Crucero turistico na Aruba: bendicion of maldicion?

Durante e ultimo añanan, e cantidad di barconan di Crucero na Aruba a aumenta stabiel pa motibo di Covid. Mientras algun hende ta bisa cu esaki ta un bendicion pa e economia local, otro ta critica e impacto cu esaki tin riba e isla. Di un banda, no tin ningun duda cu e cruceronan ta duna un impulso economico grandi pa Aruba. Miles di turista ta baha tur dia pa cumpra, come y disfruta di e playanan bunita di nos isla. Esaki ta aporta na aumento di entrada pa empresa local y empleo pa e habitantenan.

Di otro banda, ta posibel cu e fluho di turistanan por tin efectonan negativo tambe. Hopi bishitante ta keda solamente un rato cortico, loke ta nifica cu nan no ta gasta hopi placa na actividadnan costoso of keda na hotelnan. Pero den general, Aruba ta masha contento cu e sorto di turismo aki y semper tur turista ta ricibi e cordialidad di parti nos hendenan. Ta nos deber pa haci nan sinti cu nan ta na cas.

Diaranson pasa, e barco di crucero Atlantis Harmony of the Seas a mara na Aruba. E ta e prome biaha den historia cu e barco aki, cu mas di cinco mil homber homosexual abordo, a bishita Aruba. Aruba Gay Guide a organisa un evento na Surfside Beach pa e comunidad homosexual na Aruba, na unda rond di 400 hende tabata presente. E representante di e evento a indica cu e tabata un exito y ta spera di por sigui cu esaki den futuro.

Na 2015, un documentario titula "One Kingdom, One Love" a ser presenta na Amsterdam caminda, door di storia y puntonanan di bista personal di politiconan, a constata cu tin un tabu grandi den Reino Hulandes Caribense tocante sexualidad. Te unda cu mi sa, esaki no a ser presenta na Aruba. Sinembargo, for di 2016, Aruba tin registracion di partner pa pareha di mesun sexo, y for di aña pasa, Corte Comun di Husticia a dicta cu parehanan di mesun sexo tin derecho pa casa. Gobierno di Aruba tin te prome siman di  maart 2023 pa tuma un decision si nan lo apela of no e veridicto di e hueznan di Corte Comun.

Un cantidad di misa y instancia Cristian na Aruba ta desea pa Gobierno bay den ‘Cassatie’ y a cuminsa un accion di firma pa intensifica nan meta. Cu nan slogan: “Mi ta defende mi famia, pesey mi ta firma”, nan ta tratando di yega 20.000 firma. E intencion di e instancianan no solamente ta pa defende e famia, pero tambe e matrimonio. Nan ta di opinion cu si gobierno no bay den ‘Cassatie’, esaki lo nifica un fin pa Aruba y cu nos isla no lo ta bendiciona mas.

E siman aki a tuma luga un manifestacion di misa/comunidadnan Cristian dilanti e edificio di Gobierno y nan a pidi Gobierno pa bay den ‘Cassatie’. Te awor nan a yega 14420 firma. Tambe e manifestacion aki tabata pa mustra nan repugnacion contra e incidentenan cu a tuma luga na Aruba, caminda turista homosexual no a comporta nan mes. Tene relacion sexual na un lugar publico y un homber cu a cana sunu. Kico e ta kere? Por ta e a tuma e slogan: “Aruba, One Happy Island!” demasiado literal.

Tambe nan a permiti hombernan cu ‘string y zwembroek’ drenta e tiendanan cu ta keda riba e strip cu turistanan ta bishita na momento cu nan baha for di e barco, mientras tin indicacionan na entrada di diferente tienda cu ta bisa: “No shirt, no shoes, no service”. Na beach tabatin hombernan cu tabata sunchi otro. Na e mesun area unda nos yiunan chikito ta haya les di landamento. Aki nan a perde tur norma y balor di nos Pais. Y polis? Nan no tabata niun caminda.

Pa aclara, mi no tin nada contra hende cu ta gusta nan mesun sexo. Mi ta kere cu tur hende mester tin derecho igual pa loke ta nan escogencia personal. Pero semper cu respet y manera adecua pa cu otro. Trata di comporta bo mes cu respet! E cosnan aki ta conta tambe pa parehanan heterosexual.

Desgraciadamente, cada biaha nos ta scoge pa pone nos responsabilidadnan, nos norma y balornan cu nos a ricibi di Dios unbanda. Buscando nos felicidad y libertad sin respeta otro. Segun credo, no ta bon pa aproba casamento entre pareha di mesun sexo. Pero pa mi pone mi firma, ta algo cu mi no por haci. Pakico mi mester kita e felicidad di otro? No, Dios ta esun cu ta duna e ultimo palabra. Aparentemente pa un grupo chikito e matrimonio entre homber y muhe na Aruba ta ser considera ainda sagrado. Amor entre dos persona di mesun sexo no ta ser considera bon, pero ta ser tolera pa un parti grandi di e población. Relacion pafo di matrimonio na Aruba tampoco ta aceptabel segun credo, pero pa algun persona e ta parce algo normal.

Aruba ta den e ambiente di Carnaval pa algun siman caba. J'ouvert morning a cuminsa e mainta di 11 februari na San Nicolas. Fuera di hopi diversion, e parada aki a resulta den 19 aresto, entre otro pa buracheria, bringamento y uzo di droga. Y polis? Un total di 128 agente di polis tabata presente. Algun hende a haci e comparacion di pakico tabatin asina hopi agente di polis durante e evento, mientras cu ariba Diaranson no tabatin niun. Un hende por a core sunu riba beach. Pa e siguiente biaha lo mi kier mira mas atencion di parti di polis. Parce cu e Caribbean Gay Bears Cruise lo bishita Aruba na oktober di e aña aki. Mi ta spera cu nan lo informa corectamente con pa comporta na un isla manera Aruba!

Ta hopi cla cu tin sigur mas beneficio cu desbentaha den e cantidad di bapornan di turistanan na Aruba. Si un isla ta depende hopi fuerte di turismo, ta importante pa busca un ekilibrio entre e beneficionan economico y e impacto negativo riba e isla y su habitantenan. Aruba kier yama bonbini na tur turista cu brasa habri, pero nan mester por comporta nan mes na manera corecto! Mi no kier pa boso compronde mi malo, na Aruba nos tambe tin nos cosnan cu ta pasa. Den Carnaval, por ehempel, ta mustra imagen bergonsoso, y cu nos autoridad no ta haci nada. Tambe e falta di accion di polis ta un señal preocupante. Of polis di Aruba ta tolera e comportacion cu bo por cana sunu riba caya? Mas esfuerso mester ser haci pa reenforsa e confiansa den polis y e sistema di derecho, pa hende por sinti nan sigur pa raporta mal comportacion y pa sa cu keho entrega ta ser tuma na serio.

Tur hende ta bonbini na e isla y maske cu por scoge entre permiti of no permiti bapornan di turista, Aruba mester por regula y controla e tendencia aki na un manera corecto y responsabel. Informando turistanan tambe y haci nan cumpli cu loke "One Happy Island" berdad ta nifica. Solamente asina e isla por retene su atraccion unico.