"Temponan a cambia!"

"Awe mi ta para aki pa bo. Manera bo Rei y parti di gobierno, awe mi mes ta duna e disculpa nan aki. Nan ta intensamente sinti dor di mi curason y alma. Pero pa mi tin un otro dimension personal tambe. Trafico di esclavo y sclavitud ta wordo reconosi como un crimen contra humanidad. Stadhouders y Rei di cas Oranje-Nassau no a tuma ningun accion contra esaki." - Rei Willem-Alexander (Monumento di sclavitud - Amsterdam 1 juli 2023)

Awe, 1 juli 2023, na Keti Koti, a cuminsa tuma encargo di e historia di sclavitud na Monumento di Sclavitud den Oosterpark na Amsterdam. Bandera nan di Surinam, Corsou, St. Maarten, Boneiro, St. Eustatius, Saba, Aruba y Hulanda a wordo pone halfstok. Un dia historico caminda Rei Willem-Alexander lo duna cu disculpa pa prome biaha. Loke tur hende sigur tabata spera, esaki a bira realidad awe. Rei Willem-Alexander a duna su disculpa pa pasado di sclavitud Hulandes y a pidi pardon. Awe tambe a cuminsa aña di conmemoracion, pasobra 150 aña pasa un fin a pone na sclavitud den tur colonia di Hulanda.

150 aña of 160 aña pasa? Pasobra e fecha oficial tabata 1 juli 1863. Pero pakiko ainda e fecha di 1 juli 1873, 150 aña pasa? Esaki a sosode pasobra abolishmento a sosode den fasenan. Hende a risibi pago, pero ainda asina nan tabata tin cu keda traha riba plantacion nan te na 1873. E director di NiNsee (Instituto Nacional di Herencia y Historia di sclavitud Hulandes), Urwin Vyent a reacciona cu e palabra: "Bo por bisa un paharito: nos ta habri e cas aki awe, pero bo por sali despues di dies aña."

Awe tabata un evento special y remarcabel, y Keti Koti a wordo organisa na Museumplein. Hunto, por a sigui discurso di Rei Willem-Alexander riba un screen grandi y tur cos a wordo transmiti live. Cada biaha, masha impresionante, tabata e momento ora nan a toca e taptoe y nan a tuma un minuut di silencio. Cu friu riba mi curpa y cu hopi respet y admiracion, mi a mira esaki parti di solemnidad. Mi mester a pensa un momento cortico riba e ceremonia durante Dodenherdenking, caminda por a conmemora di un manera bunita.

Y esaki specialmente pa por mustra reconocemento na luchadonan di resistencia manera Joli-Coeur, Boni y Baron di Surinam, pero tambe Tula di Corsou. Personanan unico cu a lanta nan voz contra ordo establece. Nan no tabata hende cu sigui hunto cu e otro nan y nan a bringa pa libertad, igualdad y husticia. Den nan tempo, nan no a wordo tuma na serio y nan mester a lucha nan so. Ta e mesun personanan special aki cu lo skirbi historia y finalmente haña reconocemento completo.

Tur biaha nan tabata trata di wordo sigui dor di un gran grupo. Pa duna direccion pa e caminda corecto. Un caminda di igualdad, reconocemento y respet. Contra ordo establece, cu no tur ora tabata semper na e banda corecto di historia. Cu ley skirbi no semper tabata hasi e cosnan corecto.

Discurso di Rei y specialmente e palabra: "Temponan a cambia", a wordo risibi cu brasa habri pa hopi hende. Pero ainda tin hopi trabou cu mester wordo hasi. Segun Caribisch Netwerk, papia abiertamente tocante sclavitud na Aruba ainda ta un taboe. Nos mester trata di cambia esaki. Historia mester wordo conta, pa hende por compronde e presente. Hopi hende no ta compronde con Aruba ta manera e isla ta awendia. Duna critica no semper ta wordo aprecia aki. Dor di ta critico, hendenan ta mira bo specialmente como un persona molesto y un seña cu aparentemente bo no ta stima e isla. Na momento di critica y cambio, hende ta keda hopi biaha nan so. Hendenan ta prefera no ta critico y dor di esaki ta sigui otro hendenan sin sa kiko ta kiko. Con menos bo sa, mas lihe otro hende por engaña bo y asina por mantene nan poder.

E hendenan cu compronde historia, no ta sigui otro hendenan sin sa kiko ta kiko. Nan lo keda bataya pa e asunto corecto, ainda ora nan no semper ta ricibi e sosten di mayoria. Historia colonial no ta wordo siña corecto. No tin un metodo di scol cu ta bon y hopi biaha ta skirbi na un manera cu ta primordialmente skirbi pa e "ganado nan di historia". Ainda mester traha duro riba esaki. Nos mester conose nos mes un historia hopi miho y describi esaki na un manera corecto.

Ta na nos pa tur biaha pone nos critico contra diferente instancia nan y hasi nos mes e pregunta si nan ta traha bon. Si historia, specialmente historia di Aruba, ta wordo transmiti correcto. Cu no tur biaha nan kier scoge un bando di historia so pa ilumina. Nos mester garantisa cu tur persona cu tin un gran importancia historico pa Aruba ricibi reconocemento completo cu nan seguramente ta merece. Pa asina tur un di nos por ta orguyoso di nos historia y nos por respeta y aprecia otro den tur sentido.