Nos fiel amigo: un aliado indispensable

Cada dia, ora mi bay traha mainta, mi amigo cacho ta acompaña mi te na porta di cura di cas. Mi ta despedi y duna e un recompensa chikito. Cada biaha cu mi bolbe, e ta parce manera e a warda riba mi henter dia. Mi cacho, un mezcla di Fila Brasileiro y pitbull, ta saluda mi cu entusiasmo cada biaha cu mi bolbe cas.

Ta conoci cu un Fila Brasilero ta haci conexion fuerte cu su doño y famia. E ta masha alerta y tin un instinto natural pa defende. E ta defende cas, cura y tur esnan cu e kier. Incluso e cacho di mi mayornan, un pug, ta bon amigo cu ne.

Ta conoci cu cacho ta nos bon amigonan. Desde tempo antiguo, hende tabatin cacho como mascota. E relacion cu nos tin cu cacho, ta bay mas leu cu simplemente un relacion entre mascota y doño. E relacion ta hopi fuerte y un cacho ta ser considera como un extension di famia. Cacho ta nos fiel aliadonan y nan merece e miho cuido y atencion posibel. Asina nos por siña hopi di nos amigo cacho.

Por ehempel, pensa riba e forsa di lealtad. Cacho ta increiblemente leal na nan doño, nan lo semper cuida y proteha nos, hasta den situacion dificil. Tambe cacho ta brinda nos sosten emocional y ta duna nos e sensacion cu nos no ta nos so. P'esey cacho ta ser uza hopi como cacho di asistencia pa hende cu limitacion of pa hende cu problema di salud mental. Esaki ta algo di cual nos por siña, den nos propio relacion y amistad. Door di mustra nos lealtad na esnan cu nos stima, nos por fortifica nos relacion y fortifica nos sensacion di conecta.

Pero ademas di nan cariño y lealtad, nos por siña tambe tocante e importancia di presencia y atencion. Cacho mester di movemento y compañia diariamente y nan ta sinti nan mes mas feliz y sigur ora nan ta cerca di nan doño. Mi cacho tin suficiente espacio rond di cas pa move liber. Ademas e ta encanta y ta bira hopi contento ora mi bisti’e e faha di cacho. Pasobra e sa cu nos lo bay cana hunto. E caminata ta brinda nos un manera excelente pa pasa tempo cu nos cacho y na mes momento fortifica nos relacion cu nan. Esaki ta algo di cual nos por siña den nos bida, door di pasa mas tempo cu nos sernan keri y door di enfoca nos atencion riba esnan cu nos stima.

Ademas cacho por siña nos tambe tocante disciplina y entrenamento. Cacho mester wordo entrena pa comporta nan mes na un manera aceptable pa nos sociedad y esaki ta rekeri disciplina y perseverancia. Cacho tambe ta un parti importante di nos sociedad. Cacho ta wordo uza hopi den servicio di polis y rescate. Esaki ta algo di cual nos por siña den nos bida, door di entrena nos mes pa alcansa nos metanan y fortifica nos disciplina.

Ademas cu nos mester tuma responsabilidad den sociedad, nos mester tuma responsabilidad tambe pa cuida nos amigo cacho. Na 2021 tabatin 40,000 cacho y pushi rond di Aruba y ainda ta wordo laga animalnan riba caya. Hende no ta tuma nan responsabilidad. Simplemente no adopta un cacho of pushi si bo no por cuida nan! Na 2019 a crea un plan, e Plan Nacional pa Maneho di Poblacion di Cacho, pa asina soluciona e problema aki. Na 2022 stichting Stimami Sterilisami a logra pa sterilisa 3686 cacho y pushi. Cu ayudo di seis clinica tin e meta pa e aña aki sterilisa 6000 animal.

Cacho ta nos fiel amigo cu ta enrikece nos bida den hopi manera. Nos mester haci nos maximo esfuerso pa brinda nan e miho cuido posibel y respeta nan pa tur loke nan ta haci pa nos. Laga nos haci tur loke ta posibel pa fortifica nos relacion cu nos cacho.