“Ningun hende ta odia mas cu esun cu ta papia berdad." - Plato

Plato tabata un filosofo Griego cu a biba for di 427 prome cu Cristo te 347 prome cu Cristo. E ta un di e filosofonan mas influyente den historia y ta ser considera como un di e fundadornan di filosofia occidental. Un di e obranan mas conoci di Plato ta "The Republic" (E estado ideal), den cual e ta discuti con un sociedad ideal mester ta organiza y con humanidad por mehora su mes. Plato tabata conoci pa su idea tocante berdad, naturaleza di alma y conocimento. E tabata kere cu e mundo cu nos ta wak ta solamente un sombra di berdad y cu berdad por wordo alcansa solamente door di filosofia y contemplacion. E tabata kere cu alma ta existi prome cu nacemento y despues di morto, y cu humanidad tin e responsabilidad pa mehora alma.

E idea tras di e frase di Plato "Ningun hende ta odia mas cu esun cu ta papia berdad" ta bin for di su filosofia tocante berdad y e naturaleza di hende. Plato tabata kere cu berdad semper ta desagradabel pa esnan cu nan mes no kier confronta cu e hechonan, y pa esaki hende ta tende di odia esnan cu ta papia berdad. Segun Plato, berdad semper ta dificil pa acepta, specialmente pa esnan cu kier proteha nan mes contra confrontacion of cambio. E tabata kere cu hende tin un tendencia nace pa biba den ilusion y evita di mester wak cosnan tal como nan ta. Pesey, hende cu ta papia berdad, hopi biaha ta topa cu conflicto cu esnan cu no kier scucha loke nan ta bisa, y ta ser mira como un menasa pa e status quo. E frase di Plato ta sugeri cu papia berdad no solamente ta dificil, pero tambe cu e ta inevitabelmente conduci na resistencia y desagrado. E ta enfatisa cu esnan cu ta papia berdad, mester worde admira pa nan curashi y integridad, pasobra nan ta dispuesto pa acepta e consecuencianan di papia berdad, malgrado e odio cu nan por experiencia.

Ultimo dianan, algun a puntra mi si mi a mira e documental "Harry & Meghan" riba Netflix. Door di hopi noticianan den prensa tocante e buki nobo di prins Harry "Spare" cu a sali for di 10 januari, mi curiosidad a haci mi wak e documental aki na cas. E documental aki ta duna un bista tras di cortina di bida di e pareha, cu hopi atencion pa nan relacion cu e famia real, e media di comunicacion y den nan decision pa laga e obligacionnan real y biba nan bida priva. E ta duna un idea di e tensionnan y presionnan cu e pareha a experiencia y con esaki a conduci na nan decision. Na final di e documental mi ta keda cu preguntanan: "Con lo bay ta den futuro cu Harry y Meghan?", "Kico lo ta e consecuencianan adicional?" y "Lo yega na un reconciliacion entre Harry y e famia real algun dia?"

"Spare" ta e titulo di e buki nobo di prins Harry y ta trata tocante su experiencianan como "spare" of yiu number dos di e famia real Britanico. Mi a tende cu ta un historia conmovedor tocante busca libertad y con abiertamente prins Harry ta den e buki aki, tocante su bida personal. Naturalmente por pensa, pakico Harry ta haciendo tur esaki? Pakico e mester papia asina abiertamente tocante su bida? Cual ta su motibo pa scirbi esaki den un buki? E por a keda sin haci esaki tambe. E ta papia berdad? Ta su manera pa procesa e injusticia cu a wordo haci na dje? Personalmente mi ta di opinion cu tur hende tin derecho pa procesa injusticia y perdida na nan manera. El a scoge pa conta su historia. Cu e kier duna nos mas claridad den e eventonan cu a pasa cu n'e y cu otro. Cu e spera cu e parti contrario, den e caso aki famia real, por wak nan mes erornan y cu nos por saca les for di esaki.

Apart di por haci pregunta pakico e a scirbi e buki, tambe por haci pregunta si Harry lo no keda regret esaki despues. Si e no a bay asina leu. Si esaki lo por conduci na un actitud di amargura, unda e lo por cera su mes for di mundo y e hendenan rond di dje. Cual lo por conduci na un impacto negativo riba su salud mental, relacionnan social y su carrera. Bo por forma un opinion bon te ora bo lesa e buki completo di Harry. Te ora bo sa cual ta e motibonan cu Harry tabatin pa scirbi e buki. Mi tambe ta curioso y lo sigur bay haci mi pedido pa e buki.

No tur hende ta contento cu Harry y Meghan. Solamente riba YouTube e reaccionnan mayoria ta negativo. Meghan ta wordo mira como un narcista malicioso y Harry como un prins estupido. Tur co en e buki ta mentira. Nada di esaki por ta berdad. Lo ta cu Meghan realmente ta un narcista y cu Harry ta wordo manipula di dje? Mientras algun hende ta odia, algun otro por tin hopi aprecio y admiracion pa nan. Naturalmente tur banda tin nan historia y bo por yega cerca di berdad y forma bo mesun opinion, solamente ora bo a tende ambos banda.

Pa kico tanto odio? Y esaki principalmente door di e entrevista cu Oprah, e documental of door di e buki? Mi tambe a scirbi un buki y esaki a wordo critica negativamente door di algun. Incluso door di algun hende cu no a lesa e buki completo of no a lesa e buki. Mi lo ta venganzoso y a menti. Mientras algun hende no kier duna opinion, tabata tin hopi reaccion positivo caminda mi motibonan a wordo comprendi. E buki a duna un miho idea y conocemento di e situacion. Awor ta comprende cu no tabata un periodo facil, cu nos a yega den dje.

Pakiko hende por biba cu tanto odio? Pakiko un persona cu ta tratando di procesa algo y papia berdad ta wordo mira malo? Ta interes personal ta asina importante na costo di otro? Cu hende simplemente no kier comprende? Of cu hende no tin hopi respet pa hende cu ta tratando di procesa un periodo dificil na nan manera? Sigur ora momentonan agradable ta wordo obscureci pa experiencia negativo. Cu e pensamentonan aki, solamente ta haci mi tristo y parfois mi mes ta sinti amargo y ta falta e momentonan agradable cu mi a conoce.

E ideanan di Plato ainda ta relevante awe. Caminda papia berdad hopi biaha ta conduci na controversia y resistencia, envez di aceptacion y comprension. Su declaracion ta un advertencia pa esnan cu kier papia berdad y un yamada pa aprecia esnan cu ta haci esaki.