Expresa bo mes!

Sinterklaas y Piet ta na tera na Aruba. Diaweps atardi el a yega na Hellevoetsluis na Hulanda. Awor finalmente ta cu publico, despues di tres aña di crisis di COVID-19. Diasabra el a yega na Aruba na waf di Aruba Ports Authority (APA), unda Sinterklaas a wordo bonbini pa minister di cultura y finanzas Xiomara Maduro. Desde e waf un parada a tuma luga bayendo direccion Plaza Padu. Un parada cu Piet di diferente colornan. Tabata un cos bunita pa mira cu tabatin un gran cantidad di Piet di diferente colornan den e parada aki. Tabatin algun Piet preto/bruin tambe. Tambe aki a traha cambio lentamente pa awor tin cu bisa cu un Piet preto no ta adecua pa e tempo actual.

Dia 12 di november 2011 tabata diferente. Na e parada di Sinterklaas na Dordrecht Quinsy Gario y Jerry Afriyie a wordo deteni duro pa polis, pasobra nan a ejerce nan derecho di libertad di expresion door di demonstra contra Piet preto. Na cuminsamento hende na Hulanda a papia hopi malo di e dos manifestantenan aki. Durante e añanan a bira mas y mas cla cu Piet preto no ta adecua pa e tempo actual. Sinterklaas mester keda un fiesta pa mucha. Mi ta sigur cu esey, pero un fiesta pa tur mucha. Mas y mas hende tabata contra Piet preto y tabata di acuerdo cu Gario y Afriyie, pero tabata tin miedo pa expresa nan mes.

Pensando bek riba e tempu di e detencion na 2011 mi a cumpra un camisa cu e texto "Piet preto ta racismo - Zwarte Piet is racisme". No por recorda mi mes si algun biaha mi a bisti e camisa aki, pero mi ta sigur di acuerdo cu e lucha contra Piet preto. Talbes mi opinion a wordo fortifica pa e detencion duro di polis. E hombernan baho, cu a intenta ejerce nan poder duro door di pensa cu nan tabata mas halto cu ley. Inmediatamente mi a pensa riba e hombernan baho na Aruba cu a detene un dama grandi na pijama ora cu el a basha awa pafor riba su propio tera ora tabatin un toque de queda. Door di periodistanan critico na Aruba a sali afo cu durante e tempo di toque de queda, polis a comete hechonan di maltrato cu casi nunca a wordo castiga y a wordo tapa.

Diasabra venidero, dia 20 di november 2022, lo cuminsa e mundial di futbol na Qatar como pais anfitrion.Hopi critica ta wordo haci riba e pensamento di pakico mester tene e importante evento aki na Qatar. Derechonan di hende muhe y condicionnan di trabou pa trahadonan migrante for di Asia y Africa cu a traha na construccion di estadionnan ta malo.

Mi lo sigur mira e weganan cu entusiasmo, pero tambe cu e pensamento cu hopi trahado migrante a duna nan bida pa laga e evento aki tuma luga. No solamente door di e sucesonan historico cu lo tuma luga riba e campo, pero tambe pa e diferente sucesonan cu por tuma luga pafo di e campo. Lo tin individuonan di e diferente teamnan nacional di futbol cu lo para? Of lo tin teamnan nacional completo cu lo expresa nan critica na Qatar como pais anfitrion? Cual fanaticonan lo tuma esaki na cuenta? Mientras nan si ta sostene nan team nacional na Qatar.

Apesar cu unidad y solidaridad ta importante. Specialmente durante e evento deportivo aki unda esaki ta sali hopi dilanti, ta e individuo cu tambe por trece cambio. E persona cu no ta desvia di su ideanan y kier keda fiel na su normanan, balornan y principionan. No ta facil ora bo ta para pa algo, unda un gran parti di e comunidad no ta sostene esaki. Door di ta husto den algun opinion. Manera husticia ta un poder enorme, tambe por ta un tentacion den algun momento. Ta haya miedo? Of ta pensa cu e orden estableci den un comunidad semper ta na final di cosnan? Of ta debi na cultura pa no expresa bo mes riba topiconan sensibel cu ta tuma luga den e comunidad?

Ta e personanan unico aki ta trata di saca e comunidad for di nan soño y realisa e importancia pa mira diferente "sensibel" topiconan den e comunidad diferente. Cu door di tene curashi, keda critico y expresa nos mes, por trece cambio. Talbes e cambionan aki lo tuma luga hopi lentamente. Ta pasa añanan. Pero ora nan yega, finalmente por biba hunto den un comunidad cu igualdad di derecho y oportunidad pa tur hende cu felicidad completo.