Feliz dianan di Pasco!

E luna di Misa di Aurora a termina na Aruba. Durante nuebe dia, for di 16 di december te cu 24 di december, por a asisti na misa na diferente iglesianan Catolico na Aruba pa 5’or di mainta. Pa esaki mester lanta tempran y esaki ta dificil pa hopi hende na algun momento. Esaki ta debi cu algun hende tin dificultad pa lanta of mester traha despues di un misa. Un tradicion cu na Aruba ta casi unico y hermoso. Misa pa prepara e nacemento di Jesucristo.

Ta un tradicion cu den añanan anterior tabatin hopi seguidor entre un gran comunidad catolico na Aruba. Awendia principalmente hendenan mayor ta bishita e misanan aki. Tal vez tambe manera un recordatorio extra di nan tempo, ora nan tawata mucha, unda nan a comparti e momentonan agradabel aki hunto cu nan mayornan. Pa asina experiencia e deseo di tempo anterior, un cierto nostagia, atrobe. Unda nan por celebra e momentonan aki bunita hunto cu henter famia.

Durante tempo di Corona, mester a registra e bisitantenan di iglesia y tabata prohibi pa canta. Anja pasa mester a usa tapaboca y koor por a canta, pero mester a usa microfon. E consecuencianan di Corona ta visibel te awe. Durante e misionnan di orasnan di madruga mi a nota cu ainda tin un man di hende ta usa tapaboca. Tal vez nan ta verkouden of nan tin ainda miedo di hanja Corona. Pa hopi hende den iglesia esaki no ta conta y nan ta sinti nan mes sigur cu e pandemia a pasa. Y ainda asina nan ta scoge pa, prome cu ta reparti pan y biña, no duna e saludo di paz cu un man. Awendia e ta wordo duna cu un señal di paz. Antes bo tabata saluda bo famia mas cercano cu un sunchi di paz, sunchi riba banda di kara, duna man of abrazo. Pero awendia esaki ta sosode raramente. Nos a cambia asina liher? Tradicionnan ta cambia cu tempo. Pareu den e caso aki. Mi spera solamente cu nos no ta bira menos humano pa otro den e proceso aki. Algo cu si ta positivo ta e servicio di iglesia cu despues di e misa ta wordo cera cu koffie y un agrado delicioso unda famia y amigonan ta topa y comparti hunto un rato agradabel.

Na Hulanda, e misanan di Aurora ta celebra raramente. Na Hulanda mi a asisti solamente na misa di anochi. Den sneeuw, den scuridad y den friu, cu auto pa iglesia pa celebra misa di anochi cu yas diki, handschoen y sjaal, cu ta un diferencia grandi na Aruba. Te ora mi a bai biba na Aruba mi a haya e oportunidad pa experiencia e misanan di Aurora. Algun di nan mas impresionante cu otro. Honestamente, mi ta sinti falta di e momentonan aki awor. Unda bo por profesa fe hunto den un relacion. Durante temporada di Pasco den aña 2020 pa mi tabata un temporada cu no tabata trece momentonan agradabel. Temporada di Pasco mester a trece compania y alegria cu famia y amigonan, pero esaki den e tempo ey sin duda no tabata e caso. E tabata un temporada di disappointamento, tristeza y incerteza. Despues di esaki, Corona a haci su entrada, cu tambe a causa hopi cambio.

E biaha aki mi ta sinti un cierto tranquilidad, felicidad y paz pa por celebra temporada di Pasco lentamente atrobe. Tambe e misanan di Aurora a haci mi bon. Como punto sobresaliente di e maintanan aki tabata e misa na Sint-Annakerk na nort di Aruba. Aya nan a toca musica Gregoriano den idioma di e isla. E estilo di musica medieval cu ta wordo caracterisa pa su unisono sin acompañamento di instrumentonan. Pa esaki mi mesora mester pensa riba Wishful Singing, un ensemble cu ta consisti di cinco cantante Clasico y cu ta canta Gregoriano, den colaboracion cu Herman Finkers, for di 2017. Riba Youtube Wishful Singing cu e titulonan: "Statuit ei Dominus" y "Indisch Onze Vader" ta digno di scucha. Specialmente e ultimo titulo, cu pa mi ta trece tranquilidad den momentonan dificil.

Manera na Hulanda, na Aruba nos ta celebra Pasco cu e tradicion di pone un kerstboom y intercambia regalo. Ta gusta haya regalo. Pero loke ta haci'e ainda mas gusta ta duna. E biaha aki tabata un desafio extra pa scoge e regalonan. Mi ta di opinion cu un bon regalo ta bira uno realmente bon, si hende a dedica tempo y esfuerzo pa esaki y a pensa bon pa scoge un regalo cu ta realmente pa e persona.

Na Hulanda nos ta come platonan tradicional di Pasco manera rollade, kerststol y nos ta disfruta di gourmetten hunto. Na Aruba no por falta e ham y e ayaca, cu ta bin originalmente for di Venezuela. Ayaca ta un pakete chikito di entre otro harina di maishi y pida cu ta wordo envuelto den blachi di banano.

Aunke e tradicionnan aki ta diferente, ambos pais ta comparti e ambiente y alegria di celebra Pasco cu famia y amigonan. E ta un tempo pa ta agradecido pa loke nos tin y pa comparti amor cu esnan rond di nos. Aya nos ta trata pa no exclui ningun hende, pasobra esey no ta pertenece na e pensamento di Pasco.

Ta importante pa nos aprecia nos tradicionnan di Pasco y transmiti nan na e generacionnan siguiente, pa asina nos por sigui disfruta di e tempo special di aña aki. Laga nos tur alegra nos den alegria di Pasco, sin importa unda nos ta of cual tradicionnan nos ta sigui. Esaki hunto cu nos amigonan y familiarnan cu nos ta stima hopi. Esey ta ya un regalo special. Feliz dianan di Pasco!