E relacion special entre un nieto y welo

Un luna a pasa atrobe cu mi tata kerido a kita for di nos. Bida ta sigui, pero e momento nan keto y duru lo keda semper presente. Den e siman cu a pasa, nos a experencia hopi sosten grandi for di famia, amigo nan y conosi. Mi ta sumamente agradecido pa nan. Esaki a duna nos hopi forsa y sosten durante e momento di tristesa inespera.

Mi tata tabata definitivamente un persona special. E tabata un homber bon, cariñoso y tata sobresaliente pa nos. Pa hopi hende e tabata conoci cu e ta yuda otro y husto. Mi tata tabatin un karakter fuerte, cu su norma nan y balor nan na e luga adecua. Esaki el a hanja for di su mayornan y esaki e a hanja importante pa pasa pa nos. Mi ta sinti mi mes masha bendiciona pa e hecho cu e tabata mi tata.

Pa su nieto tambe lo ta diferente awo. Su compañero di hungamento, cu su welo tabata, no ta presente mas. Hopi orguyoso tabata su welo cu ne. Den un relacion rico di famia, e relacion entre un nieto y su welo tin un rol sumamente importante. E relacion aki ta bay mas leu cu solamente parentela biologico; ta un puenti entre generacion nan. Ta un fuente di sabiduria, amor y experencia nan unico cu ta surgi aki.

E relacion entre welo y nieto ta manera un tesoro costoso cu ta ser warda y cuida. Welo ta funciona manera un buki di historia bibo, un encyclopedia cu ta e camina di storia, tradicion y lesnan cu a ser transmiti pa aña nan. E ta duna bida na recuerdo nan cu si no, lo a bai perde den tempo. E relacion entre un nieto y welo ta un caminda di dos direccion pa siña y parti. Mientras e welo ta duna su nieto e cultura y balor nan di antes, e nieto ta trese un vision fresco y renobador riba e mundo, cu ta pone e welo pa keda evoluciona y adapta. Ta un relacion cu ta enrikece ambos parti.

E importancia di e relacion entre un nieto y welo no por ser subestima. Esaki ta forma e base pa un relacion famia mas fuerte y un comprendemento mas profundo di unda nos ta bini. Esaki ta siña e respet pa tradicion, cuida di storia y comprende e balor di nos origen.

Ta tristo cu su nieto solamente por a disfruta di su welo pa un tempo cortico. Pero mi ta sigur cu e momentonan cu nan tabatin, lo keda cu dje y e lo cuida nan den futuro. Ainda e no por lesa, pero si algun dia e por lesa e articulo aki, lo e sa con special su welo tabata. Mi ta considera como mi tarea pa transmiti e storia di mi tata, su balor nan y norma nan, portret nan y e momentonan agradabel y gracioso na su nieto. Pa asina e bunita recuerdo nan y storia keda na bida y nos por semper pensa bek riba nan cu un sonrisa agradabel.

E herencia costoso entre un nieto y su welo mester wordo cuida y celebra. Pasobra den e relacion aki no ta crea solamente un conexion entre individuo nan, pero tambe un hilo cu ta conecta e generacion nan y ta pasa un historia rico pa futuro. Y ainda si e relacion por a wordo corta, e storia nan, carta nan y portret nan sigur ta keda bibo den e conexion y ta sigura cu e herencia por wordo pasa na e siguiente generacion.