Bierna Santo y Pasco Grandi: Tempo pa reflexiona y reconciliacion.

Pasco Grandi y Bierna Santo ta dos dia di celebracion importante pa hende Cristian. Aunque pa algun hende esaki no ta nada mas cu dianan liber. Pa otro e dia tin hopi balor pa celebra como dia di celebracion religioso. Bierna Santo ta e dia cu Cristian ta recorda cu Hesus Cristo a wordo crucifica. E sufrimento y morto di Hesus ta hopi importante. Ta un dia di reflexion, pa refleha riba e ofrenda cu Hesus a hasi pa humanidad. Pero tambe por mira Diabierna Santo como un dia di reconciliacion. Ta un dia pa refleha riba con nos mes por aporta pa un mundo mihor y con nos por traha riba reconciliacion y paz.

Mi tambe ta trata di duna mi mes e meta aki. Siman pasa un persona a puntra mi si mi no tawatin plan pa skirbi un segundo buki tocante mi experencia despues di mi divorcio. Mi no tin miedo pa expresa mi sentimento, pero mi mes no tin e necesidad aki. Mi por kere cu ta interesante pa wak e proceso. Aki tin un grado di reflexion personal cu ta necesario.

Unda mi ta para awor den bida? Dia 7 di maart 2022 mi a skirbi un column cu titulo "Un tempo di reflexion". Mi tabata papia tocante un poster cu shete punto cu mi kier a pone mas atencion na nan. Despues di un aña, mi a duna mi mes e pregunta si mi a logra mi meta. Durante e periodo di reflexion y reconsideracion den e tempo di Pasco Grandi, mi ta pensa bek riba mi periodo prome, durante y despues di mi divorcio.

1.      Hasi paz cu bo pasado.

Mirando bek mi ta mira cu un periodo di seis aña ta un situacion tristo. Tabata un tempo unda mi a wordo forma positivo na Aruba. Unda mi a biba hopi momento bunita y a topa cu hopi hende nobo. Momento nan cu mi a comparti amor y dolor. E aña nan bunita a pasa rapido. Awor e recuerdo di esaki ta keda inadecua door e pensamento cu na e principio di mi relacion mi tabata den un mentira. Mi no por a kere esaki. E fe den Dios tambe ta keda dificil pa mi. Pakiko nan mester a hasi esei? Pa trata e ser humano asina? Nan mes no a biba momento nan bunita? Of e momento nan no tabata di balor pa nan? Nan a sinti feliz durante e periodo di seis aña? Mi no por kere asina, pero ta parce cu nos a perde seis aña di nos bida. Sinembargo mi mester tene e momento bunita den mi memoria y hasi paz cu mi pasado. Seguramente nan tin un bon motibo pa keda den un mentira. Of mi mes ta mira esaki robes? Probablemente e tabata tin hopi dificultad. Dicon nan por hasi esaki den tanto tempo? Mi mester perdona nan, pero ainda e ta keda dificil. Nos dos a perde.

2.      Kiko otro ta pensa, no ta bo asunto.

Anteriormente mi tabata preocupa mas kiko otro ta pensa di mi. Tanto den sentido negativo como positivo. Awor no ta interesa mi y mi ta conose cu segur tin hende cu no ta gusta mi. Esey no ta un problema, mi mester respeta nan. Segur tin hende cu ta rabia pasobra mi a skirbi un buki. Pero, e expresion Hulandes ta bisa : “Wie de schoen past, die trekt hem aan”. Esaki tawata mi manera pa procesa mi dolor y busca contesta. Tambe tawata un manera pa yuda hende mira nan mes den spiegel y asina nan por comprende nan error. Caminda nunca nan a papia cu mi honesto cu mi y mi tawata busca un manera pa comprende tur cos mehor. Den un relacion bo por hasi falta na tur dos banda. Tambe mi mester a tuma otro decision. Ora mi ta topa cu hende di antes, e no semper ta facil pa mi. Algun biaha e ta causa inseguridad y mi ta prefera evita e sentimento ey.

3.      Tempo ta cura casi tur cos.

Duna cos tempo. Un tempo di confusion y soledad a surgi. Tur cos cu mi tabata traha riba, cu mi tawata stima, y cu mi tawata haña mi motivacion y pasion di bida, a yega un momento cu tur cos a keda den un gran confusion. Mi mester a haña mi mes bek pa mi por a bira feliz di nobo. Esaki ta tuma hopi tempo y aki ainda mi sigur no a logra tur cos. Mi a trata di yena mi bida di diferente manera y musica a yuda mi. Mi a nota cu e canticanan di e artistanan John Mayer, e grupo Hulandes Racoon, y Niels Littooij ta conosi den mi bida. Cu Niels tabata cuminsa den 2013 cu e cantica cu titulo "Hoe". Aña pasa e a lansa un otro cantica cu titulo "Grijs", den cua mi a keda identifica hopi cu e texto. E por ta un tentacion pa busca distraccion of busca un relacion nobo, pero esei ta hopi biaha no e mehor manera pa maneha e dolor. Esey tambe ta den mi caso. Mi ta tuma e tempo pa sinta e dolor y procesa mi emocion. Mi mes no ta spera cu ta dura asina hopi tempo. Tempo ta finalmente cura casi tur cos.

4.      No ta bon pa compara bida di otro y hunga husticia riba dje. Bo no sa cua biahe nan ta bayendo y cua desafiando nan ta enfrenta.

Un divorcio por trese hopi sentimento di duele. E no ta importante si bo tawata e persona cu a termina e relacion of e persona cu a keda abandona. Ta normal pa pensa riba kiko por a bin otro manera y kiko bo por a hasi diferente. Ta importante pa reconose e sentimento aki y cumpronde nan, pero tambe pa no sigui castiga bo mes cu pensamentonan di culpabel y duele. Puede ser cu mi no mester a skirbi un buki. Pero bon, ta asina cos a pasa. No tin sentido pa keda wak riba kiko a pasa. Mi mester pordona mi mes pa e fayonan cu mi a hasi. Ta humano pa hasi fayonan y ningun hende ta perfecto. Door di perdona mi mes y asepta cu mi no por a controla tur cos, mi por haña un sentimento di paz y aceptacion. Esaki no ta nifica cu mi mester ignora of minimalisa e fayonan, si no cu mi mester reconose nan y siña di loke a pasa. Mi mester enfoca riba mi mesun crecemento personal y asepta cu bida tin cos nan desagradabel y imprevisto. E manera aki mi por siña di e divorcio y finalmente biba un bida mas feliz.

5.      No pensa hopi. Bo no mester tin un respuesta riba tur cos. I bo lo mira cu contestanan ta presenta nan mes na e momentonan mas inespera.

Na algun momentonan ta difícil pa no pensa riba tur cos cu a sosode. Esaki ta traha e pregunta: "Pakiko?" Mi mester acepta cu mi no lo haña un contesta. Pero mi a mira cu ora tempo ta bay, e contestanan ta presenta nan mes. E momentonan pa mi ainda ta keda tristo. Un paso importante pa acepta cu ta normal pa sinti sufrimento y inseguridad despues di un divorcio pa papia cu un persona di confiansa, manera un terapeuta of un bon amigo, pa organisa bo pensamento y traha riba bo confiansa. Cu famia serca of amigonan mi tin e sorto di conversion, pero algun biaha mi no ke molesta esnan aki cu mi problema y preocupacion.

6.      Niun hende ta responsabel pa bo felicidad, maske bo mes ta responsabel pa esaki.

Awor mi ta pasa mayor parti di mi tempo hunto cu mi amigonan y famia. Mi ta duna mi mes regalo di actividadnan relahante, of mi por ta buska un momentp di sosega pa mi mes. Bo tin mester di tempo pa cura, y despues tin mester di reflecta riba kico bo ta y kiko bo ke pa bo bida. Hopi hende ta perde parti di nan mes den un relacion y laga nan interes y pasion un banda. Mi no a perde ningun parti di mi mes den e relacion, mi a keda hunto cu mi mes. Awor ta e momento pa mi bay back pa mi mes identidad y busca kiko ta hasi mi feliz. Kisas cu un hobby nobo, hasi un biahe, of challenge mi mes pa siña algo nobo.

7.      Hari, e problema den mundo no tur biaha ta bo responsabilidad.

Mi ta sinti mi envolví cu loke ta sosode den mi bario y den mundo. Pero ta importante tambe pa enfoca riba e lesnan cu mi por siña for di un divorcio. Kiko mi a siña tocante mi mes y kiko mi tin mester den un relacion. Personalmente mi no ta bay den un relacion nobo lihe. Nan a hasi mi hopi dolor y mi no ta sa si mi por duna mi henteramente bek den e confiansa mutuo cu bo tin den un relacion saludabel. E lesnan bo por hiba den un relacion nobo pa haci esaki mas saludabel y mas fuerte. Door di refleha riba e preguntanan y conose bo mes miho, bo por crese como persona y comprende miho kiko bo ta buscando den un relacion.

Ta importante pa wak pa dilanti y sigi traha riba bo crecemento personal y felicidad. Por ta tentado pa keda atrapa den pasado, pero na final mester sigi dilanti y sigui biba. E simplemente ta tuma tempo. Bo ta trata pa enfoca mas riba oportunidadnan nobo, tanto den bo bida personal como profesional. Tempo ta cura casi tur cos.

Tur dos e celebracion no ta representa solamente un significado religioso, sino tambe un valor universal manera reflexion, reconcilia, speransa y alegria. E momento pa bin hunto cu amigo y famia y disfruta di bida y di e oportunidadnan nobo cu e ta duna nos. Laga nos hasi uso di e momentonan aki pa pensa riba loke ta berdaderamente importante den bida y pa traha un mundo mas mehor pa tur hende. Bon Pasco di resureccion!