Bon aña nobo!

Un aña nobo ta para dilanti nos atrobe. Esei kiermen cu nos por mira bek riba e aña pasa i bisa kiko nos por spera den e aña nobo. Ora mi ta mira bek riba 2022, mi ta pensa riba e finalisashon di e medidanan di corona na Aruba y Hulanda. E crisis aki a bira un guera entre Rusia i Ucrania riba 24 di februari. Aruba tambe a sufri di esaki, pasobra nos a sinti e prijsnan di gasolin extremadamente halto. Kiko ta pasa cu e guera na Ucrania?

E ta e aña cu Merca a drecha e lei di aborto i Hulanda tabata den problema pa e crisis di nitrogen. Nos a tende cu Reina Elizabeth II di Inglaterra a muri dia 8 di september. Su funeral di estado, cu no tabata tuma luga desde Winston Churchill den 1965, a ser transmiti mundialmente pa televishon. E ta e aña cu Iran a protesta y a rebela contra nan gobierno. Tambe na Qatar durante e Copa Mundial di Futbol, jugadonan y fanaticonan di Iran a protesta. E ta e aña cu Hulanda a pidi disculpa pa diferente eventonan. Pa e "politionele acties" na Indonesia, e fracaso den proteha Srebrenica y pa nos pasado di sclabitut. Nos a haña e palabranan adequa, pero awor ta pidi pa e accionan adecua.

Ta dificil pa prediki loke lo sosode na Aruba den e aña cu ta bini. Lo tin menos desgracia den trafico den e aña cu ta bini? Lo nos, pa un cambio, cumpra nos articulonan den e caya principal di Oranjestad of San Nicolaas?

Loke nos sa awor, ta cu na cuminsamento di e aña cu ta bini, e prijsnan lo subi. Ta tradicional pa yena nos auto cu gasolin prome cu aña nobo, pero awor e ta mas un necesidad pasobra e prijsnan ta bira halto. Door di e subida di BBO (Belasting op Bedrijfsomzetten) di 1%, e tarifa di BBO lo bira 2,5%. Loke lo resulta den un total di 7%, hunto cu BAVP i BAZV. E prijs di pan, webo y e demas articulonan di consumo lo subi tambe. Cuantu famia lo mester di mas yudansa den e aña cu ta bini?

Aruba lo sigur continua fortificando nan inisiativanan duradero. E isla ya a tuma algun paso importante den e area di durabilidad, manera establecimento di metanan pa uzo di energia renobabel i atacamento di desperdisionan. Den e aña cu ta bini lo nos sigur mira mas di e inisiativanan aki, loke ta bon pa e isla i e medio ambiente. Asina na cuminsamento di e aña cu ta bini, lo sera e dump na Parkietenbos. Asina lo procesa e desperdisionan y lo trece nan den bala pa Ser’i Teishi.

 Turismo lo sigur continua crese na Aruba, loke ta bon noticia pa e economica local. E isla a traha duru den e ultimo añanan pa fortifica su reputacion como destinacion pa bishitantenan di vakantie y esaki ta mustra di ta funciona. P’esei ta preocupante pa tende e noticia di dia 28 di december, caminda un bishitante Canadiano a ser golpi door di tres homber. E la declara cu e tabata yamando e compania di auto ora e a mira un desgrasia di auto. Segun e, e tres hombernan aki a pensa cu e tabata grabando, p’esei nan a golp’e. Tur esaki a sosode na e terminal di crucero, unda por spera cu tin grabacion di camara. Door di e experiencia aki traumatico tin un gran posibilidad cu e famia Canadiano aki no lo ke bolbe bishita Aruba. Aki nos ta papia di un incidente so. Pero un incidente di mas. Mester mira bek tambe riba e consecuensianan den e tempo di desaparicion di Natalee Holloway. Un incidente cu tin consecuensianan enorme. Mi ta spera cu e culpado nan ser detene pronto y trata cu man duru, pa asina nos reputacion como hendenan amabel no ta kibra na e manera aki.

Tambe lo tin diferente evento cultural i musical na Aruba den e aña cu ta bini. E isla tin un cultura rico i esaki ta ser celebra cu festivalnan i presentacionnan di artistanan local y internacional. E eventonan aki no solamente lo stimula e economia local, pero tambe lo duna bishitantenan e oportunidad pa experencia e cultura unico di Aruba. Manera e tradicion Dande, cu ta celebra solamente na Aruba durante fin di aña. Un tradicion caminda musiconan ta bishita casnan Arubiano pa toka musica tradicional pa duna bon bini na aña nobo. E letranan ta varia dependiente di e cantidad di famia miembro, na unda cada un di nan, cu nan nombernan, ta ser desea un bon aña nobo. E cantante mester demostra su capasidad pa improvisa. Mientras e cantante ta desea e famianan lo miho y ta duna bendishon, un sombre ta ser pasa pa duna un tip. Despues di un bebida, tal bes hasta un oliebol, e musiconan ta sigui nan caminda pa un otro cas.

Final di december tambe ta duna nos e oportunidad pa tuma bon proposito. Bon proposito, cu por ta un manera poderoso pa motiva nos mes pa hasi cambio den nos bida y pa yuda nos logra nos metanan. Asina por ta un bon proposito pa dedica mas tempo na cosnan cu nos ta gusta, manera yuda hende den necesidad, hasi un hobby of pa construi connectionnan social. Por ta tambe pa enfoca nos mes riba comportacion mas saludabel, manera move mas, come mas saludabel of reduci mal habitonan. Ta importante pa tuma metanan realista y concentra nos mes riba un of dos proposito importante. Ta importante tambe pa duna nos mes tempo pa traha riba e propositonan aki y pa no ser duru cu nos mes ora nos no logra excito mesora.

Laga nos tuma e aña nobo pa enfoca nos riba loke nos ke logra y pa concentra nos riba hasi cambio positivo den nos bida. Esei no ta tur bia facil. Laga nos tene na cuenta cu pa tuma bon proposito ta solamente e comienso; ta na nos pa converti e propositonan aki den accion y pa enfoca nos riba logra nos metanan.

Awor cu nos ta drenta aña nobo, ta importante pa sigui spera y sigui cere den un futuro miho. Ainda tin hopi desafio cu nos lo tin cu enfrenta, pero door di traha hunto y fortifica nos relaccionnan cu otro, esei ta duna nos un oportunidad nobo pa hasi nos mes y mundo rond di nos miho. Laga nos sigui spera y traha pa un futuro bunita pa e isla y su habitantenan. Un bon aña nobo pa tur!