2147 homber a firma por nada?!

Na Aruba tin un historia rico cu a forma ken nos ta awe. For di e poblacion Arawak indjan te ora cu Spaño a yega, colonisacion Hulandes y finalmente e Status Aparte na 1986, nos pasado tabata diferente y emocional. Pero kico ta sosode si nos no tin unidad historico?

Segun e minister-presidente Evelyn Wever-Croes di Aruba, 2023 ta e aña di unidad y positivismo, unda tur hende mester traha riba dje. Mi ta supone cu nan ta referi tambe na e unidad historico di Aruba. Mi tin duda tocante e palabra aki, caminda unidad no por ta aplicabel pa tur hende. Pasobra falta di unidad historico por resulta den division y conflicto den nos comunidad. Sin un identidad y vision di futuro conhuntamente, diferente comunidad y grupo por sigui nan mes agenda, lo cual porresulta den falta di cooperacion y confiansa. Sin un comunidad di comprension y aprecio pa nos historia, nos herencia cultural por wordo lubida of neglisha. Esaki por resulta den perdida di monumentonan y edificionan importante cu ta representa nos pasado.

Ora falta di unidad historico na Aruba, esaki por resulta den division entre e poblacion. Den pasado, diferente grupo riba e isla a yuda pa nan derecho cultural y politico. Esaki a resulta na tension y conflicto entre diferente grupo. Door di preservacion di e historia di diferente grupo, por crea comprension y respet pa nan lucha y historia, y por evita division.

Un bon ehempel di e importancia di unidad historico na Aruba ta e celebracion di bandera y himno riba 18 di maart. Di tur simbolo, e bandera y himno ta e simbolo mas importante cu por crea unidad. Betico Croes a mira e importancia di tin un propio bandera y himno pa Aruba, pasobra "Un pais sin bandera y himno ta un pais sin destino". Betico Croes a sugeri pa riba 18 di maart 1976, e bandera y himno di Aruba a ser honra pa prome biaha na Wilhelmina Stadion na Dakota.

Pakico a scoge e fecha di 18 maart? E fecha aki a wordo scogi specialmente pasobra durante Conferencia Mesa Rondo di 1948 na Hulanda, riba e mesun dia aki pa prome biaha un peticion a worde presenta na Reina Wilhelmina, bou di liderazgo di Cornelis Albert (Shon A.) Eman, pa autonomia pa Aruba. Pa duna mas forsa na e peticion, esaki a wordo firma pa 2147 homber Arubiano, pasobra hende muher den e tempo ey no tabata permiti pa vota.

Un di e 2147 hombernan aki tabata mi welo, Florito "Toribio" Ras. Naci na 17 di april 1920. Cu su 27 aña di edad, durante e reunion den cas di Sr. Benedito Briezen na Juana Morto, ariba 18 di oktober 1947, e tambe a firma pa independencia pa e isla. Orguyoso mi ta sinti di mi welo, cu tabata biba den un tempo unda ainda no tabatin rivalidad entre MEP y AVP y unda interes general tabata primordial. Mi ta di opinion cu Betico sigur tambe a experencia e dia aki como hopi importante y ta p’esey el a sugeri pa e inauguracion di e dia di bandera y himno tuma luga riba 18 di maart.

Mi tabatin speransa cu durante e celebracion di 18 di maart di siman pasa, e gobierno actual lo a keda para un rato na e monumento di 18 di maart dilanti di Wilhelmina Park. Na e manera aki, minister-president por a representa. Pero esey lo keda probablemente un soño. Mientras e ta papia di unidad. No tabatin ni un representante di e gobierno presente. Tur ceremonia publico a tuma luga na Plaza Libertador Betico Croes.

Sinembargo, e monumento no a keda lubida. Miembronan di e partido politico AVP a para un rato na e luga aki y a depone dos krans. Un krans tabata ofreci pa famia Eman y un otro krans tabata ofreci pa miembronan di e partido AVP. Desafortunadamente, mi no por a asisti, pero si mi por tabata presente, mi lo a haci esaki sigur. Na e proximo oportunidad mi ta spera pa ta presente. Esaki no ta haci mi amor pa Aruba menos. Mi ta kere cu tur hende ta celebra 18 di maart na nan manera. Pero mi ta desea di a mira un representante di e gobierno presente pa crea mas unidad den nos comunidad.

Dicon e gobierno actual no tabata presente na e monumento di 18 di maart y pone un krans? Tin algo di relacion cu e estatua di Cornelis Albert (Shon A.) Eman cu ta aki y p’esey e gobierno actual ta prefera mantene distancia di e monumento? Of ta relaciona cu e limitacion di espacio na e monumento? Of esaki ta relaciona cu tin e pensamento cu e partido AVP den pasado no tabatin balor pa un bandera y himno y a bende e lucha pa autonomia pa beneficio personal y posicion? Haci e evento aki den historia menos importante cu e lucha pa Status Aparte di Betico Croes? Mi ta haya e impresion cu no ta duna importancia na e echo cu e 2147 Arubiano a firma pornada?

Personalmente mi ta haya esaki ta un falta di respet. E celebracion na Plaza Libertador Betico Croes por duna e pensamento cu e peticion no tin balor y ta conta e prestacion di Betico Croes so. Kisas e celebracion mester tuma luga na un luga mas neutral manera dilanti di e oficina gubernamental. Despues por scoge pa pone un krans na e monumento di 18 di maart y uno na e estatua di Betico Croes na Plaza Libertador Betico Croes.

Asina ta conmemora e historia di Aruba na 18 di maart den su totalidad y por fortalece e unidad di e manera aki. Pero esaki ta loke e hendenan kier? Of ta prefera pa mantene e politica di dividi y domina? Y nunca lo tin unidad aki.

E preservacion di unidad historico na Aruba ta di gran importancia pa futuro di nos isla. Mester tuma mas iniciativanan pa mira historia di nos isla manera unidad y pa comparti esaki cu e generacionnan nobo. Esaki por tuma forma pa medio di organisacion di exposicion, programa educativo y haci intercambio cultural entre diferente grupo di poblacion y partido politico.

Ademas, ta importante pa gobierno y educacion forma parti di esaki. Por ehempel, gobierno por duna subsidio na e organisacionnan cu ta dedica nan mes pa preserva historia y cultura di nos isla. Educacion por inclui historia y cultura di nos isla den curriculum, pa asina e generacionnan nobo keda consciente di e historia rico di nos isla y e diferente gruponan den nos poblacion cu a contribui na esaki.

Laga nos ta consciente cu unidad historico na Aruba ta di gran importancia pa futuro di nos isla. Laga nos traha duro pa preserva historia y cultura di nos isla, pa asina e historia rico aki keda preserva pa e generacionnan den futuro.