Ta trata di suficiente partipacion den e mundu empresarial?

E facilidatnan pa hendenan cu limitashon fisico na Aruba i e problemanan cu esaki ta trese cu ne, a bin mi atenshon algun siman pasá. Por ehèmpel un hende a puntra mi si mi a mira e programa "Je zal het maar hebben" riba televishon Hulandes. E tabata sali riba diaweps 20 di april 2022 i e tabata toca entre otro di Clifford, un persona di Aruba. E ta biba na Rotterdam, 34 aña i a nase cu un lugá habri na su espalda. Su tela muscular a ser afecta. Clifford no por cana i tin un atraso den enseñansa. E ta sinta den un rolstoel i ta trata di fortalese su musculonan via e gym. E ta traha como modelo na Diversity Model Agency, un compania cu ta dedica na duna hendenan cu limitashon físico e oportunidad pa traha como modelo.

Na e final di e programa televisivo e presentador a puntra kiko ta Clifford su gran sueno. El a bisa cu, ademas di modelo, su gran sueno ta pa funda un stichting na Aruba unda e por mustra mucha i hendenan cu limitashon físico cu nan tambe por forma parti di e sociedad. Particularmente na Aruba tin hopi hendenan cu limitashon físico, pero segun dje Aruba no a ser traha pa hendenan cu limitashon i ta dificil pa move cu un rolstoel entre otro. E kier cambia e infrastructura pa hendenan cu limitashon fisico por ta parti di e sociedad tambe. Siguramente un metamentu noble i mi spera cu e por realisa su sueno.

Mi a puntra mi mes si realmente na Aruba, como hende cu limitashon físico, bo no por move liber? E infrastructura no ta adecua pa esaki? Por ehempel na lugarnan publico manera un supermercado, unda no tin un plataforma pa rolstoel of caminda e rayonnan ta masha estrecho pa move cu un rolstoel. I con ta cu e hendenan cu limitashon den nos sociedad? Tin atenshon pa esaki tambe? Mi ta kere cu si, pero talbes no pa suficiente. Mi mester a hasi investigashon. Mi a topa riba Facebook cu Stichting Verstandelijk Gehandicapten i a topa cu señora. E. Tromp, e ta hefe di sekshon di "Centro Man Na Obra". E tin un programa masha yen, pero e kier a haña un cita cu mi. Cu algun pregunta mi a bai bishite.

Atenshon pa hendenan cu limitashon intelektual a cuminsa na Aruba den añanan '60. Señora. Tromp ta traha pa e stichting pa 33 aña caba i a mira e situashon cambia. For di niun atenshon i guia te na brinda zorg pa e hendenan aki den un manera cu nan por desaroya nan mes como hendenan independiente segun nan capacidad. Pero nos no a yega ainda, ainda tin hopi pasonan cu mester tuma.

Riba 9 di december 1964, "Stichting ter behartiging van de belangen van het gehandicapte kind" a cuminsa. For di e momento aki, ainda sin e eksperensia necesario, a cuminsa planea. Tambe política a keda confronta cu e asuntu aki. Na prome instancia a cuminsa cu un luga di sosten pa hendenan cu limitashon grave. Na 1 di november 1973 nan a establece nan mes den un scol bieu na Piedra Plat conosi como "Pasadia Bibito Pin". Tres aña despues a bin un scol pa mucha, Scol "Dununman". Masha pronto nan a constata cu no ta solamente muchanan mester di yudansa. Tambe hende mayor cu ta bibando sin yudansa mester di ayudo.

Na 1980, e stichting a kumpra un cas na Sjabururi, unda Zuster Philothea a cuminsa un luga di sosten pa hendenan cu limitashon mental. Esei no tabata ideal, pasobra e sosten aki tabata consisti di hende grandi, mucha, doble limita, halto i abou. Tur hunto, pero al menos tabatin un of dos biaha pa siman sosten. Na e momento aki nan a realmente mira e necesidad pa yuda e clientenan, manera señora Tromp ta yama nan, pa yuda nan. Cinco aña despues a habri un sentro nobo na Piedra Plat 97-A, esta "Pasadia Bibito Pin", "Pasadia Briyo di Solo" i "Centro Man na Obra".

Awor nan tin un pasa dia pa yiu, pa adulto, un sala di gimnasia y un sentro di guia. Na e centro aki, "Man na Obra", e 75 clientenan di ta haña guia den aprende traha. Asina nan ta haña entrenamento simple den laba auto, corta mata y traha den carpinteria. Nan ta haci e trabou cu entusiasmo. Fundashon ta sigur consiente cu no tur client lo por traha independiente. Mester enfatica tambe cu afdeling Centro Man Na Obra no ta un compania y no tin un meta comercial. Si tin produktonan manera bela hasi na man pa bende.

Antes nan tabata traha cu man, pero e produktonan a ceda sin bende. Awor nan ta prefera traha pa sociedad. Asina nan ta bai traha tres dia pa siman na Fantastic Garden i dos biaha pa siman na Kooyman. Pa empresa Ha'bon Aruba i Martijn Trading Aruba nan ta hasi trabou di empaka. Mayoria di e empresanan aki a wordo aborda pa afdeling pa brinda nan servicionan. Según señora. Tromp mester haci e empresanan Arubiano mas consiente pa kier tuma e clientenan aki den servicio tambe. Preferibelmente pa un trabou cu ta structura i cu mesun akshonnan. Mi mester a pensa riba mi column di 2 di mei 2022 caminda mi ke benta boternan bashi. Talbes e empresa por pensa tambe pa tuma e clientenan aki den servicio. I no pa kita bentaha di nan, pero pa confiansa entre empresa i cliente. Esei ta anda ainda hopi lento. Talbes mester ta mas consiente di esaki.

Ademas di e cuater departamentonan/scol ku nan tin, nan tin dos cas cu cuido di 24 ora. Na e dos casonan aki tin un total di luga pa binti cliente so. Esaki ta simplemente hopi poco. Mester tin mas cas di cuido pa 24 ora. Awor fundashon tin mas planes i a entrega tur nan proyectonan na gobierno. Pero fundashon ta depende di subsidio di gobierno. Nan no tin un fisioterapista ni hende cu ta traha riba nan comunicashon publico i ta obliga pa haci mas tarea. I kiko ta un necesidad mesora, ta un enseñansa di siguimento pa e clientenan aki. Despues di scol basico no tin VSO - Enseñansa Special di Siguimento, manera tin na paisnan manera Merca i Hulanda. Kiko ta pasa ora bo no tin enseñansa di siguimento? Nan tin shete bida aña ora nan termina scol basico, pero despues nan ta bai pa centro di guia caminda hende mayor tambe ta traha. Pues no tin algo extra pa e hobennan aki ainda.

E gobierno anterior, bou di minister di enseñansa sr. Lampe, a mira e necesidad i a promete pa cuminsa cu un VSO. Nan tin un tereno grandi i por a hasi un facilmente. Pa cuminsa nan a haña di e gobierno anterior un trailer so. Miho algo cu nada. Instituto Pedagogico Arubano (IPA) a cuminsa cu Enseñansa Special, pues tin docent. Pero lamentablemente no tin placa pa tuma e docentnan aki den servicio. E personal cu ta traha na e centro di guia ta di 12 persona. E fundashon como tal ta conta cu 90 persona. Tambe e trabounan aki mester a entrega 12.6% di nan entrada. No solamente nan salario a baha, pero tambe nan subsidio. Pues algu cu ta realmente necesario, ta dos biaha mas duro afecta tambe.

Mi por a papia cu señora. Tromp pa oranan largo mas. Cu pasenshi e ta Conta tocante e fundashon i nan planes pa futuro. Tabata un conbersashon interesante. Mi ta pensa cu hopi di nos no sa con grandi e fundashon ta i con cu tur nan amor nan ta cuida e clientenan special aki. Bon, nan no ta na unda na kier, pero progreso tin. Nos no por keda atras. Talbes cu mas publicidad i yudansa di gobierno e consenshi den nos comunidad lo aumenta. Cu un bela oranje cumpra mi a despedi di señora Tromp i a bandona su oficina cu mas conosementu i consenshi cu nunca prome.