Enseñansa ta grita pa atencion!

Como un di e pilarnan mas importante di nos comunidad, maestronan na Aruba ta merece nos mas grandi sosten y aprecio. Apesar di e gran responsabilidad cu nan tin pa forma e proximo generacion, nan ta encontra nan mes hopi biaha cu un carga di trabou hopi halto cu den e ultimo añanan a subi pa un nivel inaceptabel. Ademas nan ta hanja poco aprecio for di gobierno. E problema aki mester wordo atende pa gobierno di Aruba, pa maestronan por haña e sosten cu nan ta merece y pa educacion na Aruba por prospera.

No ta un secreto cu e trabou di maestronan ta pisa. Nan ta responsabel pa guia y lesa e muchanan Arubiano, y ta nan tarea pa asegura cu nan ta crese den hende productivo y responsabel. Pero den ultimo añanan e carga di trabou pa maestronan na Aruba a aumenta drasticamente. Nan ta hanja nan mes cu un cantidad mas grandi di estudiante den klas, mas trabou administrativo y menos recurso pa satisface e necesidad di cada estudiante. Tur esaki ta hasi cu maestronan hopi biaha ta traha di mas y tin poco tempo pa nan bida personal.

Tur esaki a hasi cu tin hopi maestro na Aruba sinti nan mes sobrecarga y hasta ta considera di cuminsa busca otro trabou. Otro maestro por ta kier cuminsa cu otro trabou, pero ta keda atrapa dor di nan hipoteca. Nan keda obliga pa keda traha den educacion. Esaki ta un tendencia preocupante cu no ta afecta solamente e calidad di nos sistema educativo, pero tambe e futuro di nos muchanan Arubiano. Un otro problema ta e falta di apresio y sosten for di gobierno. Maestronan hopi biaha ta gana menos cu nan mester, y tin poco oportunidad pa desaroyo profesional. Tambe, a medida den educacion, asina cu tin menos placa pa materialnan educativo.

Pa e motibo aki, ta responsabilidad di gobierno di Aruba pa reduci e carga di trabou di maestronan. Tin mester di tuma medida pa reduci e tamaño di klas y reduce trabou administrativo, asina cu maestro por concentra riba nan tarea mas importante: duna les na nos muchanan.

Pa solucion e problemanan aki, e gobierno di Aruba mester inverti mas den educacion. Tin mester di mas medionan disponibel pa nos maestronan. Nan tin mester di mas entrenamento, miho salario y beneficio. Por ehempel, descuento pa maestronan riba material di oficina of laptop. Pasobra no semper e scol ta duna un computer na e maestro. E maestro mester usa nan mes un laptop of otro materialnan di enseñansa. Maestronan ta pidi mas sosten riba technologia y materialnan di enseñansa y kier adapta na e nivel riba e mundo di bida di nos muchanan.

Tambe mester tuma un desicion riba na cua idioma di instruccion mester usa. Esaki ta un problema dificil ainda. Ta sigi ceda e idioma di instruccion Nederlands, of ta cambia pa Papiamento of Ingles? Pasobra tin sentí pa duna instruccion na Papiamento, pero e examen ta na Nederlands? E muchanan ta keda miho capacita e materia, pero na e momento di examen no por expresa nan bon. Esaki ta causa mas confucion y desmotivacion (tambe un parti di e efecto di Covid-19) entre e muchanan. Nan ta ceda patras pa motibo di e idioma, mientras nan posiblemente tin e conocemento grandi di e materia. Si ta esaki ta e desicion di usa Papiamento of Ingles, duna e maestronan suficiente espacio pa desaroya diferente materialnan di enseñansa na Papiamento/Ingles. Lo ta un invertimento grandi pa e gobierno, pero pa un bon educacion mester inverti.

Mester duna mas atencion na condiscionnan di trabou di maestronan, manera reduccion di tamano di klas y reduccion of re-organisacion di tareanan administrativo, manera organisacion di hopi actividad pa e estudiantenan. Nos ta perde hopi schakel den diferente funcionnan den educacion, cua ta hasi cu maestronan ta responsabel pa diferente tareanan. Den e temponan aki di insigur y cambio, ta mas importante ainda pa cuida di nos maestronan. Dor di investi den nos maestronan, ta investi den futuro di nos pais. Nan merece nos apoyo, respet, reconecemento y agradecemento pa ehempel dor di campananan publico cu ta subraya e importancia di educacion. Ademas, e gobierno di Aruba mester asina pa nan haña e sosten cu nan mester pa nan trabou importente por sigui bai.

Pa invisti den educacion y mehora e condicionnan di trabou di maestronan, gobierno di Aruba por asina bai pa crecemento den educacion na Aruba. Esaki no ta importante solamente pa futuro di e studiantenan, pero tambe pa futuro di Aruba en general. Nos no por permiti cu trabou di maestronan ta hopi pisa y nan no ta hanja e sosten cu nan ta merece. E responsabilidad ta di gobierno pa hasi cambio aki y asina cuida pa un sector di educacion saludabel y florece na Aruba.