E matrimonio, e dia mas bunita di bo bida!

E matrimonio ta un di e dianan mas importante den e bida di un persona. E ta e dia caminda dos hende ta promete pa keda hunto pa semper, pa traha hunto, comparti tur cos hunto, hari y yora hunto. E ta un dia yen di emocion, amor y felicidad.

E preparacionnan pa un matrimonio ta hopi stress, cu hopi decisionnan cu mester tuma, for di e lugar te na e colornan di e flornan. Pero ora e gran dia finalmente yega, tur e esfuerso ta mas cu balor. Pasobra den e dia di matrimonio bo ta sinti super feliz, rondona di amor y sosten di famia y amigonan.

E ceremonia mes ta hopi emocional, cu larmas di felicidad. E ta un momento caminda e amor entre e dos persona ta cla pa sinti y caminda nan ta promete nan lealtad eterno na otro. Specialmente ora esaki ta tuma lugar den e Iglesia pa wowo di Dios. No ta algo simple pa casa. Bo no ta haci un compromiso solamente cu otro, pero tambe sigur cu Dios. Pero con consciente hende ta, ora nan ta casa? Ta mas pa tradicion? Of ta pa nan realmente kere den dje?

Despues di e ceremonia, hopi biaha ta sigui un fiesta caminda tur hende por disfruta di musica, cuminda y bebida. E ta un momento pa celebra cu famia y amigonan y pa crea recuerdonan cu lo wordo conserva pa semper. E matrimonio ta un dia unico cu nunca lo wordo lubida. E ta un dia caminda amor ta central y caminda dos persona ta wordo conecta pa semper. E ta e dia mas bunita di bo bida, un dia cu lo bo semper ta valora.

Mi a pensa riba un persona cu a contami algun luna pasa, cu bo mester keda corda e momentonan bunita y cu esakinan tabata realmente a pasa. Algun bes mi ta duda esaki y no ta di acuerdo. Dicon bo mester corda e recuerdonan bunita si e otro persona tabata tin cu restringe su mes? Dicon bo mester corda e momentonan bunita si tur cos a resulta pa nada? Dicon mi no a mira esaki? Loke pa mi tabata un di e momentonan mas bunita di bida, pa e otro tabata un infierno. Por ta mi tawata un hende hopi malo den su wowo cu despues mi a merece esaki? E ta algo cu ta keda incomprendible y hopi lamentable.

Sin embargo, mi ta purba mira esaki diferente. Bo mester simplemente sigui valora e recuerdonan bunita di bo bida. E lugarnan bunita cu mi a experiencia durante mi biahenan. E experiencianan unico hunto, e conversacionnan bunita, e atencion special, aprecio y e experiencianan hunto cu ningun otro hende por a experiencia.

E fin di siman aki mi a ricibi un mensahe via WhatsApp. Un persona a puntra mi si mi tabata cla pa e fin di siman. El a bisa mi cu el a topa dos video di mi matrimonio riba YouTube pa accidente. El a pensa cu talbes mi lo kier a laga elimina e videonan aki. Asina cu mi mester a wak si mi tabata tin paz cu esaki. Mi a lubida completamente e videonan aki. Nan ta ainda riba YouTube. Mi a bisa cu esaki no ta importante pa mi. Mi no ta busca nan y preferentemente no ta mira nan, pero mi tin paz cu esaki. E tabata e dia mas bunita di bo bida, cu famia y amigonan. Aunque e ta un etapa cu a pasa, e ta un parti di bo bida. Mi no ta sinti mi verguenza pa esaki. E tabata un decision cu mi a tuma conscientemente na e momento ey y cu pa mi tabata e corecto.

Tur e recuerdonan bunita bo mester sigui corda. Ainda si no tabata tin futuro y e experiencia ta e cos cu ta conta. Durante e proceso di separacion y e proceso di elabora, bo por perde bo mes na momentonan y haci fout. Cada bes bo ta busca bo mes y bo ta ripara cu bo ta cuminsa cambia. E ta tuma tempo pa bo haya bo mes bek y finalmente bo ta ripara cu bo principionan, normanan y valornan no a cambia completamente. Esakinan bo a desaroya dor di fe, mayornan y e ambiente. Esakinan bo a fortifica bo mes na algun parti. Pa esaki, asta awe, mi ta hopi agradecido!