DEMASIADO Personal!

Algun tempo mi no a skibi nada? Pakiko? No tin tempo, hopi cos di hasi, no tin inspiracion of no tin tema interesante cu mi a haya importante pa skibi?

Mi tin cu bisa, for di e Ronde di Aruba mi a cuminsa core mas y mi ta haya hopi satisfaccion positivamente for di core. E ta costa tempo pa traha riba bo mes, pero mi ta experiencia hopi cresemento positivo den mi desaroyo personal y mi ta sinti mi mas fuerte.

Tambe mi tawata ocupa pa desaroya un proyecto na scol tocante di esclavitud y asina mi a bay Corsou hunto cu algun docente y 33 estudiante di klas tres di Havo y vwo. Nos a keda eynan algun dia y e estudiante nan a mira hopi y siña hopi tocante e pasado di e temporada di esclavitud. E ta un gran exito y tur cos a bay bon. E unico cos cu no a bay bon tabata e tres maleta cu na e biahe pa bay Aruba bek a keda atras dor di e aerolinea. Pero mi preferi esaki cu laga un estudiante atras, cu tabata pasa recientemente na un otro scol na Aruba. Kiko un desaster y sigur no ta un bon noticia pa e scol ey.

Mi no tabatin inspiracion mas? Of mi no tabatin interesant pa skibi? No, esey sigur no ta e caso. Tabatin hopi noticia importante cu mi tabata ke skirbi, pero mi no por a haya tempo pa skibi cu trankilidad. Mane tokante di e interesante reunion diaranson pasa na Universiteit di Aruba cu tabata tocante “Slavery: Past & Present in Aruba,” cu conclusion di e anochi tabata cu nos no mester traha contra otro, pero hunto.

Of tocante di e diferente inspector di solar na Aruba cu ta neglisha e inspeccion di casnan cu tin panel solar. Of e hopi black out na Aruba, caminda cada bes casnan ta keda sin electricidad pa un rato. Of mi mester a skibi tocante di e diferente desaroyonan politico cu a tuma luga na Aruba y Hulanda? Na Aruba, despues di mas cu 12 aña documenta, nos mester pidi asfalt dilanti di cas via social media. Bo ta puntra bo mes unda tur e placa di gobierno ta bay. Of na Hulanda, caminda despues di un periodo largo di consulta, nan ta bay haya un homber como minister-president. Mi tabata kier mira un kandidato femenino pa esey. Con ta posibel cu no tin ningun kandidato femenino cu ta bon pa e posesion? Na esey, Aruba ta hopi mas avansa y nos por ceda orguyoso cu nos na Aruba y na diferente isla den Caribe ya a haya un minister-president femenino hopi mas trempan cu na Hulanda.

Pero e noticia mas espantoso tabata e noticia cu a tuma luga na un scol basico hopi apresia na Savaneta. Den e website di noticia 24ora di 14 di mei tabatin un noticia cu un docente di educacion cu siete aña pasa tabatin contacto sexual cu un estudiante. Inmensamente hopi traumatisa pa e estudiante a pasa den algo asina. Pero mi a sinti un tiki di compasion tambe pa e docente. Esaki ta pasobra 24ora a publica su nomber completamente y su portret hunto cu e noticia. Mi ke ta cla aki, mi no ke defende e docente, pasobra si bo a hasi algo malo, bo ta simplemente malo y bo mester paga pa esaki. I sigur si bo den bo posiccion cu tin contacto cu un estudiante. Pero 24ora tin e derecho pa acusa un hende asina? Aunke nan tin prueba concreto? Mi ta kere cu nan no ta hues of instancia legal, pa pone esaki den media asina. Tur hende tin drechi pa un husticia husto. Al final, dia 27 di mei tabatin un noticia cu e docente a wordo deteni riba suspension di intimidacion sexual contra un estudiante y esaki tambe a ser publica cu nomber y portret via 24ora.

Ademas, e reaccion riba e noticianan tabata demasiado personal. E director di e scol aki tabata nombra cu su nomber y a acusa cu sigur el a sa mas tocante esaki. Si e directora a sa mas, kiko e adjunct y e IB-er di enseñansa tabata sa? Den mi opinion, nan sigur mester sa algo tambe. Tambe tawata tin un estudiante cu na e tempo tabata na IPA pa e stage y condena e handelswijze di e docente pero no wordo skucha. Si esaki tur ta berdad, sigur e directora, adjunct, IB-der di enseñansa, pero tambe IPA ta cupabel den e situacion aki. Pero ken ta ami, mi no ta hues y mi sigur no sa e historia completamente. Mester tin un investigacion profundo, caminda nan ta investiga cu cuido ken tur sa di esaki, pero no a tuma accion.

Mester por menciona un noticia manera esaki? Segur cu si, pero sin menciona nomber  y pone portret. Mi tambe a pensa tocante mi prome buki cu mi a skirbi. Tambe aki mi por a usa nomber real di diferente persona cu ta bin den e buki. E storia a wordo skirbi cu storianan berdad y mi pensamento, pero pa usa nomber real no ta necesario. E lo bira demasiado personal y hende lo por a keda acusa falsamente pa algo cu nan no a hasi of no sa, pasobra e storia ta skibi dor di mi, di un persona so.

Laga nos pone mas cuido pa otro. Cu nos no usa nomber y portret prome cu nos sa tur e dato. Seguro prome cu un hende ta haya un husticia husto. Especialmente den un isla chikito caminda storia nan ta core lihe. Pero no ta importa con chikito e isla ta, eventualmente e berdad lo triumfa y e persona nan lo haya nan castiga. Aki lo nan por wordo confronta i/o haya nan castiga tambe.