E reparticion di tarea entre homber y muhe

E tema aki a cuminsa ora mi a wak e episodio di 3 di mei riba television Hulandes cu ta presenta dor di Nadia Moussaid. Nadia ta papia cada dia cu invitado nan y publico tocante un tema specifico, manera asunto social, cu meta pa crea mas comprencion pa diferente punto di bista. Den e oportunidad aki, nan a trata e tema titula: "Den teritorio di un macho influencer".

E tawata tocante e influencer Andrew Tate. Den e episodio tabatin algun invitado di Andrew, kende a mira Andrew como nan ehempel. E kickbokser anterior tin su idea cu un homber mester ta un macho, cu ta cuida pa su famia y kier hasi tur cos cu ta posibel pa su mes. E ta bisa cu homber y muhe absolutamente no ta igual y nan tin un tarea determina. Sinembargo, tambe e ta conosi pa su palabranan contra muhe y e mes a wordo aresta pa sospecho di trafico humano, violencia contra muhe y participacion den un crimen organisa.
 
 

Durante un bijles di Historia pa un studiante di havo, nos a praktica cu algun pregunta di examen. Nos a hanja un tarea cu tawata:

"Di Prome Guera Mundial tawata un “guera total” y sin intencion, a tin un influencia positivo riba emancipacion di muhe den Europa. Splica con esei ta asina y den cua forma e Prome Guera Mundial a tin un influencia positivo riba emancipacion di muhe."

Rib'ei e tarea aki, e studiante a puntra mi si e influencia aki realmente tabata positivo. Den su punto di bista, esaki tabata mas un manera di manipulacion y importancia riba punto di bista economico. Asina, e hefe nan por a hasi mas ganashi, pa nan laga muhe traha pa menos placa pa e labor cu prome hombernan tawata hasi. Segun e studiante aki, esaki tawata e cuminsamento di e cabamento cu ta ceda impelmenta awendia den relacion entre homber y muhe. Directemente, mi a pensa riba e episodio cu ta presenta riba televicion di Nadia Moussaid.

For di siglo 19, muhenan a tuma lucha pa mas igualdad di derecho y asina a surgi e prome ola feministico. Den siglo 20, a sigui e di dos y di tres ola. Den e tempo prome di di dos Guera Mundial, tawata normal pa muhe no traha. E tarea di muhe na e tempo ey tawata mayormente cu ta cuida cas. Na e tempo ey, pa ehempel, durante un recuento di poblacion na Belgica, bo tawata mester indica cua trabou bo tawata hasi. Tawatin un opcion pa "Mama di cas", pero aki nan a pone entre parentesis "ningun". Parce manera si esaki no tabata trabou. Na e tempo ey, ta cu esun di cuida cas tawata un trabou hopi duro y muhe tawata dedica mas di 50 ora pa siman na esaki. Solamente na 1948 Belgica a conoce e derecho di voto pa muhe. Paisnan manera Hulanda, Alemania, Inglaterra, Spanja, Suecia, Norwega, Czechia, Slovakia, Merka, Rusia, Polonia, Australia, Ukraïna, Turkiya, Albania, Armenia, Azerbaijan, pero tambe Ecuador, Tailand, Cuba, Brasil, a bay esey hopi mas prome cu Belgica. Hopi laat pa Belgica, pero esey tawata mayormente dor di e miedo di e liberalnan y e socialistanan cu muhenan di Belgica lo vota na e partido Catolico y cu nan lo perde nan poder dor di esaki.

Na añanan '60, economia a crece hopi den hopi paisnan Europeo. Poblacion a cuminsa consuma cu cantidad grandi, cu a trece cu e poblacion kier crea un prestigio, status y identidad. Aparantemente, tawata pensamento cu bo ta feliz pa medio di pertenencia nan material. E derecho di muhe a cambia y muhe a continua su autonomia pa desidi tocante su curpa, a pesar di resistencia. Tambe na Aruba, dor di yegada di industria di petroleo, a mira un cresemento economico fuerte desde siglo 20. Dor di esaki, hende a ceda bon y tambe a cuminsa consuma den cantidad grandi aki na Aruba.

Den mi opinion, feminismo a tin un efecto positivo riba muhenan y comunidad completo. Muhenan a haña akseso na educacion, mercado laboral y participacion politico. Esaki a contribui den barera nan y mehora e posicion di muhe den comunidad. Esaki a causa diversidad y igualdad cu ta ser aprecia y respeta. Awendia, muhenan ta ser reconose como igual.

Sinembargo, tin tambe efekto negativo cu por ser observa. Puede ta cu esaki tin cu haña di educacion of na unda bo a nace con hende ta wak e relacion entre homber y muhe. Esaki tin un influencia desfaborabel riba e tarea tradicional di e balor nan familiar. Asina por causa desprecia pa e balor tradicional di famia, cuido di yiunan y matrimonio. Muhenan ta wordo stimula pa consetra riba nan carera y independencia. En si mes, no tin nada malo cu esaki. Mi no tin nada contra feminismo, pero mi kere cu dor di esaki, comunidad a ser desorganisa y nos ta experencia hopi problema. Hopi divorcio y mucha cu ta keda atras y ta sali den desbentaha pa esey. Tambe por causa demonisacion di hombernan y crea enemistad entre sexo.

Despues di tur esaki, mi mes a cuminsa pensa mas riba esaki. Mi a yega na e conclucion cu tin dos grupo di homber y muhe den nos comunidad. Laga mi laga e grupo di "LGBTQIA+?" un momento afo. E prome grupo di homber y muhe ta mira nan relacion como e posibilidad pa disfruta di momentonan agradabel, special y unico hunto. Manera un momento den un vakantie. Den un relacion asina, tin conversacion confidencial y tin espacio pa cambia pensamento y fortifica e relacion di e manera aki. Hende ta sinti apresio, aceptacion, cuido y seguridad den e relacion aki. Hende ta trata di praktica fé den Dios hunto y ta mustra suficiente dedicacion pa kier ta den e relacion uni aki. Hende ta trata di soluciona problema hunto. Sex ta necesario, pero no ta e asunto mas importante. Nan tin mesun aceptacion di otro y nan ta sinti nan responsabel pa nan relacion, matrimonio y/o yiunan. Sinembargo, mi ta di opinion cu e manera aki den un relacion awendia no ta mas di e tempo aki pa hopi hende y ta resulta cu e hombernan y muhenan aki ta keda soltero. Aunke nan por tin un gran deseo pa keda den un relacion confidencial manera esaki.

E di dos grupo di homber y muhe ta mira otro como obheto di desea. Un homber of muhe como un di tanto. Ta basta cu tin sex den e relacion aki. Den un relacion manera aki, no ta necesario cu tin responsabilidad, ni cu e yiu nan of pa otro. Interes personal ta hopi mas importante cu interes pa otro. Fé den Dios y matrimonio ta importante solamente ora cu nan ta considera cu esaki ta beneficiando pa nan. Loke ta conta aki ta placa, status y poder cu un homber mester tin. Placa ta placa, y aparentemente amistad bo por cumpra. Tin posibilidad pa e muhe of homber tin hopi partner. Esaki ta wordo acepta y ta hasi cu nan no tin e exigencia pa ta agrega entre otro. Apariencia tambe ta hopi importante. Hende mester ta wordo mira hopi jong. E ta parce cu hende ta biba pa e momento so. Despues e bida ta sigui y nan ta warda pa un otro momento emocional cu un persona nobo. Mi tin miedo cu e grupo di dos di homber y muhe aki ta hopi mas grandi cu e prome grupo.

Hende ta papia di un fenomeno yama "Hoeflation". Esaki ta nifica cu un homber awendia mester hasi binti biaha mas esfuerso pa un muhe cu ta ofrece binti biaha menos cu e muhenan, na tempo di su welo. Pero, pakiko e muhe no por tin mesun posibilidad manera e homber pa tin hopi partner, sin ta ser mira mescos cu un muhe di bida? No ta importa si esaki ta un muhe di bida cu ta ricibi pago of no.

Pa solamente pone enfasis riba un banda di e situacion aki, bo ta menosprecia e muhenan y tambe por inventa un fenomeno inventa pa e hombernan manera "Machoflatie/Broflatie". Esaki ta homber nan cu no ta bay bon den educacion. Tin hopi tatua y ta usa renchi na orea. Cual ta algo cu ta pa muhe, segun mi opinion. Algo femenino, pero por ta aki mi ta un tiki tradicional. Hombernan cu ta bira entusiasma pa e sonido di motor y cu no por keda sin mira e pelicula "Fast & Furious" na cinema. E cultura di homber macho, caminda e muhe no ta nada mas cu un (lust)obheto cu mester keda cas, traha cuminda y tene cuido di e yiunan y su homber. Si un muhe kier skohe pa su mes, e homber aki ta sinti sin balor y e por bira frustra.

E expectacion cu homber y muhe tin di otro na e tempo aki aparentemente ta hopi leu for di otro. Algun biaha nos ta pidi of rekeri hopi di e otro cu simplemente no ta realisabel. Muhenan tin dobel di e tarea, cu por hasi cu nan keda demasiado cansa. Hombernan tambe no sa mas kiko nan tarea ta nifica y no sa con nan mester comporta nan mes. Dor di esaki, e comunidad ta hopi desorganisa pa un gran parti. Kiko e futuro lo bay ofrese pa nos awendia? Con nos lo mira e situacion aki den algun añanan? Of lo wak esaki como algo normal y nos mester acepta esaki tambe?

Resumiendo, mientras feminismo tin un aportacion importante, tambe nos mester ta consciente cu feminismo no ta mesun cos cu emancipacion di muhe. Ta importante pa promove igualdad di derecho y oportunidad, pero tambe mester respeta y apresia balornan tradicional y relacion nan entre homber y muhe. Aki ainda semper ta lanta e pregunta si noskier esaki den nos comunidad actual? Por ta nos ta hopi separa cu otro riba esaki y nos a exagera den nos deseonan y expectacion pa otro. Y si un muhe wordo presenta cu un opcion pa haña un homber cu ta bisa cu e muhe no mester preocupa riba placa, cu tur cos lo wordo paga, pero cu e lo kier cu e muhe ta cuida e homber lo mehor cu ta posibel. Den tur manera posibel. Kiko e muhe lo bisa riba esaki? E ta algo cu e muhe kier? Of si e muhe pone e opcion na e homber pa no tin mester di traha y e homber por tuma cuido di e trabounan na cas, pasobra e ta e ganador di pan.

Den un relacion entre homber y muhe nos mester ta open y sincero cu otro. Pa trata di establece e balornan tradicional hunto. Cu tin bon areglo tocante e reparticion di tarea y expectacion di otro. Muhe sigur por ricibi igualdad, oportunidad y derecho aki. Sigur cu si. Si ta trata di amor berdadero, den esaki sigur mester tin luga. Di e manera aki nos ta acepta, respeta y sostene otro dor di bon comunicacion. Mi ta pensa cu dor di esaki nos por duna un bon contenido na un relacion berdadero. Solamente asina nos por crea un comunidad cu ta inclusivo y husto pa tur hende.