E importancia di historia

Desde un edad hoben mi tabata interesa den e materia di historia. Na scol basico na Hulanda historia a cuminsa bira bibo pa mi ora mi scol basico "Timotheüsschool" a bira 75 aña. A celebra esaki grandiosamente cu un tema adecua y nos mester a bay scol pa un siman den ropa antiguo. Durante les nos mester a siña traha cu lei y pluma y durante pauze nos tabata hunga cu hoepel, tol, huga kiniki y stelten. Como final nos a haya un saco cu zuurstok, duimdrop, toverballen, pepermunt y palo dushi.

Despues di esaki mayoria di mi presentacion y verslag tabata toca temanan den historia manera Boy Ecury, e prome y di dos guera mundial. Asina mi a haya for di Sra. Spruit, un dama simpatico cu tabata biba den caya, algun obheto for di e Segunda Guera Mundial manera bon di cuminda, habon y blauwsel. Tambe e la skirbi un carta pa mi unda e la describi su experiencia durante e guera. Sra. Spruit a fayece pero su experiencia y obheto durante e guera ta keda existi asina. Ainda mi ta hopi agradecido pa esaki.

Otro impresion grandi cu mi a hanja tabata e encuentro cu Miep Gies na Montfoort. Pa esnan cu no conoce Miep Gies, e tabata un di e yudantenan cu a yuda famia Frank sconde. Miep a yuda cu fruta y carni. Anne Frank a yame "pakezeltje". Casi tur dia e tabata haya fruta y trece tur cos den saconan grandi cu bicicleta. Durante e encuentro cu Miep Gies y nos klas, e tabata conta nos su historia y e contacto cu Anne Frank. E tabata conta nos cu ademas di famia Frank, e tabata yuda algun otro persona sconde. Algo cu famia Frank nunca a hanja sa durante e guera.

Durante mi educacion secundario, mi a wordo atrai pa e historia bunita y impresionante cu mi maestro di historia por a conta nos. No tabata mi intencion pa studia historia, pero finalmente esey a pasa. Historia ta importante pasobra e ta yuda nos compronde nos situacion y problema actual. Door di studia e error y logronan di nos predecesornan, nos por compronde y mehora nos decisionnan y accionnan. Ademas, e ta duna nos un sentido di identidad y conexion cu nos cultura y historia.

Dia 27 di januari, mundialmente ta recorda e victimanan di Holocaust. Dia 29 di januari '23, tabatin un recordacion nacional di Holocaust na Wertheimpark na Amsterdam. Un evento historico cu a wordo menciona hopi den noticia e siman aki. Na Hulanda, nan ta haci pregunta si mester mehora e enseñansa di Holocaust. Den un investigacion, 2000 Hulandes a participa, mas cu mitad no tabata sa cu mas cu seis miyon Hudiunan a wordo mata pa nazi. Un tercera parti di nan no tabata sa cu Anne Frank a muri den un campo di concentracion y 6% ta kere cu Holocaust ta un fabula. Un cuarto di e muchanan Hulandes no ta kere den Holocaust.

Docentenan cu ta duna les den historia na Hulanda no ta atreve di papia liber riba e tema di Holocaust, principalmente debi na resistencia di studiantenan Islam. Mi ta di opinion cu e ta bin di ignorancia, causando cu no por tin un respet mutuo. Talbes algun docente kier impone nan mes opinion. Ta importante pa enseña historia den un manera cu no ta conta e historia solamente for di e punto di bista di e ganadornan, pero tambe inclui diferente punto di bista. Tambe e historia di e perdedor por yuda. Asina bo ta duna e studiantenan e oportunidad pa forma nan mes un opinion y pensa critico. Tambe ta importante pa inclui e studiantenan den e historia contando tambe historia cu ta relaciona cu nan mes un cultura of mundo di experiencia. Pasobra con grandi lo e resistencia di studiantenan Islam ta si nan ta tende cu durante Segunda Guerra Mundial tambe tabatin soldadnan Marocano na Zeeland ora Hulanda a capitula dia 15 di mei 1940. Of e historia cu Turkije tabata e unico pais cu tabata forma un caminda pa Palestina.

Den e buki "Allochtonen van nu & de oorlog van toen", di Ad van den Oord ta hasi un yamada na e involvimento di Maroko, Antias Hulandes, Surinam y Turkije den Segunda Guera Mundial. Mi ta sigur cu studiantenan lo ta interesa den historia, especialmente si e ta trata nan propio historia. Den enseñansa ta importante pa duna historia na un manera cu ta stimula pensamento critico y no solamente ta enseña nan pa memorisa hechonan. Esaki por wordo logra door di permiti nan pa comprende diferente perspectivanan y pa enseñanan pa analiza fuentenan criticamente.

Holocaust ta un di e mas teribel y asusta eventonan den historia, unda miyones di hende Hudiu, homosexual, Roma y otro grupo a wordo mata sistematicamente door di e nazi’s. Holocaust ta importante pa recorda y lesa for di dje, pasobra e ta duna nos un advertencia tocante peligernan di odio, discriminacion y violencia contra cierto grupo di hende. E ta mustra nos con lihe un sociedad por escalada den un situacion di gran iniquidad, unda derechonan mas fundamental di hende ta wordo viola.

Ademas, ta importante pa comprende cu Holocaust no tabata solamente un problema Hudiu, pero un problema humano. Ta responsabilidad di tur pa lucha activamente contra antisemitismo y otro forma di discriminacion, y pa traha pa un sociedad incluyente y respetuoso pa tur hende, independientemente di nan fe, rasa of orientacion sexual. Den enseñansa, ta crucial pa aborda Holocaust como un parti di les di historia, pa asina mucha por lesa tocante e eventonan y lesnan cu nos por saca for di dje. Asina nos por asegura cu un evento asina terrible nunca lo pasa atrobe.

Historia no ta wordo considera semper como un materia obligatorio. Den e nivelnan di enseñansa di base, lesnan di historia no ta wordo duna tur ora. Historia ta wordo dividi hopi biaha den otro materianan manera economia y geografia, cual ta haci cu e importancia di historia ta desaparece. Den lesnan di historia, ta trata hopi biaha temanan cu e estudiantenan no ta interesa den dje, cual ta haci cu e materia no ta keda bibo pa e estudiantenan. Pesey, tin hopi poco conocemento di historia y esaki ta dificulta pa nan por funciona den comunidad. Hopi docente di historia na Hulanda ta haci un apelacion urgente na politica pa haci historia un materia obligatorio atrobe den e nivel di VMBO.

Tambe na Aruba nos mester presta mas atencion na esaki. Por ehempel door di desaroya material nobo y un metodo cu ta enfoca mas riba nos propio cultura y historia. Pakico historia no ta wordo considera como un materia obligatorio? Ta esaki ta un manera di politica pa no duna pueblo e posibilidad pa pensa criticamente? Por ta nan kier hasi e hendenan bobo. Algun biaha historia ta wordo usa como un instrumento politico, unda hechonan y perspectivanan ta wordo distorsiona of laga afo pa sostene cierto agenda. Pesey ta importante pa keda critico y investiga diferente fuente pa haya un bista mas completo di historia.

Finalmente, ta importante pa reconoce cu e consecuencianan di Holocaust ta sinti ainda awe. Hopi sobreviviente y nan famianan ta biba ainda cu traumas di loke nan a experiencia. Ta nos responsabilidad pa brinda nan sosten y honra nan. Durante mi lesnan mi studiantenan ta hopi interesa den e tema “Koude Oorlog”. Awor cu e situacion na Ukrania, mi ta haya cu esaki a bira mas grandi. Pesey ta importante pa reconoce cu historia no mester trata solamente tocante pasado, pero tambe futuro. E ta yuda nos comprende nos problema y desafionan actual y enfoca riba un futuro mas miho. Door di studia nos historia, nos por mehora nos mes y nos comunidad den un manera mas bunita.

Contenido di e carta di sra. Spruit:

"Om 4 uur ’s morgens 10 mei 1940 werden we gewekt door schoten en knallen en veel over vliegende vliegtuigen. We zagen twee vliegtuigen met elkaar in gevecht. Een Hollandse en een Duitse machine. Duidelijk zagen we het hakenkruis op het ene vliegtuig. Vuurstralen schoten uit de romp en staart. Toen een oorverdovend lawaai. Deze bommen waren uitgeworpen. Alles schudde en trilde. Veel mensen waren al in de schuilkelders gegaan. Van buiten zagen deze schuilkelders er uit als langwerpige ronde heuvels begroeid met gras waar je door een poortje in en uit kon gaan. Van binnen waren zitbanken geplaatst daar in september er voor de mobilisatie uitgebroken was hadden veel mensen al een schuilkelder gemaakt.

Ook ging van lieverlede alles op de bon. Zo als je zien kunt voor boter, aardappelen en textiel enz. De winkelier moest de bonnen dan weer op opplakvellen plakken en inleveren. Hierbij ook nog een stukje zeep waar we de was deden enz. Het was maar heel beperkt en deden de lakens en slopen en alles van wit goed met blauwsel water spoelen dat het helder en wit bleef. Hier dan een kleine bijdrage over iets uit de oorlog. Graag gedaan. Allen hartelijk gegroet. (Er behoefd niets terug)."