Kiko nos kier laga tras pa e siguiente generacion?

Por ta e pregunta ta un cu nos no kier preocupa nos cu ne. E generacion mas hoben no ta pensa riba esaki y ta esun cu ta na un edad mas avansa ta precupa pa esaki. Kiko mi a laga pa e siguiente generacion? Pa ehempel, un herencia pa ser nan keri, documenta momentonan specifico pa recorda nan of logra un meta cu por yuda humanidad pa bay dilanti.

Mi mes tambe a haci e pregunta pa mi mes. Mi column y bukinan por ta un inspiracion pa e siguiente generacion? Of nan ta specifico pa un tempo so? Tin un meta specifico? Nos por mira tur esaki awor of nos ta mira e meta despues? En general, nos ta preocupa tocante kiko nos ta laga pa e siguiente generacion. Den mayoria di e caso nos kier tene responsabilidad pa sigura cu nos ta laga e mundo mehor cu e mundo cu nos ta biba awor. Tin hopi caso cu nos por hasi pa logra esaki. Apart di e asunto personal tin tambe asunto general cu nos ta considera importante y cu nos kier laga pa e siguiente generacion.

Prome cu tur cos, nos kier laga un planeta saludabel atras. Comunidad local y bishitante di Arikok, e parke nacional di Aruba, mester ta inspira y involucra pa por mantene naturalesa y herensia cultural di Aruba pa e generacionnan den futuro. Nos mester proteha y asegura cu esaki ta keda mantene.



Di dos, nos kier un comunidad unda tur hende tin e mesun oportunidad. Esaki nifica cu mester lucha pa igualdad di oportunidad di educacion, igualdad di cuido di salud y reparticion di rikesa. Ta importante pa sigura cu tur hende por crece y prospera, independientemente di nan trasfondo of origen. Den caso specifico no semper tur cos ta posibel. Den e ultimo añanan nos a mira na Aruba, pero tambe na Hulanda, cu no tur hende por ricibi oportunidad igual. Den algun momento nos ta experencia "friends and family" parti 2 y “vriendjespolitiek”, caminda otro cu no ricibi e privilegionan aki ta wordo trata na un manera negativo.

Tres, nos kier laga un mundo di paz y estabilidad. Esaki nifica cu nos mester traha riba un mundo unda conflictonan ta wordo resolve di un manera trankil. Dia 24 di februari ta un aña mas cu e guera na Oekraïne ta dura y un solucion trankil entre e dos parti no ta wordo resolve. En bes di papia, hende ainda ta opta pa manda suficiente armamento y material di guera pa Oekraïne. E concurencia di armamento ta parse e unico solucion cu ta continua. Despues di e Guera Frio di antes, e Guera Frio ta continua.

Nos kier un mundo unda hende ta liber pa expresa nan opinion sin miedo di persecucion of violencia. E prome luna di e aña aki mi a ricibi mas di 1000 bishita na mi website. Hopi bon pa mira cu hopi hende a topa mi website. Por ta pa curiosidad of pa interes. Di hopi lesadonan mi a ricibi commentarionan positivo tocante mi columnan y a duna ideanan tocante tema nobo cu mi por skirbi den futuro. Mi kier gradici boso tur pa esaki. Por ta cu esaki por yuda contribui un tiki pa laga e comunidad pensa mas activo. Cu esaki mi por spera stimula hende na Aruba pa solucion, accion of idea nobo. Mi tambe sa cu ainda pensamento critico no semper ta wordo aprecia.

Mi ta mira mi column y bukinan cu mi a publica manera un parti di suceso propio, cu mi ta gusta pa pone na mundo. Mi ta nota cu na algun momento mi tin un perspectiva unico riba e mundo, loke ta causa cu otro ta experencia esaki manera hopi especial. Kisas otro ta detesta esaki. Aunke mi no semper tin e berdad absoluto, mi ta trata di ofrese un aporte basa riba mi opinion personal na bida, opinionnan cu ta bai manera un suplemento riba factonan. Un tiki subhetivo ta inevitabel, pasobra mi, como un hende cu ta skirbi un parti historico, ta aborda e mundo for di su propia consepto y situacion social. Esaki por causa discusion, considerando cu opinionnan por ta mas fuerte of por cambia. Asina cu por siña un di otro y mi, hunto cu otro hende, por experencia un miho bista y cumprencion di e mundo. Oportunamente, e proximo generacion por haña conosemento di esaki y por siña hopi di dje.

Pa termina, ta importante pa realisa cu loke nos ta laga pa futuro no ta depende solamente di nos accionnan, pero tambe di nos pensamento y sentimento. Nos mester siña pa apresia y respeta otro, cu nos diferencianan. Cu nos mester siña pa tuma responsabilidad pa nos accionnan y nan efecto riba otro y riba e planeta. Algo cu no semper ta facil. Si nos ta conciente di e responsabilidad cu nos tin y ta enfoca riba crea un mundo miho, nos por laga un herencia tras cu nos por ta orguyoso di dje.