Discriminacion ta di tur momento!

Diabierna 10 di november 2023, Koning Willem-Alexander y reina Maxima tabata na Zuid-Afrika. Presidente di Zuid-Afrika, Cyril Ramaphosa, a bisa diaweps cu e ta reconoce e disculpa cu e rei a ofresce dia 1 di juli pa e pasado di esclavitud di Hulanda. Un stap hopi importante pa bay na direccion di reconciliacion y restoracion.

E bishita di estado na Zuid-Afrika tambe tabata relaciona cu e papel subestima cu Hulanda tabatin den su pasado di esclavitud. Despues di bishita un museo di esclavitud na Kaapstad, e rei y reina a topa cu demonstradonan furiouso, e poblacion Khoisan. Nan tabatin borchi cu mensahe manera: "Nos ke nos tera bek," "Pakiko nan no ta papia cu nos?," "Respecta nos." Siguridad nan di Zuid-Afrika y Hulanda a bay forsa

pa kita demonstradonan for di caminda pa asina laga e rei y reina subi den nan auto cu seguridad. Segun Koning Willem-Alexander, ta bon cu e emocion nan a sali na momentunan manera esaki. "Paso ora cu bo

no por expresa bo emocion, tampoco bo no por sigui traha riba reconciliacion y sanacion." Reina Maxima no tabata kere cu e demonstradonan tabata tin intencion di hasi nan nada. Nan tabata ke mustra nan

emocion di loke nan a sufri.

Hunto cu e bishita di e rei na Zuid-Afrika, tin e conflicto entre Hamas y Israël cu ta domina e noticia mayor parti di tempo. Ainda no ta haña un solucion y desgracia ta keda asina pa hopi tempo. Na principio, hende tabata scohe un banda rapido, pero awor e desicion ta dificil pa scohe. E conflicto tambe ta cuminsa hunga den otro parti di mundo. Tin demonstracion pa mustra e mal contento caminda emocion ta bay hopi biaha mas halto. Tambe mi no ta mira un paz na bista entre e partidonan pa logra un paz rapido.T

Si bo scohe pa Palestino y no pa Israël, e chens ta grandi cu bo ta wordo mira como un antisemita. Mientras cu nos mester keda mira e diferencia entre e poblacion Palestino y Hamas. Si bo scohe pa Israël, e chens ta grandi cu bo ta wordo mira como un hende cu no tin empatia cu e Palestinonan. E famianan cu mester laga nan cas buscando seguridad na sur di Gaza.

Mi no kier scohe un banda. Mi mester pensa solamente riba e victima na ambos banda. Kiko lo ta e futuro pa e victima nan aki? E conflicto aki ta trese mas trauma entre e dos grupo. Hende ta keda sinti nan mes discrimina. No, na ningun di e banda nan bo no ta mira un reconciliacion mas y nan ta den un spiraal cu ta baha. Unda solamente personanan manera John Wick ta nace y caminda venganza ta domina.

Loke ta parce, ta manera si tur hende mester scohe un banda y pa e motibo ei bo mester rechasa e otro banda y discrimina nan. Pa asina bo sinti bo mas sigur den bo propio grupo y trata di hustifica bo actonan. Pa avansa den bo propio grupo. Cu bo mester exclui e resto manera cu nan no existi. Colaboracion, cu ta di balor grandi, no semper ta importante aki.

Discriminacion ta di tur tempo y no semper ta hopi obvio entre e gruponan di hende caminda bo ta spera. E ta straño, pero mi ta kere cu tur hende awendia a experencia un forma di discriminacion. Tambe mi mes a pasa dor di esaki. Algun hende no tabata mira mi na Hulanda manera un paisano nace y nan pone mi rapidamente den un hok di “allochtoon”. Na Aruba, ta exactamente lo contrario. Cu mi ta sinti mi mes Arubiano, algun hende ta mira mi akinan como un Hulandes. Por ta no direct. Pero bo ta puntra bo mes unda bo ta pertenece. Of mi simplemente sinti mi un habitante di mundo durante tempo? E por ta un bentaha pa por haña lo meho for di e dos culturanan aki, sin mester tin prehuicio.



E no ta importa cu Aruba ta chikito, aki tin luganan unda desgraciadamente algun grupo tambe ta wordo discrimina. E tur ora e ta visibel, pero e ta existi. Ta un karakter "normal" di hende, asina cu ta straño si esaki no ta sosode na Aruba. Discriminacion contra hende cu ta biba den un districto determina, hende cu tin un preferencia politico specifico, hende cu dor di nan situacion social tin menos oportunidad pa bon educacion, of hende cu ta bin di otro pais y prefera no forma parti di e comunidad aki. Algun grupo di hende ta wordo perhudica aki segur. Ta manera cu na Aruba ainda tin un sierto taboe cu ta hunga un rol ora ta trata di discriminacion of esclavitud.

Colaboracion na Aruba no semper ta sosode naturalmente. Hende no semper kier yuda otro, pasobra nan no kier reparti e exito cu otro ta hanja. Aki na Aruba, un envidia pa otro tin un rol grandi tin biaha. Na Hulanda, hende ta duna complimento cu goso y ta hopi bunita ora nan ta feliz pa otro ora nan logra algo. Ta manera si na Aruba nos ta prefera no mira cu un otro ta avansa. Y duna complimento, nos ta prefera no hasi esaki rapidamente. Hende ta pensa hopi lihe pa kiko un persona, cu no ta merece algo, ainda por logra algo.

Laga nos yuda y sostene otro. Duna un otro mas tanto un bon compliment. Pa nos por ta orguyoso di un y otro. Orguyoso di e cos nan positivo cu nos tur ta logra huntu riba e isla chikito aki. Pa asina nos por keda mira nos mes como un unidad, sin kier hasi diferencia riba preferencia politico, condicion nan social y economico, nacion of apariencia. Nos mester keda mira nos mes como un unidad, caminda sigur nos no mester lubida di e islanan serca nos cu ta Bonaire y Corsou.