Ciudadanonan mundial ta amplia nan horizonte

Desde april 2021, e website aki a ricibi mas cu 6000 bishita di pagina. Mi kier gradici boso un biaha mas pa esaki. Mi ta contento di sa cu tin mas di 500 bishitante cada luna ta bishita mi website y ta dispuesto pa tuma tempo pa lesa mi columnanan. Tambe mi ta ricibi hopi reaccion positivo via e-mail y posibel temanan Arubiano nobo cu mi por menciona den mi columnanan. E ta un di mi motibacionnan pa sigui skirbi tocante con mi ta mira mundo y bida aki na Aruba. Mi website tambe ta wordo mira den exterior y riba 6 di april mi a ricibi mi prome reaccion den spanjol riba un di mi columnanan. Un biaha mas, danki hopi y sigui asina.

Mi a haya un email di un docente di Thorbecke Academie na Leeuwarden. E docente a lesa mi website for di Hulanda y a lesa mi column di 12 november 2021, unda mi tabata puntra mi mes kico lo sosode cu e revolucion di enseñansa na Aruba. Ainda tin hopi pa papia di e topico aki y no tin ainda un solucion concreto pa e problema di enseñansa na Aruba. Docenten ta haci nan mihor esfuerzo pa mantene un actitud positivo, pero tambe mi ta sinti cu hopi docenten no ta sinti nan mes aprecia pa e trabou cu nan ta haci. Particularmente pa motibo di politica. E descontento ta existi, pero ya no ta wordo expresa liberamente. Tin hende a laga e speranza bay y tin un sensacion cu no ta bay haci diferencia. E docenten cu a scoge e profesion pa amor pa muchanan y ta mira esaki como nan vocacion, lo prefera di bandona Aruba y sigui nan carrera educativo na otro parti. Mi ta kere cu esaki por bira un problema y e politica mester busca un solucion rapidamente prome cu ta laat.

Despues di un conversacion interesante y ameno, mi a wordo puntra si mi por duna un conferencia na un grupo di studianten for di Hulanda, tocante historia di Aruba y e momentonan di crisis na Aruba. E studianten aki lo mester ehecuta algun proyecto pa nan programa di Seguridad Integral. Ademas, nos a haya e idea ameno di conecta e studiantennan aki cu studiantenan di aña cuater di Aruba. Cu aprobacion di e director, mi a logra motiva un grupo di studiantenan di aña cuater pa un proyecto, cu tambe lo conta pa un trabou final.

Na Koningsdag tabata e ora. E dia cu algun studiante di Colegio San Augustin a topa cu e studiantenan Hulandes di Thorbecke Academie. Mi studiantenan a prepara pa un paseo den e ciudad bieu di San Nicolaas. Riba caminda pa San Nicolaas, bandera Hulandes a biaha den cada rotonde. Un dia promé nan a desidi pa bandera di Aruba tambe ta biaha bou di bandera Hulandes. Pero for di reaccionnan riba Facebook, nan a cambia esaki mesora. E no tabata bon mira. Mi ta sigur cu nan no kier ofende ningun hende, pero tabata duna un sensacion incómodo. Tabata parce manera Hulanda y Aruba no ta miembro igual den Reino Hulandes. P'esei nan a scoge solamente un bandera pa e momento aki.

E dia aki, e studiantenan Hulandes a wordo bonbini cu tompouce oranje y mi a cuminsa mi presentacion. Mi tabata papia principalmente di e periodo di siglo 19 pa 21, unda nos a mira e momentonan di crisis na Aruba. Durante e tempo cu tabata menos bon cu trabou y entrada prome cu e refineria di petroleo Lago. Despues mi a papia di e momentonan di crisis den Reino Hulandes durante e periodo di Segunda Guerra Mundial y e desaster di awa na Hulanda na 1953 y con habitantenan di Aruba a maneha cu esaki. Turismo tambe tabatin su momentonan di menos bon. Manera durante e atake riba Torre di Gemelonan y desaparicion di Natalee Holloway. Mi tambe a para keto na e tema sensibel di abuso infantil na Aruba. Aki nos a papia di e buki di Rita Zecher - "Boa - Aruba in de wurggreep". Rita tabata traha pa dos aña na Aruba como psicólogo di mucha y hoben. Pero door di indignacion di pueblo y cu jerarquia riba Aruba a wordo destrui, tabata mihor pa e bandona e isla. Como cu e tabata tin un grupo grandi di cliente, pero e tabatin e sensacion cu mester a haci algo urgente pa proteha e muchanan di Aruba contra abuso, e a desidi di scirbi un buki. Awor ta 2022 y mi ta puntra mi mes si nos a bin ta saca e tema aki na cla pa añanan? Cuanto hende ta mira e seriedad di e problema? Si esey ta asina, ta esey ta suficiente pa gobierno haci mas pa combati esaki? Mi presentacion a ser cera cu e periodo di crisis di coronavirus, e cultura politico y e banda negativo/positivo di Aruba. Un cos positivo di Aruba y sigur digno di menciona, ta cu nos ta saluda otro semper amistosamente. E ta parti di nos cultura y aunque ta un cos chikito, principalmente turistanan ta gusta ora nos ta saluda nan tur biaha cu un bon dia, bon tardi y un bon nochi. Laga nos mantene esaki, hendenan!

Despues di e presentacion, e studiantenan di Colegio San Augustin a wordo spera na scol y despues di un corto presentacion di nan mes, e studiantenan di Hulanda a splica kico nan estudio ta encera. Despues di esaki, e paseo di ciudad a cuminsa y nos a camin'a via Carnaval Village pa e diferente puntonan unda e studiantenan a presenta nan parti den pareha. Nos a para keto na The Village, entrada di refineria di petroleo Lago, Charlie's bar, bario ros, obra di arte di Lolita y e hopi bon muralnan. Mi studiantenan a haci un trabou excelente y mi ta orguyoso di e manera cu nan a presenta. E studiantenan di Thorbecke Academie a considera esaki un bon oportunidad pa conoce e pueblo y a haya cu San Nicolaas ta sigui ta autentico.

Finalmente, despues di un paseo interesante, nos a yega na Kulture Café den Nicolaas Store. Nos a wordo saluda amistosamente y nos a wordo guia pa un sala special cu a ser reserva pa nos. Aki nos por a disfruta y papia hunto bao di un lunch delicioso. Na final di atardi, tur studiante di Colegio San Augustin a ricibi un bon pen Parker di Thorbecke Academie, pasobra kende ta scirbi ta keda. Nan tabata masha contento cu esaki, pasobra e regalo aki sigur lo ta di gran utilidad awor cu nan lo tene nan examen den un par di dia. E atardi aki tabata un exito pa tur hende y sigur digno pa repiti.