Hunto nos por logra hopi mas!

Betico Croes tabata un di e lidernan mas influyente cu Aruba a conoce. E ta mas conoci pa su liderazgo durante e lucha pa independencia. A pesar cu e lucha aki a ofrece hopi resistencia, ta un hecho cu e logra uni e hendenan di Aruba y haci nan traha hunto pa un meta comun.

Na Aruba tin un sentido di nostalgia ora di pensa riba e tempo di Betico Croes. Lamentablemente mi mes no a pasa aden, pero e hendenan di Aruba tabata uni fuertemente bou di Betico Croes. Independientemente di nan background, fe, idioma of conviccion politico, tur hende tabata tras di su ideanan. E Arubianonan a mira Betico Croes como nan lider y sosten. Nan a mira su vision pa un futuro independiente pa Aruba como nan meta comun. Tabatin un sentido di unidad, solidaridad y respet. E union entre e Arubianonan tabata asina fuerte cu e habitantenan di e isla tabata mas conecta cu nunca prome. E legado di Betico Croes lo wordo recorda pa semper pa e Arubianonan. E merece e amor y respet di e Arubianonan pasobra e a yuda e hendenan den nan esfuerzonan pa crea un futuro mas mihor.

Contrario na e tempo di Betico Croes, awendia e unidad aki ta parce di a desaparece. Caminda partidonan politico ta aparentemente ta purba solamente pa nan interes di partido y ta mas enfoca riba gana poder y influencia enbes di crea unidad y colaboracion. E lucha pa poder aki a lleva na un ambiente insaludabel di division y rivalidad. Un falta di honestidad y transparencia a causa cu e Arubianonan no ta sinti mas cu nan voto ta conta. A lleva na hopi atake personal negativo entre lider politico, cual no ta bon pa Aruba.

Actualmente tin un brecha creciente entre maestronan y mayornan. Mientras maestronan ta traha duro pa provee nos hubentud di e isla cu un bon educacion, algun mayornan ta parce ta tuma distancia mas y mas for di e proceso di educacion di nan yiunan. Esey ta preocupante, ya cu un bon colaboracion entre maestronan y mayornan ta crucial pa e exito di nos generacion hoben.

Ta comprensibel cu mayornan ta preocupa pa e rendimento di nan yiunan. Nan kier lo mihor pa nan yiunan y kier pa nan slaag den bida. Pero enbes di sostene y confia den e maestronan, algun mayornan ta parce mas dispuesto pa proteha y cria nan yiunan. E por lleva na un falta di disciplina y motivacion pa e studiantenan aki.

Ademas, algun mayornan ta parce tambe ta mas y mas preocupa pa e curiculo y e metodo di enseñansa cu ta wordo usa na Aruba. Enbes di confia den e maestronan y reconoce cu nan tin e conocemento y experticio pa ofrece e mihor educacion, algun mayornan ta parce mas dispuesto pa bai contra di nan decision y trata di influencia e proceso di educacion di nan yiunan. Esey por lleva na confusion y insatisfaccion pa e studiantenan, cual a su vez por lleva na mal rendimento na scol.

Pakico nos no por traha hunto y comunica buscando solucionnan mihor? Y no malinterpreta mi. Mi tambe ta comparti mi preocupacion riba e situacion aki. Mi tambe tin mi dudanan con exactamente un dia di sexual y genderdiversidad mester wordo celebra na un scol. Of mi ta demasiado tradicional pa esaki? Por ta asina cu un mucha homber ta desea di bira un mucha muhe y kier expresa su sentimientonan drentando un toilet di mucha muhe. Loke e mucha muhernan den e toilet lo pensa? Pero mester e conflict aki wordo maneha dor di e mayornan mesora via prensa? Pakico mester bay busca e minister prome cu comunica y bin cu un conversacion cu e scol of e conseho di scol concerni?

Tambe entre e diferente consehonan di scol ta falta colaboracion y kier haci tur cos nan so. Esaki ta duna espacio pa normanan diferente di curiculo, metodonan di enseñansa y examennan, cual no por garantisa e nivel semper y por causa un gran diferencia den calidad. Loke lo no beneficia e educacion y nos lo kier reinventa e rueda tur biaha atrobe.

Mi a nota recientemente cu no semper tin colaboracion entre e diferente organisacionnan cu tin e mesun mision. Aki tambe nan kier haci tur cos nan so. Specialmente durante e temporada di Pasco, diferente fundacionnan ta kier recauda placa of cuminda pa yuda e personanan menos afortuna den nos comunidad. Naturalmente cada ayudo ta necesario, pero hopi biaha sin un sistema.

Mi a keda sorprendi ora mi a haya e oportunidad di mira e archivo di computador di banco di cuminda Fundacion Pa Nos Comunidad (FPNC). Informacion hopi frecuente y statistica preciso, cu por wak den un solo bista, ta trata famianan registra cu ta ricibi ayudo. Semper ta un bon gesto ora diferente instancianan ta mustra iniciativa pa recauda placa of cuminda pa famianan menos afortuna. Pero no ta mihor pa colabora cu un fundacion manera FPNC?

Ta lastima cu e Arubianonan no ta sinti ni conoce e unidad y solidaridad di e tempo di Betico Croes mas. Ora partidonan politico, scolnan y mayornan, organisacionnan cu e mesun meta riba Aruba uni nan forsanan y traha hunto atrobe, nan por restaura e unidad y un futuro positivo pa Aruba.

Mi ta di opinion cu riba un isla manera Aruba nos ta kier biba riba diferente islanan y nos ta kier haci cos nan nos so na momentonan specifico. Y aki no ta solamente politica ta e cuestion. Ora cierto bon proyectonan ta wordo stop, si un gobierno nobo kier drenta. Aki ta papia di un vision corto di termino, unda solucionnan pa problema pa futuro no ta wordo encontra facil. Pero tambe entre e consehonan di scol, contacto entre mayornan y scolnan y e contacto entre cierto organisacionnan cu e mesun mision, colaboracion ta falta hopi biaha.

Bo por logra hopi mas si tin colaboracion entre e diferente organisacionnan y nan kier uni nan forsanan. Asina nan por traha riba un sistema husto, enbes di enfoca solamente riba grupo specifico. Laga nos enfoca riba un sistema cu ta traha pa tur hende, enbes di solamente un grupo selecto chikito.



Laga nos restaura e herencia di Betico Croes y nos ta considera nos mes obliga pa asegura cu tur hende ta ricibi igual oportunidad y cu nan voz ta wordo scucha, sin importa nan background social y economico. Si nos permiti cu partidonan politico, scolnan y mayornan, organisacionnan cu e mesun mision ta sigui dividi segun e lineanan aki, nos lo solamente crea un comunidad caminda desigualdad y injusticia ta wordo fortifica.