di e personanan mas popular den historia di Mexico, Pedro Infante. Cu den 2010 a wordo nombracomo e di dos persona mas importante na Mexico pa e ultimo 200 aña door di History Channel. E prome luga a wordo duna na Benito Juarez, presidente di Mexico for di 1858 te 1872. Pedro Infante a nace riba 18 november 1917 na Sinaloa. Den su temprano añanan el a traha como carpintero y asina el a logra haci su mesun guitar. Den 1937 el a canta pa prome biaha y den 1941 el a hunga su prome pelicula "la Feria de Las Flores". Den hopi pelicula el a hunga e rol di Charro, cu hopi comportacion machista. Tambe den bida real Pedro tabatin hopi aventura amoroso. El a casa varios biaha y a divorcia. Den su tempu liber el tabata piloto y den 1947 y 1949 el a tene un accidente di avion. Riba 15 april 1957 su di tres accidente di avion a resulta fatal y el a fayece. Durante su funeral su cancion favorito Amorcito Corazon a wordo toca pa un orquesta di Mariachi.

Su yiu Pedro Infante Jr. a nace riba 31 maart 1950 y a traha como arquitecto despues cu el a gradua na Universidad La Salle. Mesora el a scoge pa un carera como cantante. Den 2009 el a fayece di pneumonia. Su yiu muhe Lupita Infante a studia na Universidad di California na Los Angeles y a haya un diploma den etnomusicologia, un estudio cientifico cu ta studia musica di tur pueblo. E estudio aki a causa hopi compromiso di muhernan jong den decada di 1960 sin a wordo stroba pa cantante Mariachi masculino tradicional. Pa paga su estudio Lupita tabata un chauffeur pa Uber y tambe tabata traha como docente di musica. Ora cu su tata a fayece el a desea, manera su tata, sigui pasonan di su welo. Riba 27 september 2019 su prome album a sali "La Serenate" y e ta contene dieztres cancion tradicional Ranchera.

Cada bes mas e imagen cu solamente homber por canta Mariachi ta desapareciendo. Mas banda di Mariachi femenino ta cuminsa sali y hopi ta purba duna nobo bida na cultura di musica di Mexico. Pero na nan manera poderoso. Cu pasion y entrega e cancionnan ta wordo canta y esaki ta sigura cu e musica cultural aki nunca lo desaparece. Mi mes a experimenta esaki na Aruba tambe. Durante fiestanan cu un grupo di Mariachi tabata e muhernan cu a domina en algun momento cu nan stemnan fuerte y bunita.

Finalmente mi a haya sa cu na 2019 un pelicula comico a wordo haci tocante Pedro Infante. E pelicula aki ta disponibel na Netflix y na mi opinion ta definitivamente loque ta bal la pena. Den spanjol e pelicula ta yama "Como caido del cielo" y den Hulandes por wordo traduci como "Manera caida for di cielo". E pelicula ta cuminsa cu Pedro Infante. Den su bida el a hasi hopi cos bon y su encanto tabata hasi cu el tabata hopi exitoso cu muher. Sin embargo el a ser un rompecorason den hopi momento di su bida y un dia el a fayece y no por a drenta cielo ainda. El a wordo manda bek den cuerpo di un imitador pa mehora su comportacion cu muher. Si esey no logra, e lo wordo manda pa infierno. Mi a goza hopi di e pelicula aki y di awe en adelante lo forma parti di mi peliculanan favorito. Pasobra ta trata e cultura machista, tambe na Mexico no ta keda keda den costumbernan cu ya no ta aplicabel na e tempo aki. E pelicula aki ta un bon ehempel di esaki y ta un recomendacion pa hopi hende.