Dia di Betico

Riba 25 di januari nos ta celebra dia di Betico Croes na Aruba, un figura historico cu a hunga un rol importante den e lucha pa autonomia y independencia di nos isla. Betico Croes tabata un politico y lider di Movimiento Electoral di Pueblo (MEP) for di 1971. El a cuminsa su carera politico na AVP (Arubaanse Volkspartij) den e decada di 60 y a traha duro pa fortifica e posicion di Aruba den Reino Hulandes. El tabata un defensor fuerte pa mas autonomia pa Aruba y su esfuerso a resulta finalmente den e status actual di Aruba como un pais den Reino cu autonomia.

Ademas di e autonomia cu a wordo realisa, e mensahe di unidad y tolerancia di Betico ta keda importante pa nos comunidad. El tabata busca un Aruba unda hendenan di diferente cultura y origen por a biba y traha hunto den harmonia. E ta un les valioso pa nos tur ainda. E importancia di unidad den comunidad tambe a wordo transmiti durante e discurso di año nobo di e actual prome minister di Aruba, Evelyn Wever-Croes.

Riba dia di Betico nos ta recorda y celebra pa e contribucion cu e a duna na desaroyo di Aruba. Bandera Arubano ta wordo hisa y tin hopi actividadnan organiza, manera un parade y eventonan cultural, pa honra su bida y trabou.

Pero, honestamente, nos mester reconoce cu liderazgo di Betico no tabata sin critica. Hopi hende a haci obhecion contra su estilo di liderazgo y e manera con el a maneha politica. Algun ta acusa incluso di practicanan autoritario y campañanan electoral deshonesto. Mi ta haci mi mes e pregunta, si esaki ta un dia celebra alegremente pa tur hende of ta solamente un dia liber pa algun? Mi ta haya cu, envez di un historia general, nos na Aruba ta desea pa conoce dos historia diferente y biba cu nan. Un kier tende nada di Betico, e otro kier tende nada di e monumento di 18 di maart, cu e estatua di Cornelis Albert (Shon A) Eman.

Boso por splicami pakico e lus eterno na e monumento aki, durante e periodo di gobernacion di MEP, no ta cende? Con ta cu solamente durante e periodo di gobernacion di AVP e ta keda cende? Mi sa cu e prijs di gas awendia ta basta halto, pero esey ta e motibo dicon? Of nan no kier a paga e cuenta di gas na e momento ey? Ta importante pa fortifica e unidad di comunidad Arubano a traves di historia? Por bisa cu no tin un historia conjunto cu nos tur por ta orguyoso di dje? Of ta simplemente cu Betico a logra pa haya mas autonomia y Jan Hendrik Albert Eman (Henny Eman) y Cornelis Albert (Shon A) Eman a purba, pero no a logra? Ta atribui e lucha aki solamente na un persona? Naturalmente e unidad no ta depende di un lus eterno, pero mi ta kere cu nos mester muestra mas respet pa esaki.

Mi ta curioso pa sa loke e gobernacion actual lo haci riba 18 di maart na e monumento di Cornelis Albert Eman. Talbes por pensa pa traha hunto cu e stichting di 18 di maart. Pa crea un programa bon pa trece e unidad mas dilanti den nos historia. Independientemente di cual partido politico bo ta sostene. Si e gobernacion actual no a retira prome cu esey, despues di e storianan negativo tocante Arubahuis y e problema cu schimmel den diferente oficinanan di polis, cu ta domina noticia awor.



Riba 25 di januari mi ta kere cu nos, ademas di celebra un dia pa honra Betico, mester enfoca tambe riba celebra e valornan cu Betico tabata desea pa Aruba, manera unidad y tolerancia. Door medio di unidad nos por forja nos historia politico rico den un historia conjunto y siña di dje. Laga nos hisa nos bandera Arubano cu orguyo riba e dia special aki y sigui busca e vision di Betico pa unidad, pa asina crea un futuro duradero pa Aruba.