E fin di aña!

E fin di aña ta yegando y 2024 ta casi na porta. Un tempo cu mi tin e pensamento pa skirbi algo, pero pa ta sincero, mi no sa kiko y ni con. Tin asina hopi cu mi tin di bisa. Cosnan cu mi kier papia sinceramente y abiertamente. Tin asina hopi pensamento y emocion diferente cu ta hunga un rol, y awor mi no sa unda pa kier cuminsa.

Mi tin e pensamento di cuminsa cu un reflexion di 2023? Corona casi a desaparese y ta bon pa mira cu hende ta duna otro man na misa atrobe ora cu e pastoor kier pronuncia e saludo di paz entre nos. Prome, y sigur durante Covid, esaki tabata sosode solamente cu un bista amistoso y sin contacto personal. Of mi mester cuminsa cu e guerra entre Ucrania y Russia, of entre Hamas y Israël, caminda no ta un fin ainda. Of tocante e castonan di bida cu ta hopi halto na Aruba, caminda cada biaha mas hende ta pasa dificultad. Cuanto famia lo mester yudansa extra pa otro aña? Ta bon pa mira cu politica a ofrece yudansa na famia nan cu cuminda pa cien famia. Pero despues mi mes ta puntra, nan no ta responsabel pa e pobresa aki? Of e ta un cuminsamento di hanja voto ora e tempo di votacion ta cuminsa?

Of mi mester papia tocante e cresemento di turismo? Aruba ainda ta bai bon pa loke ta turismo. Pero te ki ora? Kiko lo sosode algun aña for di awor si nos tin mucho mas hotel? Of e atencion cu nan ta duna na turista y e poblacion local? Algun biaha bo ta mira cu e cualidad di servicio ta baha y no tin atencion extra mas pa cliente, solamente pa gana placa lihe. For di mi punta di bista, ta hopi preocupante pasobra Arubiano semper a conose pa su hospitalidad y bon servicio. Specialmente na e turista cu, pa e motibo aki, semper kier bolbe back.

Na unda mi mester cuminsa? Por ta mi mester papia di un mensahe propio cu Facebook a crea pa mi, cu a resulta den:

My pain: I miss those who left this world too soon, but I don’t let it get me down, because I promised them

I’d always keep smiling.

My mistake: Michel, your mistake was never putting yourself first.

My lesson: I have learned that I don’t care who judges me. They haven’t gone through what I’ve gone through.

Mi dolór, mal comprendemento y les di bida a sali pa dilanti, unda mi a para un momento pa por refleha riba esaki.

My pain: I miss those who left this world too soon, but I don’t let it get me down, because I promised them

I’d always keep smiling.

E falta ainda ta grandi, pero mi ta trata di haci lo mehor posibel. Tawata un Pasco cu ta diferente for di normal. Tawata parece manera e Pascu cu mi tawata biba den e periodo unda mi proceso di separacion a cuminsa. E falta di mi tata ta grandi. Ta un sentimento cu no por perde asina facil. Den sala tin un potret di dje. Na algun momento, mi ta mir'é y ta parece manera e ta mirando mi. Cada biaha mi ta descubri un sentimento of emocion diferente cu e kier transmite na mi. Mi mester pensa tambe na e Mona Lisa di Leonardo Da Vinci na Paris. Unda bo por descubri algo diferente cada biaha bo mira e pintura ei. Algun biaha mi ta mira tristesa, insigur y miedo den su wowo. Algun biaha mi ta mira den su wowo su sabiduria, su atencion, humor y orguyo cu el tawatin pa nos. Con extraordinario mi tata tawata. Cu su norma y balor na e luga corecto. Tur ora cla pa yuda su prohimo. Un persona cu a yuda pa nos por biba un bida sin preocupacion. No solamente mi tata, pero sigur tambe mi mama a yuda pa logra esaki y a contribui su parti. Mi mama ta un muhé fuerte! Despues di tur loke e a pasa. Mi por papia aki solamente cu hopi respet y orguyo, caminda mi ta trata di mantene mi mes para cu un gran sonrisa riba mi cara. Awor ta mi tarea pa ta presente pa mi mama lo mehor cu posibel. Un tarea cu awor ta hopi importante pa mi.

My mistake: Michel, your mistake was never putting yourself first.

Nos propiedad bo ta hereda hopi biaha di bo tata y mama. Spera e ta hopi biaha positivo. Pues nan mes ta e persona cu a cria bo. Mi semper a tende cu mi mester ta pa cualkier hende cu ta nesesita yudansa. Bo mester ta dispuesto semper pa esnan mas serca di bo. Awendia esaki no ta facil. Con hopi amor mi Mi tawatin pa dje. Con mi tawatin e deseo di laga dje mira cu mi tawatin asina hopi amor pa dje. Despuess di tur cos, bo por bisa cu aparentemente mi tawata un tiki naif. Pero kiko mi tawata sa? Mi semper a bay cu mi miho intension. Mi bondad tawata algo normal y ainda awe mi ta hopi orguyoso di dje. Mi tambe a comete fayonan, esey mi sigur no kier nega. Mi ta spera cu ela a haña e felicidad cu e no tawata hanja prome.

My lesson: I have learned that I don’t care who judges me. They haven’t gone through what I’ve gone through.

E les aki ta keda dificil pa mi semper. Den e tempo aki tin hopi hende cu ta husga y condena otro sin sa kiko ta pasando realmente den curason di hende. Tin biaha ami tambe ta culpabel pa esaki.

Riba mi propio mensahe di Facebook cu a crea pa mi, mi a risibi un reaccion cu e texto: "Mi ta spera cu 2024 ta trese alegria y felicidad pa bo y un bon esposa." Mi a hanja dificultad pa duna un "Like" na e comentario aki rapido. Pasobra, despues di tur e aña caminda hopi cos a sosode, mi ainda sa cu e ta un persona tremendo bon y sigur ainda ta. Algo cu mi definitivamente por a apresia como persona.

Pa motibo di fayesemento di mi tata, mi a tuma un desicion pa no hasi nada pa e dianan di Pasco y fin di aña. Normalmente nos cas ta wordo decora bunita cu cosnan di Pasco y un kerstboom y mi ta cumpra klapchi. Awor solamente mi a cumpra oliebol. Mi no tawatin gana pa cumpra un pagara e biaha aki. Pero dor di mi swa, cu a trese un pagara pa mi, mi a wordo forsa pa cumpra un. Mi no por neng'e. Despues a bin e pregunta: "Con bo tata lo kier pa mira bo durante anochi di fin di aña?" Segur cu un sonrisa y un mente positivo riba futuro. Ora cu mi a consideracion di esaki, mi a para un rato y a laga un lagrima. Mi sa cu su deseo ta pa mira mi mes alegre. Cu mi tin curashi, pero segur cu su pensamento den mi mente, pa enfrenta un futuro nobo.

Mi laga e aña bieuw manera e ta. Mi ta trata di olvida pasado mi manera. Ora mi cende e pagara, mi lo trata di hib'é cu mi e enfoke positivo pa e aña nobo. Segur e no lo ta asina facil. Mi lo keda cria den e bon recuerdonan y lo sigui expresa mi mes cu un tono critico y un manera abierto y honesto pa e aña venidero. Esaki, segun mi punta di bista, mester bira mas comun den mas hende na Aruba. Pa asina evita cu injusticia y desigualdad riba hopi tereno no por sigui pasa sin control. Cu nos ta sigui expresa nos mes aki. Spera cu e aña nobo lo trese nos hopi alegria y felicidad. Desde awor mi ta desea un Feliz Aña Nobo na boso tur!