E solo ta cuminsa bria bek!

Den un tempo di yuna y reflexion, mi no a skirbi hopi. E tawata un tempo basta druk, unda mi no tawata tin e chens pa skirbi algo riba papel. Pa mi tabata mas e momento pa reflexiona riba mi bida y mira con mi kier sigui dilanti den bida.

For di 23 di januari di e aña aki, ainda prome cu e período di yuna, tabata mi momento pa bisti mi sapato di core atrobe y cuminsa core. E tawata un caminda largo pa cuminsa. Na comienso, mi por tawata core solamente 3 km. Rond di 80 mandarina, 40 appel, y liter di awa, mi a cana y core na total di mas of menos 375 km. Mi ta consciente di kiko mi come y mi ya a baha cu mas o menos seis kilo di peso. Ainda mi no ta cla, pero un comienso sigur a bin.

Spiritualmente mi tambe ta sinti mi hopi mas fuerte. Sigur despues di e misa di diadomingo, caminda e resureccion di Hesus Cristo y perdon tabata e tema principal. Hopi hende ta mira mi como un solo cu semper tabata buscando lo mehor pa otro. Y esaki hopi hende tabata sa, aparentemente asina nan tambe por a abusa di mi bondad. Mi a skirbi un buki y hende por a mira mi di un manera diferente dor di esey. Mi tawata tin un tempo pa lamenta, pero despues mi no a mira otro opcion. Mi tawata desea pa wordo scucha. Dor di e buki mi por a enfrenta e berdad. Esaki tawata mi manera pa por procesa.

Tin biaha mi ta puntra mi mes kiko mi mester a hasi di otro manera. Si mi no a skirbi e buki, tur cos tawata tin un otro rumbo? Despues di tur, mi a yega na e conclusion cu kiko mi a hasi, semper mi lo a comete fayo nan. Cu e buki of sin e buki. Mi a keda royal na mi fe den Dios y mi lo sigui asina. Ta un cos di cual mi mester keda hopi orguyoso pe. Mi ta keda skirbi y lo sigui alsa mi bos contra injusticia.

E solo ta cuminsa poko-poko bria bek. Pa mi por cuminsa un relacion pronto no ta un opcion. Ultimamente mi ta topa di tanto damanan bunita y atractivo caminda mi por mira un posibilidad pa un relacion nobo. Pero si nan tin un amigo of pareha, mi tuma un paso atras rapidamente y respeta nan relacion. Mi sa cu tin hombernan manera e "rechercheur" cu no ta duna importancia na esaki. Nan ta mira esaki cu ta un joke. Pero nan mes lo topa nan mes un dia.

Tin un tendens nobo awor pa acusa hende na Aruba sin justificacion y detene nan dor di polis, Ministerio Publico of Minister di Husticia. Dor di esaki, por perde e confiansa den un husticia husto. Ningun hende ta coregi otro, of nan ta bisa cu nan no tawata sa nada. Kiko ta e motibo cu un hende den polis ta tuma lei den su propio man, hasi cosnan cu no ta permiti y sali impune? Por ta cu un polis manera esaki ta risibi ordo di su superiornan pa cumpli cu trabou sushi? Ta parce manera cu tin un grupo di polisnan den korps cu ta domina y por sigui traha sin respeta e derecho cu cada un di nos tin.Con nos ainda por tin respet pa e sistema husticial den caso manera esakinan?

Ainda in suficiente polis cu ta traha di manera husto y ta sigui lucha pa husticia. Ta parce cu tin appel putri den e sistema cu ta duna un mensahe robes. Naturalmente, tur hende por comete fayonan, pero nan mester di no sigui tene nan onor pa nan mes y pensa cu nan por sali sin castigo.

Den un periodo di reconciliacion ta e ora pa un comienso nobo. E comienso nobo a cuminsa, momento nan bon ta yega y mi ta mira futuro den un manera diferente cu positivismo. Mi a traha un metodo, bao di Directie Onderwijs, tocante Status Aparte y Betico Croes. Mi ta content cu mi por a realisa esaki, pensando cu un hende semper a bisa mi cu mi mester a skirbi un buki historico tocante Betico Croes. Tambe asina mi a duna honor na esaki y mi ta hopi orguyoso. Ainda tin hopi trabou pa hasi den desaroyo di material historico den enseñansa. Spera cu esaki ta solamente e comienso!

E tempo nan bon ta sigi. Esaki ta e comienso. Ainda lo bin hopi cos bunita cos cu mi sigur lo skirbi. Ta posibel cu mi ta cuminsa mira e lus na final di e tunnel atrobe?