E giraf y e turtuga

E biaha aki mi kier hiba boso den un storia di fabula di un turtuga cu kier bira un giraf. Asina e storia ta cuminsa den un mundo di bestianan cu diferente sorto di bestia unda cada un tabata trata di sobrevivi. Tambe e turtuganan tabata trata di logra un lugar den e mundo aki y nan tabata biba hunto den pas. Nan tabata orguyoso di kiko nan tabata. Nan yuda otro unda mester y nan tabata sinti nan mes berdaderamente conecta cu otro.

Pa tin un bida trankil, e turtuganan bieuw a bin hunto pa eligi un lider. Asina nan a vota y nan eleccion a wordo manda pa un gran mago. Tambe e mago aki tabata biba den e mundo di bestia y el tabatin podernan grandi. E turtuga, kende a worde eligi dor di e turtuganan bieuw a tuma palabra. "Mi ta sinti mi orguyoso cu mi a worde eligi dor di boso.

E mago a duna su bendicion cu podernan positivo, pa e por ehecuta su trabou mes bon cu ta posibel. Awor e por a guia e rumbo hunto cu un grupo chikito di turtuga y e tabatin e privilegio pa ocasionalmente hasi un cita cu e mago pa pidi conseho y aviso. Pa hopi tempo tur cos a bai bon. Nan a hasi bon arreglonan y hende tabata hopi contento cu e liderazgo cu e turtuga a tuma riba su mes.

Pero despues di algun tempo e turtuga no tabata sinti su mes conecta mas cu e resto y el a mira su mes mas manera un giraf. Cada biaha e ta expresa su admiracion pa e giraf. "Con aparencia elegante cu un garganta sumamente largo y nan aparencia sobresaliente. Un giraf ta identificabel facilmente y ta fascinante pa mire. A pesar di nan tamaño grandi nan por move den un manera gracioso y casi manera nan ta baila. Mi kier bira un giraf!"

Riba un dia e turtuga a bai bek pa e mago pa pidi conseho y aviso, y e tabata determina pa pidi e mago pa cambia su mes den un giraf. Pues girafnan ta animalnan social cu ta biba den grupo. Nan tin laso fuerte entre nan mes y nan ta comunica pa medio di zonido nan trankil y lenguahe di curpa. Door di nan garganta largo nan por yega nan cuminda na nivelnan mas halto, cu ta duna nan bentaha concurencial den nan ambiente den biba.

E prome biaha e mago a rechasa e peticion di e turtuga aki, pero dor di e turtuga a insisti, e a cambia e turtuga den un giraf. Cu tur e consecuencia nan cu ta bini cu esaki. Finalmente e turtuga a sinti su mes respeta manera un giraf. Finalmente e a sinti su mes halto for di e resto y e por a observa henter e ambiente mas bon ainda cu su garganta largo. E resto di e turtuganan a mira esaki un poco straño y raro. Algun a protesta y nan tabatin critica cu nan lider, pa cual nan a vota, awor di ta un giraf. Pero nan a laga esaki pasa na final, no tabata asina teribel. Spera cu e giraf aki ainda lo ta dispuesto pa proteha e interes di e turtuganan. E turtuga ta simbolo di sabiduria y persistencia y nan tin un bida largo.

Bida a sigui. E turtuganan a presenta nan mes trankilo. Nan tabatin e posibilidad pa siña y retene, a pesar di nan comportamento lento. Esaki ta duna nan e capacidad pa adapta nan mes na diferente ambiente. Den diferente culturanan, turtuganan semper a keda mira como un simbolo di felicidad, estabilidad y conexion cu e naturalesa.

Un cantidad di siman a pasa. Na un momento, e turtuganan na tera a sinti cu tin un chens grandi di awasero cu ta bin. Tur hende tabata den panico. Nos mester hasi algo awor prome cu ta laat! E turtuganan a alarma e giraf, pero e giraf no kier a tende nan critica. "Boso ta papia cos nan loco. Mi ta mira dor cu mi tin un garganta largo cu e shelo ta cla y mi ta convenci cu lo no pasa nada. Kiko boso sa aya abou kiko lo pasa? Tempo cu mi tabata ainda un turtuga, mi no por a mira tur cos cla. Pero awor cu mi ta un giraf, mi ta mira tur cos positivo," e giraf a bisa. "Nos no mester preocupa nos mes, nos lo sali for di esaki," e giraf a bisa cu conviccion.

Sinembargo, algun turtuganan a mira e situacion scur y a cuminsa proteha nan mes di diferente manera contra e awasero fuerte cu ta bini. Nan no tabata kere nan lider mas. Prome a cuminsa cai awasero masha trankil. Prome e la yobe un tiki, pero despues e tabata bira mas y mas fuerte. E awasero mes a forma un poel di lodo enorme. Hopi turtuganan a haya un refugio seguro, pero e giraf no por a sconde. E a slip y a drenta den un wordo hinca den un rooi di awasero y lodo. Krokodilnan a cuminsa bringa cu e giraf. Un momento estrecha e giraf por a sali for di e peliger aki.

Ora tur hende no tin miedo mas, un parti grandi di e turtuganan no kier nada mas di sa di e turtuga cu a bira un giraf. Tur e turtuganan bieuw a bin hunto atrobe y nan a vota anonimo cu nan lider mester cambia den un turtuga bek y nunca mas por ta un lider. E mago a keda informa tocante esaki y asina nan peticion a keda responde inmediatamente. E giraf a cambia bek den un turtuga y cu berguensa e a bay bek na unda e ta pertenece.

Un storia di fabula cu por tin un mensahe. Algun hende ta mira nan mes mas manera un giraf, mientras nan tabata un turtuga prome. Ambos, sea cu ta un giraf of un turtuga, tin nan caracteristica fuerte y nan falta. Apesar di nan tamaño y forsa, girafnan ta vulnerabel pa bestianan depredador manera lew nan y hyena nan. Den algun lugarnan, girafnan por keda den contacto cu kabel electrico, loke por herida of causa morto. Y ora nan ta wordo sera, nan por experencia stress dor di nan limitacion den libertat di move. Tambe un turtuga tin nan falta. E trankilidad por ta un desventaha, manera momento di scapa for di bestianan depredador. Turtuganan di laman por cay den net y por herida of causa morto.

Niun hende ta perfecto. Tur e bestianan ta diferente. Pero cu nan falta nan, nan ainda por traha hunto y sigur cu nan tur por trese lo mehor di nan mes. Desafortunadamente, no tur hende ta pensa mes un cos den esaki. Tuma como ehempel e giraf. Algun hende, cu ta identifica nan mes cu un giraf, no por acepta critica di turtuganan. Nan ta convenci cu turtuganan ta den un nivel abou den bida y pasobra di esey nan no ta merece ta tuma parti di e comunidad. Y nan ta kere cu turtuganan no mag di expresa critica.

E giraf por bisa mi kiko ta malo di un turtuga? Ta posibel cu un turtuga tabata preferi ta un giraf, pero el a nace asina. Parece manera tur cos riba mundo mester enfoca riba e giraf y e no mester tene cuenta cu otro. Aparentemente, solamente cu su mes un sorto. Orguyo ta bin prome, evidentemente prome cu e lo cay.

E mundo humano di awe no ta hasi hopi diferencia cu e mundo di e bestianan. Nos ta biba cu nos mes un sorto y nos preferi no ta mira otro cu ta diferente. Y nos ta preferi pa no ta tende critica, pasobra e otro sigur cu no tin e drechi. Pero esaki no semper ta e caso. Den e mundo di bida di un persona, nan critica por ta manera un spreekwoordelijke seis. Mientras pa e otro persona, cu ta para contra nan, ta un spreekwoordelijke nuebe. Ambos nan tin e berdad den nan propio manera di mira, pero diferente. Hende ta mira bida manera nan ta, pero esaki no kiermen cu ta un manera falso den bida.

Kizas nos mester ta cu otro y tende otro. Pa traha hunto, cu e critica necesario, pa yega na un solucion. E no ta facil y tin biaha mi tambe tin dificultad cu esaki. Pero mi ta sigur cu si nos pone nos man den un, nos por mustra mas comprension pa otro y pa esaki nos por compronde otro miho.