Carnaval, un tempo di fiesta y cuaresma

Algun biaha mi mes ta puntra mi mes si tur esaki tin sentido, si mester skirbi tocante mi eventonan personal of e politico na Aruba y den mundo. Esaki ta e motibo pakiko mi ta skirbi un tiki menos awe? Of e ta dor cu no tur ora mi tin tempo?

Toch mi ta siqui mira e importancia pa skirbi. Por ta mi por inspira mas hende pa hasi esaki tambe. Of pa reflecta riba mi pensamento. Pa asina nos no lubida y retene kiko a sosode. Nos ta lubida masha lihe. Algo cu naturalmente pa e politica ta un bentaha.

Geschiedschrijving ta keda un tarea importante. Geschiedschrijving of historiografia, ta e studia di con historia a wordo skirbi y interpreta durante tempo. Esaki ta hunga un rol crucial den forma nos comprension di pasado y ta influensia con eventonan historico ta wordo representa y analisa. Diferente eventonan por wordo interpreta di diferente manera, dependiendo di nos background cultural, conviccion politico, of experencia nan personal. Esaki sigur tin influencia riba con mi skirbi y mi pensamento tokante diferente topico. Compronde e perspectiva nan aki ta yuda nos pa reconose y evalua criticamente historia. Esaki ta posiblemente tambe un di e motibonan adicional pakiko mi ta sigui skirbi mi articulo nan. Asina evento nan na Aruba ta wordo documenta pa futuro. Pa mas despues mira nan bek riba e comunidad cu tabata existi na e momento nan ei. Pa nos no lubida y pa tin e posibilidad di pensa riba nos futuro. Unda nos eventualmente por siña di nan.

Rond di inicio di e aña aki, carnaval na Aruba a cuminsa atrobe. Esaki ta un aña special pasobra ta 70 aña pasa cu carnaval ta wordo celebra pa prome biaha na Aruba. Y unda un saserdote tabata parti di un grupo den carnaval. E tempo di aña unda tin hopi fiesta, diversion, musica, baile y bisti nan colorido. Pero tambe e tempo di hopi alcohol, comportacion negativo, detencion y accident den trafico. Toch e ta e tempo mas dushi pa hopi hende. Mescos cu tur e mensahe positivo pa nos turismo, mi ta contento cu tur cos afortunadamente a caba.

Diasabra y diadomingo pasa tabatin e dos gran y ultimo carnaval parada na Aruba. Aña pasa tabata mi prome biaha cu mi tabata na manda di e parada cu famia pa mira e parada di carnaval na San Nicolaas. E biaha aki atrobe mi tabata schuin tegenover Pacifico Restaurant. Tambe e biaha aki mi tabata kier mira mi ruman, kende, manera hopi den su bisti di carnaval, cu a trese un impresion positivo y colorido. Aki mi opinion no ta di balor grandi, pasobra y ta mi ruman. Pero toch. Tambe mi a nota cu, apesar di un campaña pa proteha bo mes kontra e musica fuerte, hopi hoben ainda tabata mira Carnaval sin usa earplugs. Cu hopi mucha ainda tabata keda despierto te laat den anochi y asina nan ta perde nan descanso y desaroyo. Pero manda di esey, carnaval di e aña aki tabata grandi, colorido y bunita pa mira. Cada aña atrobe, carnaval ta un promocion hopi grandi pa Aruba cu segur ta trese hopi placa.

Pa mi tabata e prome biaha cu diasabra pasa mi a mira un grupo di voluntarionan cu vest berde kende ta reparti saco di sushi berde na e publico . Tabata un accion di Common Good organisa dor di e partido politico AVP, bao liderasco di Mike Eman. Mi a considera esaki un bon iniciativa y mi no tabata sa cu nan tabata hasi esaki cada aña den temporada di carnaval. Apart for di e echo cu esaki ta bon pa medio ambiente, naturalmente tambe ta un bon forma di promocion. Petje af pa e voluntarionan cu, bou di solo cayente, ta cana rond pa yuda Aruba.

Di e manera aki nan ta mustra e contacto positivo entre e pueblo y e politica y nan ta traha pa pueblo. Mi ta sinti cu cada biaha mas ta crea un distancia inmenso entre pueblo y e politica awendia. Y cu e pueblo cada biaha ta wordo laga pa nan so, durante of entre periodonan di gobernacion. Hende ta critica esaki, pero esaki ta wordo cubri na momentonan cu tin otro eventonan of noticia. E periodo di carnaval ta un bon ehempel y un momento sumamente adecua pa ceda pueblo calma. Pasobra duna nan pan y wega y pueblo ta ceda calma, pa asina laga e politica sigui nan caminda. Pueblo ta wordo laga nan so den hopi caso, resultando den e sistema politico "actual" di Aruba cu solamente ta wak pa ganashi personal den nan mes un amigonan y famia.

Hopi di e parlamentarionan no ta ehecuta nan trabou di manera optimal. Nan no ta semper presente na reunionnan importante unda decision mester wordo tuma pa beneficio di e pueblo. Pero ainda nan ta wordo paga na final di luna. Ki dia e politica ta siña bek pa traha pa pueblo? Nos por laga nos pasado atras y mira pa dilanti? Cua di e partido politico bieuw lo siña di nan errornan? Pa skohe, embes pa nan mes, pa e pueblo? Cual partido politico na Aruba lo duna e prome step? Of lo tin un partido nobo cu ta desea di hasi un comienso nobo? E ta depende di nos, e pueblo, pa determina esaki.

Ayera, riba dia di San Valentin, nos a haya nos shinishi na misa y esey ta marca e comienso di e temporada di cuaresma. Un tempo pa refleciona. Un bon momento caminda nos por para un rato y pone nos acto nan riba un balansa. Nos ta haya oportunidad di mira pa dilanti y duna forma na nos acto nan di un manera corecto.

Naturalmente tin momentonan tambe unda politica a sirbi pueblo berdaderamente. Momentonan unda e gobierno a yuda henter poblacion Arubiano. Den corant di 14 februari nos ta lesa na e prome blachi cu Ex-minister Plenipotenciario G. Besaril ta keda deteni y e investigacion lo sigui den e caso bao di nomber Tulipan. Mi ta sigui puntrami con hende por a keda na nan posicion. Un minister cu den kabinet Wever-Croes I a bira minister Plenipotenciario den e periodo di 17 november 2017. Unda trahado di Arubahuis a pone e minister-president na altura, riba diasabra 1 mei 2021 di e acto nan na Arubahuis y no a tuma ningun medida. Mescos cu G. Besaril por a hasi campaña y den kabinet Wever-Croes II, for di 20 september 2021, por a bira minister Plenipotenciario bek. Ta parce manera den caso di ex-minister P. Croes y O.B. Sevinger. Mescos cu nan tabata sospechoso y keda deteni, toch nan a keda cu un luga den parlamento of nan a keda kandidata pa eleccion. Personalmente, mi ta kere cu integridad mester hunga un rol y pa principio no por acepta e rol di parlamentario of minister. E no mester ta importante con dushi e stoel di parlemento of minister ta. Tur ora bo mester ta un ehempel pa pueblo. Afortunadamente, for di loke mi spera, den e caso di Tulipan, derechi lo triunfa na final.