Un dia yena cu dignidad y respet!

Dia 4 di mei nos ta conmemora no solamente na Reino Hulandes, pero tambe na Aruba e victima nan di Segunda Guera Mundial y situacion nan di guerra despues di esey. E conmemoracion aki tin hopi importancia pa e isla, pasobra ta recorda nos cu Aruba tambe a involvi den e periodo scur aki den historia.

Aunke Aruba no a keda ocupa durante Segunda Guera Mundial, e isla tabata di hopi importancia strategico pa e alianza y e Aleman nan. Esaki particular dor di Lago Oil & Transport Company y Arend Petroleum Maatschappij (Eagle). Hunto cu Corsou, Lago a procesa 80% di e demanda di kerosin pa British Royal Air Force. Na 16 di februari 1942, un atake aki riba hemisferico west a wordo hacie pa e submarino Aleman U-156 riba Aruba. Pero door cu e submarine a explota e rafineria no a haya daño. Solamente tres boto di tanki di petroleo a wordo torpedia.

E conmemoracion di e victima nan riba 4 di mei ta un momento importante pa Aruba pa keda recorda riba e historia aki y pa honra e victima nan. Ademas di Boy Ecury, ta conmemora tambe e 128 Antiyano for di Aruba, Boneiro y Corsou. Door di Conmemora, nos ta munstra cu nos ta consciente di e impacto di guerra y cu nos ta mustra apresio pa esnan cu a duna nan bida pa nos libertad y pa e libertad di otro.

Pasobra Aruba mes no a wordo ocupa dor di Alemania, ta normal pa mira Dia di Libertad riba 5 di mei manera un dia di trabou. No tur hende na Aruba ta keda recorda e dia. Pero toch, tin un grupo chikito di hende cu cada aña ta keda presente pa e conmemoracion di 4 di mei.

Aña pasa e conmemoracion aki a resulta den un decepcion grandi. A wordo cometi falta, cu no por a sosode. Esaki dor di e maestro di ceremonia cu a falta un pagina di e programa cu a resulta den e ceremonia no wordo sigi manera ta supone. Cu ta resulta cu no a toca e Taptoe na tempo, e dos minuut di silencio a wordo interumpi dor e maestro di ceremonia y e himno nacional di Aruba y Hulanda no a wordo toca despues di e dos minuut di silencio. Mi a expresa mi mal contento na e organisadornan di Camarada y na e Marinekazerne di Savaneta. Mi tabata spera cu den futuro, conmemoracion di 4 mei lo wordo conmemora na un manera digno y corecto. Ta sigur no ta solamente dor di mi comentario y column di aña pasa. Mi ta sigur cu otro tambe tabatin otro experencia di e conmemoracion di aña pasa y cu nan tambe a expresa nan descontento.

Awe e conmemoracion tawata masha solem. Cu un sentido di dignidad y respet. E organisacion, maestro di ceremonia, scout, DOW (Dienst Openbare Werken) y otro personanan involucra por ta hopi orguyoso di e dia aki. No solamente e dia aki a wordo conmemora cu sentido di dignidad y respet, pero tambe nan a tuma berdad e tempo y energia pa asina e dia por a bira un dia solem. E biaha aki mi tata y ami a wordo sorprendi. Normalmente nos ta para e auto na banda di L.G. Smith Boulevard. Na e rotonde di John F. Kennedy Education Center e caminda a wordo serka y mi mester a drenta Vondellaan. Mi a logra para mi auto mas of menos na Beth Israël Synagoge.

Desdi ayera DOW tabata ocupa cu pone e luga na unda e monumento ta na ordo. Mi a sorprendi un tiki pasobra mi no a mira e plaket di brons cu ta na e monumento di Antiyano. Sinembargo ora mi a yega e plaket a keda cla y nan a tuma tempo pa limpia e plaket di brons aki. Den e forma aki, e texto den brons a sali den claridad danki na e solo, asina cu por a lesa e texto hopi miho. Ademas, un tapijt cora tawata poni pa yega te na e monumento. Aña pasa no tawata tin esaki.

Rond di diescinco pa seis e unidad di Mariniers tabata para como wacht arma. Bandera di Aruba y Hulanda ya a wordo baha mitar di e mast. Awor ta spera pa Gobernador Su Excelencia Alfonso Boekhoudt, cu enbes di pasa pa Adriaan Lacle Boulevard, e biaha aki el a bin via L.G. Smith Boulevard. Un cambio cu ta wordo hopi aprecia, ya cu awor asina e persona no tabata sufriendo di e autonan cu ta pasa durante e ceremonia.

Minister-president tawata presente cu algun minister y e comisario di polis, cu a keda ausente aña pasa. Mi a keda cu e importancia di comemora awe a risibi un balor extra y respet. Esaki ta algo cu mester di wordo aplaudi. Despues di e oracion di un pastor militar, Gobernador a pone e prome krans y e minister-president a papia algun palabra pa e publico. Tambe un poema a wordo lesa. Prome cu seis or e Taptoe a wordo toca, despues e dos minuut di silencio a wordo obserba. Adecua di e Taptoe cu por cousa kippenvel, e momento mas bunita y imprecionante a bini despues di e dos minuut di silencio. Rondona cu silencio, dos tripulantenan di Mariniers a toca e dos himnonan nacional cu respet y dignidad. Prome e Himno di Hulanda y despues e Himno di Aruba. Despues a pone e resto di e krans nan y tur hende por a tuma afscheid riba un manera respetuoso dilanti di e monumento.

Sigur hopi diferente cu con a bay aña pasa. Mi kier enfatisa pa esaki e dia awe mi no lo lubida pronto. Cu nos por comemora e dia aki hunto na un manera digno y cu hopi respet. Pa recorda na un manera respetuoso na e victima nan di gera. Pa nos por biba den liberdad y paz y cu manera aki nos lo nunca lubida e recuerdo di e victima nan y nan ofrenda.