Bo mes un conviction

Despues di un tempu largu mi a desidi pa bai mira un cantidad di episodio di e serie dramatico Mericano "Tour of Duty". Un serie cu tabata sali na televicion for di 1987 te cu 1990 tocante di e gera di Vietnam. E serie aki ta consisti di tres temporada i ta cuminsa na aña 1967 den un campamento basico di Chu Lai. E di dos temporada ta cuminsa na januari 1968 i ta tumando luga mayoritariamente na e base di avion Tân Són Nhút na Saigon. Den e ultimo temporada e pelotón ta stasiona na Camp Barnett i nan ta forma parti di un unidad Special Force. Na e ultimo episodio di e ultimo temporada e operashonnan ku e peloton mester a realisa a ser para i un peloton nobo a ser forma.

E serie a ser transmiti na Hulanda entre 1990 te cu 1993. Mi tabata di diez aña na e momento aki i na e tempo ei mi tabata hopi interesa den tur loke tabata relashona cu e molester. Aki no tabata trata di e importansia historico di e molester ni mucho menos mi tabata sa algo tocante di e gera di Vietnam na e momento ei. Mi tata a contami tocante di un episodio tckante di soldanan cu tabata sali riba diadumingo anochi na un ora lat. P'esei mi no por a mire na mi edad chikito. Pero mi tata a duna mi permiso pa mira e serie aki i tabata hopi amabel pa graba cada siman un episodio riba su videorecorder VHS. For di e momento ei mi tabata mira Tour of Duty tur siman i esaki a bira un parti importante di mi infansia. Diamars atardi despues di scol tabata mi momento pa mira un episodio mas. Mi tabata anhela esaki tur siman. Tambe e musica di e añanan 60 i 70 cu tabata sali tur siman durante di e episodionan aki a bira parti di mi selekshon di musica favorito. E trasfondo historico di e gera di Vietnam no tabata hunga un rol na e momento ei, pero esaki a cambia despues ora mi a cuminsa studiá mas di historia. Despues bo ta mira cu e serie aki tabata nobo na e tempo ei pasobra e tabata trata problemanan social manera racismo, crimen militar i uso di droga. E conosemento historico a yega mi algun aña despues i mi tabata di opinion cu e gera di Vietnam no mester a tuma lugá. Hopi solda a muri pa nada. I ainda asina bo tabatin comprenshon i simpatia pa e soldanan cu bo a cuminsa conose pa medio di e personajenan diferente den e serie. Nan tabata e rolmodelnan cu bo tabatin respeto pa nan.

E ultimo episodio di Tour of Duty "Payback" ta mustra e tragedia di e gera di Vietnam na diferente manera. Esaki spesialmente pa e soldanan ku a sirbi nan servisio na Vietnam òf cu ainda mester a sirbi nan servisio. Dos personaje di e serie, Alberto Ruiz i Danny Purcell, cu a sirbi nan servicio exitosamente i a bolbe Aruba, a trata di mantene nan mes den bida normal. Esaki no tabata semper posibel. Nan a topa cu hendenan cu nada di nada no kier a tende di e gera di Vietnam. Nan a ser confronta cu hendenan cu den nan bista ta mira e gera aki innecesario i un desperdisio di tempu.

Loke mi kier enfoka riba dje aworaki ta e fragmento den e ultimo episodio di Tour of Duty cu Danny Purcell, unda e ta sinta hunto cu un colega di trabou den un restaurante Mericano wardando un cita cu un dama. E dama aki, Billie Jean, a bin hunto cu su amiga Lucille, kende tambe tabata e amiga di e colega di Danny. Nan a haci conosí. Danny ta impresiona pa Billie Jean i e momento aki ta pa e conoce mas di dje. E topamento aki a cuminsa un poko nervioso, te ora Billie Jean a puntra Danny kiko e ta traha. Danny a bisa cu el a sirbi como solda na Vietnam i awor a bolbe Merca pa algun luna. Awor e ta traha como carpinte. Billie Jean a puntra si esaki no ta molestie. Danny no por a compronde su pregunta. Esei tabata e fin di nan topamento. Billie Jean a lanta i a bai, pero a papia cu Lucille promé.

Billie Jean tabata rabia cu Lucille. E no por a cere cu Lucille a laga nan haci conosi cu un hende cu algun luna pasa tabata na Vietnam i a mata hende inocente i a kima nan casnan. Hopi di e soldanan tabata adicto na droga i e no por a kere cu Lucille ta kere cu e lo sali cu un persona asina. E no tabata asina hipocrito tampoco i a bai. Lucille a bolbe na mesa i e uniko splicashon cu e por a duna Danny tabata cu ta trata di e gera i cu e ta cinti pica. Danny a gradici Lucille ainda cu desagradabel i desconose.

I despues mi ta pensa pa mi mes, kon dificil esaki lo a bira pa e veteranonan pa tur biaha nan mes mester a defende pa e echo cu nan tabata na Vietnam i nan a lucha cu convicion pa libertad di e Vietnamistanan contra comunismo. Cu nan a wordo yama pa Merca pa tuma parti i cu nan talbes despues a compronde cu Merca a laga nan un banda i cu hopi ta mira e gera aki como perdida di tempo i inneesario. Eksakto esei a keda mustra den un otro fragmeno den e ultimo episodio di Tour of Duty cu e personaje Alberto Ruiz. Alberto ta yega na e conclusion cu el a bai na Vietnam pa nada i hopi a muri pa nada. Pero pa dje mes esaki a significa hopi.

Mi ta kere cu e veteranonan aki a pasa un bida solitario pa hopi tempo. Nan tabata tin nan conviccion y nan deber como soldado na Vietnam y hopi di nan tabata sostene esaki completamente. Durante e guera nan no tabata haya sosten di pueblo Americano mas y nan a wordo laga atras. Malgrado tur e cosnan aki, hopi di e veteranonan a keda orguyoso di loke nan a logra na Vietnam.

Ta dificil pa keda fuerte den bo propio convicion. Specialmente si un gran parti di e poblacion no ta comparti bo convicion. Bo ta keda para tras bo punto di bista? Ainda si bo ta fout? Bo por admiti cu bo tabata fout? Of bo ta bay contra dje, ainda si bo tabata fout? Y loke ta pasa si finalmente bo ta resulta tin rason pa bo conviccion? Otronan por laga nan orguyo a banda y duna bo rason?

Mi ta kere cu finalmente bo mester keda para tras bo propio convicion. Ainda si e por resulta den soledad y no comprension di hopi. Mi ta kere cu e manera aki bo no por y no lo perde bo mes. Mi ta nota cu awendia hopi ta tuma e caminda mas facil y no ta scoge pa nan mes. Sin pensa nan ta haci loke mayoria ta spera di nan. Ainda si bo tin bo dudanan. Bo ta biba pa contenta otro? Of bo ta biba pa bo mes? Bo por mira bo mes den spiel ainda si bo resulta di ta fout? Nos ta asina asusta pa wordo mira diferente pa otro? Mi ta kere cu bo mester keda semper husto cu bo mes y cu otro. Cu bo mester keda puntra bo mes na momentonan specifico si bo ta haciendo loke ta bon. Bo convicionnan ta coresponde cu bo pensamentonan propio? Ainda si esakinan ta wordo considera como normal of abnormal door di hopi. Bo mester sigui sostene loke bo ta para pe. Keda semper cu bo principionan. Con dificil esaki por ta na momentonan. Y si finalmente bo resulta di ta fout, ajusta bo conviccion. No keda menti pa logra bo rason cu otro mientras sa cu bo ta fout. Sea husto y admiti bo fout. Esaki finalmente lo no wordo mira como debilidad, pero como completa forsa y hopi curashi.